អន្តរជាតិ
ថៃ៖ គ្រួសារជនរងគ្រោះ រំឭកខួប៤៤ឆ្នាំការសម្លាប់រង្គាលនៅសាកលវិទ្យាល័យ Thammasat
រូបថតព្រឹត្តិការណ៍សម្លាប់រង្គាលថ្ងៃទី៦ ខែតុលា ឆ្នាំ១៩៧៦។ រូបភាព៖ AFP
×![]()
នៅថ្ងៃទី៦ ខែតុលា ក្រុមគ្រួសារនិស្សិតដែលបាត់បង់ជីវិត ក្នុងហេតុការណ៍សម្លាប់រង្គាលនៅសាកលវិទ្យាល័យThammasat បានជួបជុំប្រារព្ធពិធីបុណ្យ និងដាក់កម្រងផ្កាឧទ្ទិសដល់អ្នកដែលបាត់បង់ជីវិតកាលពី៤៤ឆ្នាំមុន។ ការរំឭកខួបឆ្នាំ២០២០នេះ ធ្វើឡើងខណៈចលនានិស្សិតនៅសាកលវិទ្យាល័យមួយនេះ កំពុងតវ៉ាប្រឆាំងរបបដឹកនាំដឹកនាំសព្វថ្ងៃ។
ព្រឹត្តិការណ៍នៅថ្ងៃទី៦ ខែតុលា ឆ្នាំ១៩៧៦ នៅសាកលវិទ្យាល័យThammasat នៅតែបន្តដិតជាប់ក្នុងការចង់ចាំរបស់អ្នកដែលរួចរស់មានជីវិត ក៏ដូចជាសកម្មជនប្រជាធិបតយ្យថៃ ជាពិសេសក្នុងបរិបទដែលនិស្សិតថៃធ្វើបាតុកម្មសារជាថ្មីទាមទារឲ្យលោក ប្រាយុទ្ធ ចាន់អូចា នាយករដ្ឋមន្ត្រីថៃចុះចេញពីតំណែង និងកំណែទម្រង់របបរាជានិយម។
ក្នុងហេតុការណ៍សម្លាប់រង្គាលនៅសាកលវិទ្យាល័យ Thammasat ក្រុមយោធា និងអ្នកគាំទ្ររបបរាជានិយមបាញ់ប្រហារ ចងព្យួរនិស្សិតភ្ជាប់ដើមឈើ និងវាយតបលើនិស្សិតក្នុងបរិវេណសាកលវិទ្យាល័យល្បីឈ្មោះមួយនេះ។ កន្លងទៅ រដ្ឋាភិបាលថៃ អះអាងថា មនុស្សស្លាប់មាន៤៥នាក់ របួស១៤៥នាក់ និងចាប់ខ្លួនជាង៣ពាន់នាក់។ ប៉ុន្តែសម្រាប់អ្នកដែលរួចរស់មានជីវិត ចំនួនអ្នកស្លាប់មានច្រើនជាង១០០នាក់។
មេធាវីការពារក្រុមយុវជនប្រជាធិបតេយ្យ លោក Krisadang Nutcharut ដែលជាអ្នករួចខ្លួនមានជីវិត អះអាងថា ហេតុការណ៍នោះ មិនមែនជាការប្រយុទ្ធស្មើគ្នាទេ តែជាការសម្លាប់រង្គាល ខណៈនិស្សិតមិនបានវាយតបតឡើយ ព្រោះមិនមានកាំភ្លើង។ ដោយចាត់ទុកថ្ងៃទី៦ ខែតុលា ឆ្នាំ១៩៧៦ ជាថ្ងៃអាប់អួរបំផុតក្នុងប្រវត្តិសាស្ត្រថៃ បុរសវ័យ៦២ឆ្នាំ បន្តថា ការធ្វើបាតុកម្មសន្តិវិធីរបស់និស្សិតសព្វថ្ងៃ បានរំឭកលោកពីព្រឹត្តិការណ៍នៅឆ្នាំ១៩៧៦។
«ខ្ញុំត្រូវបង្រៀនយុវជនជំនាន់ក្រោយ មិនឲ្យមើលស្រាលក្រុមយោធា ដោយសារពួកគេគ្មានសេចក្តីសណ្តោសប្រណីឡើយ»។ លោក Krisadang និយាយបែបនេះ ដោយស្រង់សម្ដីដោយទីភ្នាក់ងារព័ត៌មាន AFP ។
បាតុកម្មនៅឆ្នាំ១៩៧៦ ធ្វើឡើងដោយនិស្សិតថៃ ទាមទារឲ្យឧត្តមសេនីយ៍ Thanom Kittikachorn ដែលត្រូវបានទម្លាក់ចេញពីអំណាច និរទេសខ្លួនចេញពីប្រទេស។ លោក Krisadang រំឭកថា នៅថ្ងៃទី៦ ខែតុលា ឆ្នាំ១៩៧៦ ក្រុមយោធា និងអ្នកគាំទ្រព្រះមហាក្សត្រហ៊ុំព័ទ្ធសាកលវិទ្យាល័យ បាញ់រះ បោះគ្រាប់បែក ចាក់សម្លាប់និស្សិត និងអូសនិស្សិតដែលព្រមប្រគល់ខ្លួនទៅសម្លាប់នៅទីលានSanam Luang ដោយស្រែកបន្ទរថា ជាក្រុមកុម្មុយនីស្តបះបោរផ្តួលរំលំរបបរាជានិយម។
ការស្វែងរកអ្នកទទួលខុសត្រូវ និងការពិតនៅពីក្រោយហេតុការណ៍នៅសាកលវិទ្យាល័យThammasat ជារឿងរសើបក្នុងសង្គមថៃ ហើយមនុស្សជំនាន់មុនពុំមានអ្នកណាចង់និយាយឡើយ។ ប៉ុន្តែសម្រាប់ប្រជាជនថៃជំនាន់ថ្មី ពិសេសសិស្សនិងនិស្សិតចង់បានចម្លើយទៅនឹងសំណួរដែលប្រវត្ថិសាស្ត្រមិនបានបង្រៀន។ នេះជាការលើកឡើងរបស់លោកស្រីPuangthong Pawakapan សហប្រធានគម្រោងអនឡាញ ដែលរក្សាទុកឯកសារស្តីព្រឹត្តិការណ៍ថ្ងៃ៦ ខែតុលា។
Tag:
ថៃ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
