អន្តរជាតិ
លោកLee Do-hoon ប្រធានក្រុមចរចានុយក្លេអ៊ែររបស់កូរ៉េខាងត្បូង(ខាងឆ្វេង) និងរដ្ឋលេខាធិការក្រសួងការបរទេសអាមេរិក លោកស្តេហ្វិន ប៊ីហ្កាន់ ថ្លែងប្រាប់អ្នកសារព័ត៌មាន បន្ទាបពីជំនួបចរចាទ្វេភាគី នៅថ្ងៃទី២៨ ខែកញ្ញ ឆ្នាំ២០២០។ រូបភាព៖ Yonhap
×![]()
ដោយ: ធៀន ភារិន្ទ
មន្ត្រីជាន់ខ្ពស់អាមេរិក និងកូរ៉េខាងត្បូង នៅថ្ងៃទី២៨ ខែកញ្ញា បានជួបចរចាគ្នា លើបញ្ហាកូរ៉េខាងជើង និងបញ្ហាពាក់ព័ន្ធផ្សេងទៀត។ ជំនួបនេះ ធ្វើឡើងបន្ទាប់ពីការអំពាវនាវរបស់ប្រធានាធិបតីកូរ៉េខាងត្បូង លោកមូន ចេអ៊ីន ស្វែងរកការគាំទ្រលើសេចក្តីប្រកាសបញ្ចប់សង្គ្រាមឧបទ្វីបកូរ៉េ និងបន្ទាប់ពីកងទ័ពកូរ៉េខាងជើង បាញ់សម្លាប់មន្ត្រីនេសាទកូរ៉េខាងត្បូង នៅតំបន់ព្រំដែនសមុទ្រប្រទេសទាំងពីរ។ 
អត្ថបទទាក់ទង
លោក Lee Do-hoon ប្រធានក្រុមចរចានុយក្លេអ៊ែររបស់កូរ៉េខាងត្បូង បានទៅដល់ទឹកដីអាមេរិកហើយ នៅថ្ងៃទី២៧ ខែកញ្ញា ដើម្បីជួបជាមួយរដ្ឋលេខាធិការក្រសួងការបរទេសអាមេរិក ស្តេហ្វិន ប៊ីហ្កាន់ (Stephen Biegun) នៅទីក្រុងវ៉ាស៊ីនតោន។ ជំនួបមន្ត្រីជាន់ខ្ពស់អាមេរិក និងកូរ៉េខាងត្បូងលើកនេះ បាននិយាយពីបញ្ហាកូរ៉េខាងជើង ការរំសាយកម្មវិធីនុយក្លេអ៊ែរ បញ្ហាសន្តិភាពលើឧបទ្វីបកូរ៉េជាដើម។
ថ្លែងប្រាប់អ្នកសារព័ត៌មានបន្ទាប់ពីជំនួបជាមួយមន្ត្រីជាន់ខ្ពស់កូរ៉េខាងត្បូង លោក ប៊ីហ្កាន់ បានអះអាងថា អាមេរិក និងកូរ៉េខាងត្បូង នៅតែបន្តប្តេជ្ញាលើការចរចាផ្នែកការទូត ដើម្បីឈានទៅដល់កិច្ចព្រមព្រៀងសន្តិភាពលើឧបទ្វីបកូរ៉េ ការរំសាយកម្មវិធីនុយក្លេអ៊ែរ ការនាំអនាគតដ៏ភ្លឺស្វាងសម្រាប់ប្រជាជនកូរ៉េ និងការភ្ជាប់ទំនាក់ទំនងការទូតឡើងវិញរវាងអាមេរិក និងកូរ៉េខាងជើង។
ទន្ទឹមគ្នានេះ មន្ត្រីទូតអាមេរិកខាងលើ បានទទួលស្គាល់ថា ការចរចាសន្តិភាពលើឧបទ្វីបកូរ៉េ មិនអាចទទួលជោគជ័យបានឡើយ ប្រសិនបើគ្មានភាគីកូរ៉េខាងជើងចូលរួម។ «ខ្ញុំសាទរយ៉ាងខ្លាំងលើគំនិតច្នៃប្រឌិត ដែលយើងបានពិភាក្សាថ្ងៃនេះ។ ប៉ុន្តែយើងមិនអាចធ្វើវាបានត្រឹមតែពីរភាគីទេ។ យើងត្រូវការកូរ៉េខាងជើង ដើម្បីចូលរួម ហើយយើងនៅតែបើកចំហការជជែកជាមួយកូរ៉េខាងជើង នៅពេលពួកគេបានត្រៀមខ្លួនរួច»។ មន្ត្រីការទូតជាន់ខ្ពស់អាមេរិក បានលើកឡើងបែបនេះ។
ចំណែកមន្ត្រីជាន់ខ្ពស់កូរ៉េខាងត្បូងវិញ ក៏យល់ដូចអាមេរិកដែរថា ជំនួបទ្វេភាគីនេះ គឺទទួលបានផ្លែផ្កាច្រើន។ បើតាមបញ្ជាក់របស់លោកLee កិច្ចពិភាក្សានេះ គឺបានជជែកលើបញ្ហាជាច្រើន ការអនុវត្តកិច្ចការរួមគ្នាលើការរំសាយអាវុធនុយក្លេអ៊ែរលើឧបទ្វីបកូរ៉េ និងការកសាងរបបសន្តិភាពជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ជំនួបនេះ ធ្វើឡើងបន្ទាប់ពីប្រធានាធិបតីកូរ៉េខាងត្បូង បានអំពាវនាវឲ្យមានការគាំទ្រសេចក្តីប្រកាសបញ្ចប់សង្គ្រាមលើឧបទ្វីបកូរ៉េឆ្នាំ១៩៥០ ដល់១៩៥៣។ ជាការពិតសង្គ្រាមឧបទ្វីបកូរ៉េនេះ គឺមិនទាន់មានសេចក្តីប្រកាសបញ្ចប់សង្គ្រាមនៅឡើយទេ ប៉ុន្តែមានត្រឹមតែកិច្ចព្រមព្រៀងផ្អាកសង្គ្រាមប៉ុណ្ណោះ។
សូមបញ្ជាក់ថា ក្នុងជំនួបមន្ត្រីជាន់ខ្ពស់អាមេរិក និងកូរ៉េខាងត្បូងនេះ ក៏បានលើកឡើងពីបញ្ហាបាញ់សម្លាប់មន្ត្រីនេសាទកូរ៉េខាងត្បូង ពីសំណាក់កូរ៉េខាងជើងផងដែរ។ ក្នុងនោះភាគីអាមេរិក បានគាំទ្រការរិះគន់របស់កូរ៉េខាងត្បូងលើកូរ៉េខាងជើង និងថាជាឧបទ្ទវហេតុគួរឲ្យខ្លោចផ្សាមួយសម្រាប់ប្រជាជនកូរ៉េខាងត្បូង៕
Tag:
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
