ច្បាប់ / សិទិ្ធមនុស្ស / តុលាការ
ជាតិ
ធ្វើឲ្យអ្នកដទៃភ្ញាក់ស្មារតី ភ្លាត់មាត់ ឬកាយវិការ ក៏អាចជាទង្វើខុសច្បាប់ដែរ
× ប្រសិនបើសេចក្តីព្រាងច្បាប់ស្តីពីសណ្តាប់សាធារណៈ ត្រូវបានអនុម័តដោយគណៈរដ្ឋមន្ត្រី និងស្ថាប័ននីតិបញ្ញាត្តិ ហើយក្លាយជាច្បាប់ផ្លូវការ សូមប្រយ័ត្នឲ្យមែនទែនចំពោះសកម្មភាពដែលបង្កឲ្យអ្នកដទៃភ្ញាក់ស្មារតី ភ្លាត់មាត់ ឬភ្លាត់កាយវិការ។
តាមសេចក្តីព្រាងច្បាប់ដែលបានពិនិត្យកែសម្រួលចប់នៅថ្ងៃទី១៦ ខែមិថុនា ឆ្នាំ២០២០ ដែលសារព័ត៌មានថ្មីៗ ទទួលបាន សកម្មភាពដែលបង្កឲ្យអ្នកដទៃភ្ញាក់ស្មារតី ភ្លាត់មាត់ ឬភ្លាត់កាយវិការ ស្ថិតក្នុងចំណោមសកម្មភាពដែលប៉ះពាល់ប្រពៃណីជាតិ និងសេចក្តីថ្លៃថ្នូរនៅទីសាធារណៈ។
សកម្មភាពផ្សេងទៀតដែលប៉ះពាល់ប្រពៃណីជាតិ និងសេចក្តីថ្លៃថ្នូរនៅទីសាធារណៈ មានដូចជា ការចារឹកអក្សរ ការគូរគំនូរ ការគូរនិមិត្តសញ្ញា ការបាញ់ថ្នាំ ការបិទផ្សាយព័ត៌មាន ឬការដាក់តាំងរូបភាពដែលមានខ្លឹមសារប៉ះពាល់ដល់វប្បធម៌ ប្រពៃណីជាតិ សាសនា, ការដាក់បង្ហាញ ឬចែកចាយនូវសំណេរ ឬរូបភាព ឬប្រើពាក្យសម្តីមានខ្លឹមសារជាប្រមាថតាមបណ្តាញសង្គម, ការយករូបភាព ឬនិម្មិតសញ្ញាដែលមានតម្លៃខាងវប្បធម៌ជាតិទៅប្រើប្រាស់លើវត្ថុដែលនាំឲ្យអាប់ឱនដល់កិត្តិយសរបស់ជាតិ។
ការបញ្ចេញអាកប្បកិរិយាច្រងេងច្រង៉ាង ប្រើពាក្យសម្តីឡូឡា បង្កជម្លោះ បង្កភាពភ័យខ្លាច គំរាមកំហែង ឬជេរប្រមាថ, ការចែកចាយ ឬដាក់បង្ហាញនូវសំណេរ សញ្ញាសម្គាល់ ឬរូបភាពដែលតំណាងឲ្យការគំរាមកំហែង, ការឈ្លោះវាយតប់គ្នា ការរៃអង្គាស ការប្រមូលវិភាគទានដោយគ្មានការអនុញ្ញាតពីអាជ្ញាធរមានសមត្ថកិច្ច រួមទាំងការសុំទានតាមគ្រប់រូបភាព។
តាមមាត្រា៣៨នៃសេចក្តីព្រាងច្បាប់ អំពើល្មើសនឹងច្បាប់នេះ ត្រូវផ្តន្ទាទោសដោយការព្រមាន ការពិន័យអន្តរការណ៍ ការដាក់វិន័យរដ្ឋបាល ឬការដាក់ទោសពន្ធនាគារ ឬ/និងពិន័យជាប្រាក់។
ការពិន័យអន្តរការណ៍ចំពោះអំពើល្មើសនឹងច្បាប់ស្តីពីសណ្តាប់ធ្នាប់សាធារណៈ ត្រូវកំណត់ដោយអនុក្រឹត្យ ការដាក់វិន័យរដ្ឋបាលជាសមត្ថកិច្ចរបស់ក្រសួងសាម៉ី ដែលគ្រប់គ្រងមន្ត្រីប្រព្រឹត្តល្មើសនឹងច្បាប់ស្របតាមបទប្បញ្ញត្តិ និងនីតិវិធីជាធរមាន រីឯការផ្តន្ទាទោសដាក់ពន្ធនាគារ ឬ/និងការផ្តន្ទាទោសពិន័យជាប្រាក់ ជាសមត្ថកិច្ចរបស់តុលាការ៕
© រក្សាសិទ្ធិដោយ thmeythmey.com