អន្តរជាតិ
អាស៊ែបៃហ្សង់ ដាក់លក្ខខណ្ឌឲ្យអាមេនីដកទ័ព ទើបពិភាក្សាលើបទឈប់បាញ់
ប្រធានាធិបតីអាស៊ែបៃហ្សង់ លោក Ilham Aliyev ។ រូបភាព៖ AFP
×![]()
ប្រធានាធិបតីអាស៊ែបៃហ្សង់ នៅថ្ងៃទី៤ ខែតុលា អះអាងថា រដ្ឋាភិបាលលោក នឹងមិនយល់ព្រមទៅនឹងបទឈប់បាញ់ដែលស្នើដោយអាមេនីឡើយ បើសិនជាអាមេនីមិនចេញផែនការឲ្យច្បាស់លាស់ក្នុងការដកទ័ពចេញពីក្នុងតំបន់ Nagorno-Karabakh និងតំបន់ជុំវិញនោះដែលស្ថិតក្នុងទឹកដីអាស៊ែបៃហ្សង់។
ការប្រយុទ្ធគ្នារវាងអាមេនី និងអាស៊ែបៃហ្សង់បានវិវត្តដល់ដំណាក់កាលថ្មីមួយទៀត នៅថ្ងៃទី២ ខែតុលាបន្ទាប់ពីអាមេនីអះអាងត្រៀមខ្លួនក្នុងការពិភាក្សាលើបទឈប់បាញ់ជាមួយអាស៊ែបៃហ្សង់ ក្រោមការជ្រោមជ្រែងរបស់សហប្រធានក្រុមមីនស្កិ៍(Minsk Group Co-chair) នៃអង្គការដើម្បីសន្តិសុខ និងសហប្រតិបត្តិការអឺរ៉ុប(OSCE)។
ប៉ុន្តែបំណងក្នុងការពិភាក្សាលើបទឈប់បាញ់នេះ ត្រូវបានអាស៊ែបៃហ្សង់ដាក់លក្ខខណ្ឌថា អាចធ្វើទៅបាន ដរាបណាអាមេនីចេញផែនការច្បាស់លាស់ក្នុងការដកទ័ពចេញពីតំបន់ Nagorno-Karabakh ដែលស្ថិតក្នុងដីរបស់ខ្លួន។
ថ្លែងក្នុងសុន្ទរកថាតាមទូរទស្សន៍ ប្រធានាធិបតីអាស៊ែបៃហ្សង់ លោកIlham Aliyev សង្កត់ធ្ងន់ថា៖«លក្ខខណ្ឌនោះគឺ ការដកទ័ពរបស់អាមេនី ហើយការប្រឈមមុខដាក់គ្នានឹងត្រូវបញ្ចប់ ប៉ុន្តែការដកទ័ពមិនមែនត្រឹមតែជាសម្តីសន្យាទេ តែជាសកម្មភាព»។ ប្រមុខរដ្ឋអាស៊ែបៃហ្សង់បញ្ជាក់ថា ប្រទេសលោកមានបំណងរំដោះទឹកដី Nagorno-Karabakh ដែលបច្ចុប្បន្នត្រូវបានគ្រប់គ្រងដោយក្រុមផ្ដាច់ខ្លួនដែលជាជនដើមភាគតិចអាមេនី។
លោកបន្ថែមថា ក្នុងរយៈពេលជិត៣០ឆ្នាំចុងក្រោយ សហគមន៍អន្តរជាតិមិនអាចអនុវត្តសេចក្តីសម្រេចរបស់អង្គការសហប្រជាជាតិ ឬដាក់សម្ពាធលើអាមេនីឲ្យប្រគល់ទឹកដីនេះមកអាស៊ែបៃហ្សង់វិញ។ អត្ថន័យ នៃសុន្ទរកថារបស់ប្រមុខរដ្ឋអាស៊ែបៃហ្សង់បង្ហាញច្បាស់ណាស់ថា ការប្រយុទ្ធគ្នានេះមិនទាន់អាចមានបទឈប់បាញ់បន្ទាន់មួយដូចអ្វីដែលអឺរ៉ុប និងសហប្រធានក្រុមមីនស្កិ៍ ដែលមានបារាំង រុស្ស៊ី និងអាមេរិក ទាមទារឡើយ។
តបទៅនឹងការថ្លែងរបស់ប្រធានាធិបតីអាស៊ែបៃហ្សង់ មន្ត្រីក្រសួងការពារជាតិអាមេនី និងជាអ្នកជំនាញយោធា លោក Artsrun Hovhannisyan គិតថា ពុំមានគ្រោះថ្នាក់អ្វីសម្រាប់អាមេនីឡើយ ប៉ុន្តែលោកឆ្លៀតរំឭកថា ប្រទេសទាំង២កំពុងធ្វើសង្គ្រាមជាមួយគ្នា។ នេះយោងតាមទីភ្នាក់ងារព័ត៌មាន Reuters។
ការប្រយុទ្ធគ្នាចាប់តាំងពីថ្ងៃ២៨ ខែកញ្ញាមក នាំឲ្យគេបារម្ភចំពោះស្ថិរភាពក្នុងតំបន់កូកាស ដែលមានបំពង់ប្រេងនិងឧស្ម័នហូរកាត់។ ក្រៅតែពីនេះគេក៏ខ្លាចផងដែរការទាញមហាអំណាចតំបន់ ដូចជាតួកគី និងរុស្ស៊ីឲ្យលូកដៃចូលដោយផ្ទាល់ក្នុងការប្រយុទ្ធគ្នានេះ។ តួកគី ជាសម្ព័ន្ធមិត្តរបស់អាស៊ែបៃហ្សង់ ឯរុស្ស៊ី មានកិច្ចព្រមព្រៀងការពារគ្នាទៅវិញទៅមកជាមួយអាមេនី ក្រោមក្របខណ្ឌអង្គការសន្ធិសញ្ញាសន្តិសុខសមូហភាព(CSTO)។
ទោះជាប្រយុទ្ធគ្នា បានជាង១សប្តាហ៍ក្តី កងទ័ពអាស៊ែបៃហ្សង់មិនទាន់វាយប្រហារចូលទន្ទ្រានដីអាមេនី នៅឡើយទេ។ អាស៊ែបៃហ្សង់ បើកប្រតិបត្តិការយោធាក្នុងទឹកដីរបស់ខ្លួន ដើម្បីកាន់កាប់យកតំបន់ Nagorno-Karabakh ដែលគាំទ្រដោយអាមេនីប៉ុណ្ណោះ។ បើប្រតិបត្តិការយោធានៅតែបន្ត គេបារម្ភខ្លាចក្រែងកងទ័ពទាំងពីរប្រទេសប្រឈមមុខគ្នាដោយផ្ទាល់។
ជម្លោះក្នុងតំបន់ផ្តាច់ទឹកដី Nagorno-Karabakh ផ្ទុះឡើងក្រោយការរលាយទៅនៃសហភាពសូវៀត។ នៅឆ្នាំ១៩៩៤ អាមេនី និងអាស៊ែបៃហ្សង់សម្រេចបានបទឈប់បាញ់ក្រោមការជ្រោមជ្រែងរបស់សហប្រធានក្រុមមីនស្កិ៍ បញ្ចប់សង្គ្រាមដែលបណ្តាលឲ្យមនុស្សស្លាប់៣ម៉ឺននាក់៕
Tag:
អាមេនី
អាស៊ែបៃហ្សង់
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
