ជាតិ
សង្គមជាតិ
ពីថ្ងៃ១តុលា២០២០ទៅ កម្ពុជា-វៀតណាម អាចសុំផ្ទេរអ្នកទោសទៅវិញទៅមក សម្តេចនាយករដ្ឋមន្រ្តី ហ៊ុន សែន និង លោក Nguyen Xuan Phuc នាយករដ្ឋមន្រ្តីវៀតណាម ចាប់ដៃគ្នា ក្នុងឱកាសដែលសម្តេចនាយករដ្ឋមន្រ្តី ហ៊ុន សែន ទៅបំពេញទស្សនកិច្ច នៅវៀតណាម កាលពីអំឡុងខែធ្នូ ឆ្នាំ២០១៨ (រូបពី AFP)
× សន្ធិសញ្ញាស្តីពីការផ្ទេរទណ្ឌិតរវាងកម្ពុជានិងវៀតណាម នឹងចូលជាធរមាននៅថ្ងៃទី១ ខែតុលា ឆ្នាំ២០២០។ លោក ស៊ា កុសល រដ្ឋលេខាធិការក្រសួងការបរទេស បានចុះហត្ថលេខាជួសលោក ប្រាក់ សុខុន ជារដ្ឋមន្ត្រី លើសេចក្តីជូនដំណឹង កាលពីថ្ងៃទី៤ ខែកញ្ញា ឆ្នាំ២០២០ ស្តីពីការចូលជាធរមាននៃសន្ធិសញ្ញានេះ ហើយផ្ញើជូនលោក កើត រិទ្ធ រដ្ឋមន្ត្រីក្រសួងយុត្តិធម៌។
ការចូលជាធរមាននៃសន្ធិសញ្ញាស្តីពីការផ្ទេរទណ្ឌិតរវាងកម្ពុជានិងវៀតណាម មានន័យថា ចាប់ពីថ្ងៃទី១ ខែតុលា ឆ្នាំ២០២០ កម្ពុជា អាចស្នើសុំយកទណ្ឌិត (អ្នកទោស) ជាជនជាតិខ្មែរ ដែលជាប់ពន្ធនាគារនៅវៀតណាម មកបន្តឃុំនៅកម្ពុជាវិញ ហើយទណ្ឌិតជាជនជាតិវៀតណាម ដែលជាប់ពន្ធនាគារនៅកម្ពុជា នឹងអាចត្រូវបានវៀតណាម ស្នើសុំយកទៅបន្តឃុំនៅវៀតណាម។
កម្ពុជានិងវៀតណាម ចាប់ផ្តើមពិភាក្សាជាមួយគ្នា អំពីការបង្កើតសន្ធិតសញ្ញាផ្ទេរទណ្ឌិតនេះ តាំងពីចុងឆ្នាំ២០១៦មក។ រហូតដល់ខែមីនា ឆ្នាំ២០២០ រដ្ឋសភាកម្ពុជា បានអនុម័តយល់ព្រមលើសន្ធិសញ្ញានេះ និងក្រោយមក ក៏ត្រូវបានព្រះមហាក្សក្សត្រ ចេញព្រះរាជក្រឹត្យប្រកាសឲ្យប្រើប្រាស់ ហើយនឹងត្រូវចូលជាធរមាន (ចាប់ផ្តើមអនុវត្ត) នៅថ្ងៃទី១ ខែតុលា ឆ្នាំ២០២០តទៅ៕
Tag:
កម្ពុជា-វៀតណាម
ផ្ទេរអ្នកទោស
© រក្សាសិទ្ធិដោយ thmeythmey.com