COVID-19
អន្តរជាតិ
ភ្ញៀវទេសចរ នៅអាកាសយានដ្ឋានអន្តរជាតិដាណាង រង់ចាំការចាកចេញពីក្រុងដាណាង។ រូបភាព៖ AFP
×![]()
ដោយ: ធៀន ភារិន្ទ
ចាបពីម៉ោង ១២យប់ ថ្ងៃទី២៨ ខែកក្កដាតទៅ អាជ្ញាធរក្រុងដាណាង នឹងបិទជើងហោះហើរ និងប្រព័ន្ធដឹកជញ្ជូននៅក្នុងទីក្រុង ដើម្បីទប់ស្កាត់ការរាតត្បាតCOVID-19 នៅក្នុងប្រទេស។ ចំណែក ដំណើរការនៃការជម្លៀសប្រជាជនចេញពីទីក្រុងក៏ត្រូវផ្អាកផងដែរ។ នេះបើតាមបទបញ្ជារបស់ក្រសួងដឹកជញ្ជូនវៀតណាម ដែលចេញនៅល្ងាចថ្ងៃទី២៧ ខែកក្កដា។ 
គិតត្រឹមថ្ងៃទី២៧ ខែកក្កដា ទីក្រុងដាណាង បានរាយការណ៍ពីករណីឆ្លងសរុបចំនួន ១៥ករណីហើយ ដែលមានពាក់ព័ន្ធនឹងមន្ទីរពេទ្យចំនួន៣ នៅក្នុងទីក្រុងទេសចរណ៍មួយនេះ។
នៅល្ងាចថ្ងៃទី២៧ ខែកក្កដា ក្រសួងដឹកជញ្ជូនវៀតណាម បានចេញបទបញ្ជាថ្មីមួយ ដោយផ្អាកជើងហោះហើរក្នុងស្រុក ចេញ និងចូលក្រុងដាណាងទាំងអស់ ក្នុងរយៈពេល ១៥ថ្ងៃ ចាប់ពីម៉ោង១២យប់ថ្ងៃទី២៨ ខែកក្កដាតទៅ។ ដោយឡែក ជើងយន្តហោះជម្លៀសអ្នកដំណើរ ត្រូវតែចាកចេញពីក្រុងដាណាងមុនម៉ោង ១២យប់ថ្ងៃទី២៨ ខែកក្កដា ហើយជើងហោះហើរនៅសល់ត្រូវផ្អាកសិន។ នេះបើតាមការចុះផ្សាយនៅលើគេហទំព័ររដ្ឋាភិបាលវៀតណាម VGP NEWS។
ជាមួយគ្នានេះ វៀតណាម ក៏បានផ្អាកការធ្វើដំណើរនៅក្នុងទីក្រុង និងការធ្វើដំណើរចេញចូលក្រុងដាណាងផងដែរ លើកលែងករណីចាំបាច់ដូចជាអ្នកជំងឺ កម្មករជំនាញ បុគ្គលិកក្នុងរោងចក្រម្ហូបអាហារប៉ុណ្ណោះ។ តាមការបញ្ជាក់របស់រដ្ឋមន្ត្រីស្តីទីសុខាភិបាលវៀតណាម ជំងឺ COVID-19 ពេលនេះ គឺជាប្រភេទថ្មី ដោយផ្អែកទៅតាមការវិភាគលើហ្សែនរបស់វីរុស ហើយឆ្លងខ្លាំងជាងមុខ។ ការណ៍នេះ ធ្វើឲ្យវៀតណាមត្រូវតែចេញចំណាត់ការជាបន្ទាន់ និងជាបន្តបន្ទាប់ ដើម្បីទប់ស្កាត់ករណីឆ្លងនេះ។
ចំណែកប្រជាជនវៀតណាម ដែលរស់នៅក្នុងសង្កាត់ចំនួន៦ ក្នុងក្រុងដាណាង ត្រូវបានអាជ្ញាធរស្នើឲ្យស្នាក់នៅផ្ទះបណ្តោះអាសន្នសិន ដើម្បីជៀសវាងការឆ្លងCOVID-19។ ប្រជាជនទាំងនោះ ក៏អាចចាកចេញពីផ្ទះ ក្នុងករណីចាំបាច់តែប៉ុណ្ណោះ ដូចជាម្ហូបអាហារ ថ្នាំពេទ្យ និងអ្នកធ្វើការក្នុងរោងចក្រជាដើម។
ទន្ទឹមនេះ មន្ទីរពេទ្យចំនួនបីក្នុងក្រុងដាណាង ដែលត្រូវបានគេរកឃើញថាមានពាក់ព័ន្ធនឹងករណីឆ្លង COVID-19 ក៏ត្រូវអាជ្ញាធរបិទផងដែរ។
គិតត្រឹមថ្ងៃទី២៧ ខែកក្កដា វៀតណាម បានធ្វើតេស្តលើប្រជាជនចំនួន ៧៦១នាក់ ដែលមានពាក់ព័ន្ធនឹងអ្នកជំងឺ COVID-19។ ករណីCOVID-19 សរុបរបស់វៀតណាម បានកើនដល់ ៤៣១នាក់ និងមិនមានករណីស្លាប់។ រីឯអ្នកជាសះស្បើយមានចំនួន ៣៦៥នាក់៕
Tag:
វៀតណាម
COVID-19
© រក្សាសិទ្ធិដោយ thmeythmey.com
