ជាតិ
សង្គមជាតិ
លោក សុវណ្ណ រិទ្ធី អតីតចាងហ្វាង TVFB ត្រូវបានដោះលែងវិញ រូបពីហ្វេសប៊ុករបស់លោក សុវណ្ណ រិទ្ធី
× សាលាដំបូងរាជធានីភ្នំពេញ បានបើកសវនាការលើសំណុំរឿងរបស់លោក សុវណ្ណ រិទ្ធី អតីតអគ្គនាយកសារព័ត៌មានធីវីហ្វេសប៊ុក (TVFB) ដោយសម្រេចផ្តន្ទាទោស១៨ខែ តែតម្រូវឲ្យអនុវត្តទោសក្នុងពន្ធនាគារត្រឹម៥ខែ២៨ថ្ងៃប៉ុណ្ណោះ ហើយទោសនៅសល់ទាំងប៉ុន្មាន ត្រូវព្យួរ (មិនឲ្យស្ថិតនៅក្នុងពន្ធនាគារ)។
លោក សុវណ្ណ រិទ្ធី បានជាប់ឃុំតាំងពីថ្ងៃទី៩ ខែមេសា ឆ្នាំ២០២០មក ក្រោមបទញុះញង់ឲ្យប្រព្រឹត្តបទឧក្រិដ្ឋជាអាទិ៍។ គិតមកដល់ថ្ងៃទី៥ ខែតុលា ឆ្នាំ២០២០ គឺគ្រប់រយៈពេល៥ខែ២៨ថ្ងៃហើយ ដូច្នេះ លោក សុវណ្ណ រិទ្ធី ត្រូវចេញពីពន្ធនាគារក្នុងថ្ងៃនេះតែម្តង។
ចៅក្រម សម្រេចឲ្យលោក សុវណ្ណ រិទ្ធី ជាប់ពន្ធនាគារ១៨ខែ តែអនុវត្តទោសតែ៥ខែ២៨ថ្ងៃ ដូច្នេះ តើគាត់ ត្រូវចេញពីពន្ធនាគារថ្ងៃនេះតែម្តង? ហើយតុលាការ មានបានចេញដីកាបង្គាប់ទៅពន្ធនាគារ ឲ្យដោះលែងគាត់ហើយឬនៅ? លោក គុជ គឹមឡុង ព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងរាជធានីភ្នំពេញ ឆ្លើយតបនឹងសារព័ត៌មានថ្មីៗ តាមបណ្តាញទំនាក់ទំនាក់ទំនងតេឡេក្រាមយ៉ាងខ្លីថា៖«ចំពោះសំណួរ ដែលបានអត្ថាធិប្បាយមកហ្នឹង គឺត្រឹមត្រូវតាមហ្នឹងហើយ»។
លោក សុវណ្ណ រិទ្ធី បានស្រង់សម្តីរបស់សម្តេចនាយករដ្ឋមន្ត្រី ទៅបង្ហោះលើហ្វេសប៊ុកថា៖«បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ»។ ការស្រង់សម្តីរបស់ប្រមុខរដ្ឋាភិបាលត្រង់ចំណុចនេះហើយ ដែលធ្វើឲ្យលោក សុវណ្ណ រិទ្ធី ត្រូវចាប់ខ្លួនពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍។
ឧត្តមសេនីយ៍ឯក ឆាយ គឹមចខឿន អ្នកនាំពាក្យអគ្គស្នងការដ្ឋាននគរបាលជាតិ បានប្រាប់សារព័ត៌មានថ្មីៗ នាពេលនោះថា សំណេររបស់លោក សុវណ្ណ រិទ្ធី ជាការបំប៉ោង និងបំពុលសង្គម ដែលធ្វើឲ្យប្រជាពលរដ្ឋយល់ច្រឡំលើសម្ដេចនាយករដ្ឋមន្រ្តី។ លោក ឆាយ គឹមខឿន ចាត់ទុកសំណេររបស់លោក សុវណ្ណ រិទ្ធី ថាជាចេតនាបង្កើតឲ្យមានចលាចលក្នុងសង្គម។
អ្នកនាំពាក្យនគរបាលជាតិ មានប្រសាសន៍ថា៖«សម្ដេច ហ៊ុន សែន គាត់បានចេញវិធានការដោះស្រាយបញ្ហាពលរដ្ឋ ដែលជួបបញ្ហាប្រឈមនឹងជំងឺកូវីដ-១៩ ហើយគ្រាន់តែសម្ដេចនិយាយលេងមួយម៉ាត់ ពីរម៉ាត់សោះ បែរជាយកមកចុះផ្សាយ។ សម្ដេចគាត់គ្មានចេតនាដូចការចុះផ្សាយឯណា ព្រោះគាត់បានចេញវិធានការច្រើនមកហើយ»។
ក្រោយលោក សុវណ្ណ រិទ្ធី ជាប់ឃុំ ក្រសួងព័ត៌មាន ក៏ចេញប្រកាសសម្រេចដកអាជ្ញាប័ណ្ណពីសារព័ត៌មាន TVFB របស់លោក។ ខណៈកំពុងជាប់ឃុំ លោក សុវណ្ណ រិទ្ធី ក៏ទទួលបានពាន «Freedom of Speech Award» ប្រចាំឆ្នាំ២០២០ ពីស្ថាប័នសារព័ត៌មានអាល្លឺម៉ង់ Deutsche Welle (DW)៕
Tag:
សុវណ្ណ រិទ្ធី មានសេរីភាពវិញ
© រក្សាសិទ្ធិដោយ thmeythmey.com