សង្គមអន្តរជាតិ
អន្តរជាតិ
បាតុករថៃ តវ៉ានៅពីមុខខ្លោងទ្វារដ្ឋសភាថៃ។ រូបភាព៖ Reuters
×![]()
រដ្ឋសភាថៃ នៅថ្ងៃទី២៤ ខែកញ្ញាបានសម្រេចបោះឆ្នោតពន្យារពេលក្នុងការសម្រេចចិត្តធ្វើវិសោធនកម្មរដ្ឋធម្មនុញ្ញ។ រដ្ឋធម្មនុញ្ញថៃ ដែលត្រូវបានតែងឡើង និងអនុម័តក្រោយរដ្ឋប្រហារយោធាក្នុងឆ្នាំ២០១៤ ត្រូវបានបាតុករនិស្សិតថៃទាមទារឲ្យធ្វើវិសោធនកម្មសឹងតែរៀងរាល់ថ្ងៃ ក្នុងរយៈពេល២ខែចុងក្រោយ។ 
រដ្ឋសភាថៃ ដែលមានតំណាងរាស្ត្រភាគច្រើនជាអ្នកគាំទ្ររដ្ឋាភិបាល បានពន្យារពេលក្នុងការធ្វើវិសោធនកម្មរដ្ឋធម្មនុញ្ញ។ ផ្ទុយទៅវិញ រដ្ឋសភាថៃបែរសម្រេចបង្កើតគណៈកម្មការមួយដើម្បីសិក្សាពីដំនីតិវិធីក្នុងការធ្វើវិសោធនកម្មទៅវិញ។ លោក Chinnaworn Boonyakiat តំណាងរាស្ត្រគាំទ្ររដ្ឋាភិបាលថៃ និយាយថា៖« សំណើក្នុងការបោះឆ្នោតលើការធ្វើវិសោធនកម្មរដ្ឋធម្មនុញ្ញត្រូវបានពន្យាររហូតដល់ខែវិច្ឆិកា»។
ប៉ុន្តែសេចក្តីសម្រេចចិត្តនេះប្រៀបបានដូចជាយកសាំងទៅជះលើភ្លើង សម្រាប់បាតុករ១ពាន់នាក់ដែលនាំគ្នាឈរនៅពីមុខខ្លោងទ្វារដ្ឋសភាថៃ ក៏ដូចជាតំណាងរាស្ត្របក្សប្រឆាំង ។ លោក Wiroj Lakkhanaadisorn តំណាងរាស្ត្របក្សឆ្ពោះទៅមុខ និយាយថា សេចក្តីសម្រេចរបស់សភានេះ គឺជាការបោកបញ្ឆោតប្រជាជន។
«បើសិនជាដំណាក់កាលធ្វើវិសោធនកម្ម ត្រូវបានពន្យារមួយខែ ដើម្បីរៀបចំគណៈកម្មការ បន្ទាប់មកសំណើធ្វើវិសោធនកម្មនេះ ត្រូវបានបដិសេធ វាបានន័យថា សមាជិកសភាមិនអាចស្នើរឿងនេះម្តងទៀតរហូតដល់ឆ្នាំក្រោយ»។ នេះជាសាររបស់លោក Wiroj នៅក្នុងបណ្តាញសង្គម Twitter ។
ស្របជាមួយគ្នានោះ លោក Tattep Ford Ruangprapaikitseree អ្នករៀបចំបាតុកម្ម បានលើកឡើងថា រដ្ឋាភិបាលមានបំណងពន្យារពេល។ លោកអះអាងថា សេចក្តីសម្រេចចិត្តនេះបង្ហាញពីភាពមិនស្មោះត្រង់ជាមួយពលរដ្ឋ និងមិនអាចទទួលយកបាន។
រដ្ឋធម្មនុញ្ញថៃ ដែលអនុម័តក្នុងឆ្នាំ២០១៧ អំឡុងពេលរបបយោធាគ្រប់គ្រងប្រទេស ត្រូវបានប្រជាពលរដ្ឋថៃបោះឆ្នោតយល់ព្រមក្នុងការធ្វើប្រជាមតិកាលពីឆ្នាំ២០១៦ ប៉ុន្តែគ្រានោះបក្សប្រឆាំងមិនត្រូវបានអនុញ្ញាតឲ្យធ្វើយុទ្ធនាការឡើយ។ រដ្ឋធម្មនុញ្ញនេះ ត្រូវបានបាតុករថៃមើលឃើញថាឲ្យអំណាចច្រើនជ្រុលដល់ព្រះមហាក្សត្រ ហើយបើកផ្លូវឲ្យលោក ប្រាយុទ្ធ ចន្ទអូចា បន្តដឹកនាំប្រទេស។
ជិតរយៈពេល២ខែ មកហើយដែលបាតុករនិស្សិតថៃទាមទារឲ្យលោកនាយករដ្ឋមន្ត្រី ប្រាយុទ្ធ ចាន់អូចា លាលែងពីតំណែង រំលាយសភា បញ្ឈប់ការបំពានលើអ្នកប្រឆាំង ក៏ដូចជាធ្វើកំណែទម្រង់របបរាជានិយម។ បាតុករ ក៏ទាមទារផងដែរឲ្យកាត់បន្ថយឥទ្ធិពលព្រះមហាក្សត្រ។ កាលពីចុងសប្ដាហ៍មុន បាតុករប្រមាណ៥ម៉ឺននាក់នេះ បានជួបគ្នានៅក្បែររាជវាំង ដែលជាបាតុកម្មធំបំផុតតាំងតែពីរដ្ឋប្រហារក្នុងឆ្នាំ២០១៤មក៕
Tag:
ថៃ
© រក្សាសិទ្ធិដោយ thmeythmey.com
