អន្តរជាតិ
លោក តារ៉ូ កូណូ រដ្ឋមន្រ្តីការពារជាតិជប៉ុន។ រូបភាព៖ AP
×![]()
ដោយ: ធៀន ភារិន្ទ
រដ្ឋមន្ត្រីការពារជាតិជប៉ុន លោក តារ៉ូ កូណូ នៅថ្ងៃទី២៥ ខែមិថុនា បានបញ្ជាក់ជាផ្លូវការថា ជប៉ុនសម្រេចលុបចោលការពង្រាយប្រព័ន្ធការពារមីស៊ីល Aegis Ashore របស់អាមេរិក។ 
នាពេលកន្លងទៅ នាយករដ្ឋមន្ត្រីជប៉ុន លោកស៊ិនហ្សូ អាបេ បានប្រកាសម្តងហើយថា ជប៉ុនមិនអាចបន្តផែនការពង្រាយប្រព័ន្ធការពារមីស៊ីលលើគោកAegis Ashore បានឡើយ ព្រោះត្រូវចំណាយច្រើន ទាំងពេលវេលា និងលុយ។ នៅថ្ងៃទី២៥ ខែមិថុនា រដ្ឋមន្ត្រីការពារជាតិជប៉ុន លោកតារ៉ូ កូណូ បានចេញមុខមកបញ្ជាក់បន្ថែមជាថ្មី។
ថ្លែងនៅក្នុងកិច្ចប្រជុំគណបក្សប្រជាធិបតេយ្យសេរីនិយម លោក តារ៉ូ បានបញ្ជាក់យ៉ាងដូច្នេះថា៖ «ក្រុមប្រឹក្សាសន្តិសុខជាតិ បានពិភាក្សាពីបញ្ហានេះ ហើយបានឈានទៅដល់ការសម្រេចចុងក្រោយថា ការពង្រាយប្រព័ន្ធការពារមីស៊ីល Aegis Ashore នៅក្នុងទីក្រុង Akita និង ខេត្ត Yamaguchi គឺត្រូវបានលុបចោល»។ រដ្ឋមន្ត្រីការពារជាតិជប៉ុន បានថ្លែងការសុំទោសទៅដល់អង្គប្រជុំទាំងមូលចំពោះរឿងនអ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ប្រព័ន្ធការពារ Aegis Ashore ជាប្រព័ន្ធការពារដែលពង្រាយលើគោក ដែលត្រូវបានជប៉ុនទិញក្នុងទំហំទឹកប្រាក់ប្រមាណ ៤,២ពាន់លានដុល្លារដែលនឹងបង់ថ្លៃក្នុងរយៈពេល៣ទសវត្សរ៍ ក្នុងគោលដៅការពារខ្លួនពីការគំរាមរបស់មីស៊ីលកូរ៉េខាងជើង។
ការពង្រាយមីស៊ីលនេះ គឺជាបញ្ហារសើបមួយសម្រាប់រដ្ឋាភិបាលជប៉ុន។ ជារឿយៗ ប្រជាជនជប៉ុនដែលរស់នៅទីតាំងត្រូវបានពង្រាយសព្វាវុធណាមួយ តែងចេញមុខប្រឆាំងជានិច្ច។ ម្យ៉ាងពួកគេបារម្ភថា តំបន់ដែលពួកគេរស់នៅ នឹងក្លាយជាគោលដៅវាយប្រហាររបស់សត្រូវ ហើយម្យ៉ាងទៀត គឺក្ដីបារម្ភពីបញ្ហាដែលកើតចេញពីផលប៉ះពាល់លើសុខភាពផងដែរ៕
Tag:
ជប៉ុន
អាមេរិក
© រក្សាសិទ្ធិដោយ thmeythmey.com
