អ្នករៀបចំ៖ ការជជែកដេញដោលត្រាំ-បៃឌិន លើកទីពីរ នឹងមានសណ្ដាប់ធ្នាប់ជាងមុន

អន្តរជាតិ

នយោបាយអន្តរជាតិ

អ្នករៀបចំ៖ ការជជែកដេញដោលត្រាំ-បៃឌិន លើកទីពីរ នឹងមានសណ្ដាប់ធ្នាប់ជាងមុន

01, Oct 2020 , 5:29 pm

រូបភាព

ទិដ្ឋាភាពអំឡុងការជជែកដេញដោលលើកទី១ រវាងលោក ត្រាំ និង លោក បៃឌិន នៅយប់ថ្ងៃទៅ ២៩ ខែកញ្ញា ។ រូបភាព AFP

ដោយ:

ការជជែកដេញដោលប្រធានាធិបតីអាមេរិក នឹងត្រូវកែប្រែ ក្រោយការជួបមុខលើកដំបូងរវាងលោក ចូ បៃឌិន បេក្ខជនមកពីបក្សប្រធាធិបតេយ្យ និងលោក ដូណាល់ ត្រាំ ប្រធានាធិបតីអាមេរិក បានប្រព្រឹត្តទៅយ៉ាងអនាធិបតេយ្យ។ គណៈកម្មាធិការរៀបចំកម្មវិធីនេះ បញ្ជាក់បែបនេះ ដោយបន្ថែមថា ពួកគេកំពុងពិចារណាដាក់វិធានការនានាដូចជាការកាត់ផ្ដាច់មីក្រូហ្វូន បើបេក្ខជនណាម្នាក់ព្យាយាមនិយាយរំខានភាគីផ្សេង។

អត្ថបទទាក់ទង

ចំណុចសំខាន់ក្នុងការជជែកដេញដោល ត្រាំ-បៃឌិន លើកទី១

ក្នុងសេចក្តីថ្លែងការណ៍ នៅថ្ងៃទី៣០ ខែកញ្ញា គណៈកម្មាធិការរៀបចំការជជែកដេញដោលប្រធានាធិបតី (CPD) បានបញ្ជាក់ពីភាពចាំបាច់នៃការដាក់បញ្ចូលវិធានការថ្មីក្នុងទម្រង់នៃការជជែកដេញដោលដែលនៅសេសសល់ចំនួន២លើកទៀត។ គោលដៅ គឺដើម្បីធានាថា កិច្ចពិភាក្សារវាងលោកត្រាំនិងលោកបៃឌិនមានសណ្ឋាប់ធ្នាប់ជាងមុន។

យោងតាមការចុះផ្សាយរបស់ទូរទស្សន៍អាមេរិក CBS News គណៈកម្មាធិការឯករាជ្យមួយនេះ នឹងចំណាយ៤៨ម៉ោងដើម្បីបង្កើតសេចក្តីណែនាំនិងក្បួនច្បាប់ថ្មីសម្រាប់ការតស៊ូមតិលើកទី២ ដែលនឹងរៀបចំឡើងនាថ្ងៃទី ១៥ ខែតុលា ក្នុងរដ្ឋ Florida ។

ទូរទស្សន៍ដដែលបានផ្សាយទៀតថា ការកាត់ផ្ដាច់មីក្រូហ្វូនរបស់បេក្ខជន គឺជាជម្រើសអាទិភាពរបស់ពួកគេ ដើម្បីបង្ការការនិយាយកាត់សម្តីអ្នកសម្របសម្រួល ឬគូប្រជែងពួកគេ។ ក្រុមយុទ្ធនាការរបស់លោក ដូណាល់ ត្រាំ និងលោក ចូ បៃឌិន នឹងត្រូវផ្ដល់ដំណឹងពីក្បួនច្បាប់ថ្មីនៃការជជែកដេញដោល តែពួកគេនឹងមិនត្រូវអនុញ្ញាតឲ្យចូលរួមចរចាឡើយ។

ប្រធានផ្នែកទំនាក់ទំនងរបស់យុទ្ធនាការបោះឆ្នោតរបស់លោកត្រាំ លោក Tim Murtaugh ដែលចាត់ទុកការតស៊ូមតិលើកទី១ថាជាការផ្លាស់ប្តូរគំនិតដោយសេរី បានរិះគន់គម្រោងកែប្រែនេះ ។ ចំណែក អនុប្រធានក្រុមយុទ្ធនាការបោះឆ្នោតរបស់លោកបៃឌិន អ្នកស្រី Kate Bedingfield បាននិយាយថា លោក បៃឌិន នឹងគោរពតាមក្បួនច្បាប់ណាដែលអាចទប់ទល់ការប្រព្រឹត្តឥតសណ្ដាប់ធ្នាប់របស់លោកត្រាំ។

សូមបញ្ជាក់ថា ការតស៊ូមតិលើកដំបូងរវាងលោកត្រាំ និងលោកបៃឌិន កាលពីថ្ងៃទី ២៩ ខែកញ្ញាដែលធ្វើឡើង៩០នាទី បានប្រព្រឹត្តទៅយ៉ាងអនាធិបតេយ្យជាខ្លាំង ដោយស្ទើរគ្រប់ប្រធានបទ អ្នកទាំងពីរនិយាយកាត់សម្តីទៅវិញទៅមក និងបង្កការលំបាកដល់អ្នកសម្រួបសម្រួលក្នុងការគ្រប់គ្រងផងដែរ។

ដោយទ្រាំលែងបាននឹងការនិយាយរំខានពីលោក ត្រាំ ដែលព្យាយាមឆ្លើយកាត់ លោក បៃឌិន បានស្រែកឲ្យលោក ត្រាំ បិទមាត់។ លោកចាត់ទុកទង្វើនេះមិនសមនឹងឥរិយាបថរបស់ប្រធានាធិបតីអាមេរិកឡើយ៕