ជាតិ
ក្រុមប្រឹក្សាជាតិប្រាក់ឈ្នួល ចុះសិក្សាពីស្ថានភាពកម្មករ ពីការរងផលប៉ះពាល់ដោយកូវីដ-១៩
កម្មកររោងចក្រកាត់ដេរកំពុងរៀនជំនាញទន់ពីកម្មវិធីរបស់ក្រសួងការងារ (រូបពីទំព័រហ្វេសប៊ុករបស់ក្រសួងការងារ)
×![]()
ដោយ: ឡាយ សុភាវតី
ភ្នំពេញ៖ អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមានៃក្រសួងការងារ និងបណ្តុះបណ្ដាលវិជ្ជាជីវៈ ចុះសិក្សាស្រាវជ្រាវពីស្ថានភាពជីវភាពរស់នៅរបស់កម្មករនិយោជិតក្នុងវិស័យកាត់ដេរ និង ផលប៉ះពាល់នៃជំងឺកូវីដ-១៩ ចំពោះពួកគេ។ មេសហជីពបង្ហាញការគាំទ្រលើការចុះសិក្សាស្រាវជ្រាវនេះ ប៉ុន្តែបាន ចោទជាសំណួរថា គោលបំណងនៃការចុះស្រាវជ្រាវនេះ នឹងជួយដល់កម្មករឬវិស័យឯកជន? 
ក្រុមប្រឹក្សាជាតិប្រាក់ឈ្នួលអប្បបរមា ចាប់ពីថ្ងៃទី១៧ ដល់ ថ្ងៃ៣១កក្កដា ឆ្នាំ២០២០ នឹងចុះអង្កេតនិងសិក្សាស្រាវជ្រាវក្នុងរោងចក្រ តាមបណ្តារាជធានី-ខេត្ត។ នេះបើតាមសេចក្ដីជូនដំណឹងរបស់ក្រសួងការងារ។
លោក ហេង សួរ អ្នកនាំពាក្យក្រសួងការងារមិនបានឆ្លើយប្រាប់ពីគោលបំណងនិងរបៀបនៃការចុះសិក្សាស្រាវជ្រាវនេះឡើយ។ តាមរយៈបណ្តាញទំនាក់ទំនងតេឡេក្រាម លោក ឆ្លើយនឹងសារព័ត៌មានថ្មីៗថា៖«វាជាការងាររដ្ឋបាលផ្ទៃក្នុង ដែលយើងបានធ្វើជារៀងរាល់ឆ្នាំសម្រាប់ចែកជូនសមាជិកក្រុមប្រឹក្សាជាតិប្រាក់ឈ្នួលតែប៉ុណ្ណោះ»។
ប្រធានសហព័ន្ធសហជីពកម្ពុជា លោកស្រី យ៉ាង សុភ័ណ្ឌ បង្ហាញជំហរថា ភាគីសហជីពគាំទ្រាំលើកិច្ចសិក្សាពីស្ថានភាពរបស់កម្មករដែលរងផលប៉ះពាល់នៅអំឡុងពេលកូវីដ-១៩នេះ។ ប៉ុន្តែចំណុចសំខាន់បំផុត លោកស្រី បានចោទជាសំណួរថា តើគោលបំណងនៃការចុះសិក្សានេះ គឺដើម្បីជួយដល់កម្មករឬជួយដល់វិស័យឯកជន?
លោកស្រីអះអាងថា បើរដ្ឋាភិបាលប្រើការសិក្សាស្រាវជ្រាវជួយដល់កម្មករគឺជារឿងល្អ ប៉ុន្តែបើធ្វើឲ្យបាត់បង់ប្រយោជន៍របស់កម្មករគឺជារឿងដែលអាក្រក់មើល។ មេសហជីពរូបនេះ ដែលបានឆ្លើយឆ្លងជាមួយសារព័ត៌មានថ្មីៗ តាមតេឡេក្រាមដែរនោះ ថ្លែងដូច្នេះថា៖«យើងគាំទ្រការសិក្សានេះ ប៉ុន្តែយើងត្រូវមើលពីគោលបំណងសំខាន់ដែលសិក្សាស្រាវជ្រាវវិញ ក្នុងគោលបំណងយកទៅប្រើយ៉ាងណា ជួយជាប្រយោជន៍ដល់កម្មករឬជួយជាប្រយោជន៍ដល់វិស័យឯកជន? នេះជាអ្វីដែលត្រូវគិត បើសម្រាប់ជួយដល់កម្មករគឺជារឿងមួយល្អនិងជាកាព្វកិច្ចរបស់រដ្ឋ»។
អ្នកស្រី បន្តថា៖«បើសិនណាការសិក្សានេះ សិក្សាស្រាវជ្រាវហើយ យកទៅជជែកនៅគណៈកម្មការក្រុមប្រឹក្សាការងារឬពេលដែលយើងជជែកគ្នាពីប្រាក់ឈ្នួលរបស់កម្មករដែលធ្វើប្រាក់ឈ្នួលរបស់កម្មករមិនអាចដំឡើងបាននៅឆ្នាំក្រោយនេះ វាជាចំណុចមួយអាក្រក់មើល ដោយរដ្ឋមិនបានការពារសិទ្ធិប្រយោជន៍របស់កម្មករទេ បែរជាជួយដល់វិស័យឯកជនទៅវិញ»៕
Tag:
កម្មករ
កាត់ដេរ
ការងារ
ប្រាក់ឈ្នួល
អប្បបរមា
© រក្សាសិទ្ធិដោយ thmeythmey.com
