អាជាធរភ្នំពេញបន្តព្រមានបញ្ចេញឈ្មោះជាសាធារណៈ ចំពោះអ្នកមិនបង់ថ្លៃសេវាប្រមូលសំរាម

ជាតិ

អាជាធរភ្នំពេញបន្តព្រមានបញ្ចេញឈ្មោះជាសាធារណៈ ចំពោះអ្នកមិនបង់ថ្លៃសេវាប្រមូលសំរាម

24, Jul 2020 , 11:29 pm

រូបភាព

សកម្មភាពអាជ្ញាធរខណ្ឌចំការមនចុះប្រមូលសំរាមនៅក្បែលសាលាសាមគ្គី

ដោយ: ឡាយ សុភាវតី

ភ្នំពេញ៖ រដ្ឋបាលរាជធានីភ្នំពេញ សង្កេតឃើញពលរដ្ឋមួយចំនួនតូច មិនទាន់បង់់ថ្លៃសេវាប្រមូលសំរាមប្រចាំខែមិថុនា ក្នុងដំណាក់កាលអន្តរកាលតាមប្រព័ន្ធអេឡិចត្រូនិក។ ជាថ្មីម្ដងទៀត រដ្ឋបាលរាជធានីភ្នំពេញ បានអំពាវនាវឲ្យអ្នកដែលមិនទាន់បង់ថ្លៃសេវាប្រមូលសំរាម ប្រញាប់បង់និងទូទាត់បំណុលរួម។ នេះបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញថ្ងៃទី២៣ ខែកក្កដា។

សាលារាជធានីភ្នំពេញ បានសង្កត់ធ្ងន់ថា ក្នុងករណីពលរដ្ឋណាមិនបង់ថ្លៃសេវាប្រមូលសំរាមនោះទេ អាជ្ញាធរនឹងអនុវត្តវិធានការមួយចំនួនដូចជា បញ្ចេញបញ្ជីឈ្មោះ តាមបណ្ដាញសង្គម ឬតាមប្រព័ន្ធផ្សព្វផ្សាយនានា។ លើសពីនេះ អាជ្ញាធរ នឹងត្រូវកត់ត្រាជាបំណុល ហើយបិទអាជីវកម្ម ឬសេវាកម្មបណ្ដោះអាសន្ន។

ក្រៅពីនេះ រដ្ឋបាលរាជធានីភ្នំពេញ នឹងអនុវត្តវិធានការផ្សេងៗទៀតតាមការចាំបាច់។

ទន្ទឹមនឹងនេះ រដ្ឋបាលរាជធានីភ្នំពេញ ជំរុញឲ្យពលរដ្ឋបង់ថ្លៃសេវាប្រមូលសំរាម ឲ្យទាន់ពេលកំណត់ ជៀសវាងក្រុមការងារជំនាញចាត់ការតាមនីតិវិធីខាងលើ។

សារព័ត៌មានថ្មីៗ បានទាក់ទងទៅលោក ម៉េត មាសភក្តី អ្នកនាំពាក្យសាលារាជធានីភ្នំពេញ ដើម្បីសាកសួរពីតួលេខអ្នកដែលមិនបានបង់កន្លងមក ប៉ុន្តែមិនមានការឆ្លើយតបឡើយ ដោយសារគ្មានអ្នកទទួលទូរសព្ទ៕

អត្ថបទទាក់ទង

អ្នកមិនបង់ថ្លៃសេវាសំរាម នឹងត្រូវផ្សាយឈ្មោះលើបណ្ដាញសង្គម ហើយបិទអាជីវកម្មបណ្ដោះអាសន្ន

ការទូទាត់ថ្លៃសេវាប្រមូលសំរាម នឹងត្រូវធ្វើឡើងតាមប្រព័ន្ធអេឡិចត្រូនិក ចាប់ពីដើមឆ្នាំ២០២០