អន្តរជាតិ
រដ្ឋាភិបាលថៃ ប្រាប់សាកលវិទ្យាល័យនានាណែនាំនិស្សិតឲ្យឈប់ទាមទារកែទម្រង់រាជានិយម បាតុករថៃទាមទារកំណែទម្រង់របបរាជានិយម។ រូបភាព៖ Getty Image
× អាជ្ញាធរថៃ បានស្នើឲ្យថ្នាក់ដឹកនាំសាកលវិទ្យាល័យនានា ណែនាំក្រុមនិស្សិតឲ្យឈប់តវ៉ាទាមទារកំណែទម្រង់របបរាជានិយម។ នេះយោងតាមការបង្ហើបរបស់សមាជិកព្រឹទ្ធសភាថៃ នៅថ្ងៃទី១៣ ខែកញ្ញា។ បាតុករដែលជាយុវជន គ្រោងជួបជុំគ្នាធ្វើបាតុកម្មនៅថ្ងៃទី១៩ ខែកញ្ញាខាងមុខ។ សមាជិកព្រឹទ្ធសភាថៃ ក៏បានព្រមានថា ការទាមទារបែបនេះ នឹងបណ្តាលឲ្យមានហិង្សាកើតឡើង។
តាំងតែពីពាក់កណ្តាលខែកក្កដាមក ក្រុមយុវជន ក៏ដូចជានិស្សិតថៃបាននាំគ្នាទាមទារឲ្យលោកនាយករដ្ឋមន្ត្រីថៃ ប្រាយុទ្ធ ចាន់អូចា ចុះចេញពីតំណែង ទាមទារការបោះឆ្នោត និងបង្កើតរដ្ឋធម្មនុញ្ញថ្មី។ក្រុមបាតុករ ក៏បានដាក់ចេញនូវការទាមទារចំនួន១០ ចំណុច ក្នុងការធ្វើកំណែទម្រង់របបរាជានិយមផងដែរ។
បើតាមទីភ្នាក់ងារព័ត៌មាន Reuters លោក Somchai Sawangkarn សមាជិកព្រឹទ្ធសភាថៃ បានអះអាងថា លិខិតជាច្រើនច្បាប់ត្រូវបានបញ្ជូនទៅគណៈគ្រប់គ្រងសាកលវិទ្យាល័យ ដើម្បីជួបប្រជុំ មុននឹងការធ្វើបាតុកម្មតវ៉ារបស់ក្រុមនិស្សិតនៅថ្ងៃទី១៩ កញ្ញា។ លោក Somchai បាននិយាយថា លិខិតខាងលើនេះ មិនមែនជាការហាមឃាត់បាតុកម្មឡើយ ប៉ុន្តែជាការជជែកគ្នាជាមួយថ្នាក់ដឹកនាំសាកលវិទ្យាល័យ ជុំវិញការទាមទារទាំង១០ ចំណុចក្នុងការកែប្រែរបបរាជានិយម។
លិខិតនោះ បានបញ្ជាក់ថា មានក្តីបារម្ភអំពីសកម្មភាពរបស់មនុស្សមួយចំនួនដែលចូលរួមក្នុងបាតុកម្ម ជាឧទាហរណ៍ការប៉ុនប៉ងផ្តួលរំលំរបបរាជានិយម ការលុបចោលមាត្រា១១២ ក្នុងក្រមព្រហ្មទណ្ឌថៃ ដែលផ្តន្ទាទោសដាក់គុកដល់ទៅ១៥ឆ្នាំ ដល់បុគ្គលដែលប្រមាថព្រះមហាក្សត្រ។ លិខិតខាងលើ បន្តថា បញ្ហារសើបខាងលើអាចនឹងបណ្តាលឲ្យមានអំពើហិង្សា។
ប្រភពព័ត៌មានដដែល បានស្រង់អ្នកដែលចូលរួមក្នុងកិច្ចប្រជុំជាមួយអាជ្ញាធរ បានបង្ហើបថា អាជ្ញាធរក៏ បានសុំបញ្ជីឈ្មោះនិស្សិតដែលអាចនឹងបង្ករឿងនៅពេលបាតុកម្មពីសាកលវិទ្យាល័យផងដែរ។ បាតុកម្មថ្ងៃទី១៩ ខែកញ្ញា រៀបចំដោយមេដឹកនាំនៅសាកលវិទ្យាល័យ Thammasat ហើយអាចមានច្រើនជាងមួយម៉ឺននាក់ឯណោះ។
ការទាមទារកំណែទម្រង់របបរាជានិយមពីសំណាក់បាតុករថៃ រួមមានការកាត់បន្ថយអំណាចព្រះមហាក្សត្រតាមរយៈរដ្ឋធម្មនុញ លើការគ្រប់គ្រងទ្រព្យសម្បត្តិ និងអង្គភាពកងទ័ពជាដើម។ ការទាមទារនេះ ជាផ្នែកមួយនៃការទាមទាររបស់បាតុករថៃ ដែលក៏សំដៅផងដែរលើលោក ប្រាយុទ្ធ ។
សូមបញ្ជាក់ថា កាលពីថ្ងៃទី១៦ ខែសីហាកន្លងទៅ ចលនាយុវជន និងនិស្សិតប្រឆាំងរដ្ឋាភិបាល និងប្រជាធិបតេយ្យនិយមដែលមានឈ្មោះថា Free People បានរៀបចំជួបជុំគ្នាធ្វើបាតុកម្មដ៏ធំបំផុតតាំងតែពីរដ្ឋប្រហារយោធាឆ្នាំ២០១៤ ដែលមានមនុស្សចូលរួមយ៉ាងតិច១ម៉ឺននាក់៕
© រក្សាសិទ្ធិដោយ thmeythmey.com