COVID-19
អន្តរជាតិ
លោក ដូណាល់ ត្រាំ ប្រធានាធិបតីអាមេរិក ។ រូបភាព៖ AFP
×![]()
ប្រធានាធិបតីអាមេរិក ដូណាល់ ត្រាំ បានសម្រេចផ្អាកចរចាជាមួយបក្សប្រជាធិបតេយ្យលើកញ្ចប់ជំនួយសេដ្ឋកិច្ចកូវីដ-១៩ ហើយអះអាងថានឹងបន្តជជែកឡើងវិញក្រោយបោះឆ្នោតរួចរាល់។ លោកព្យាករថា លោកនឹងឈ្នះការបោះឆ្នោតនាខែក្រោយ ហើយប្តេជ្ញាអនុម័តសេចក្តីព្រាងច្បាប់នេះតែម្ដង។ បេក្ខជនប្រធានាធិបតិបក្សប្រជាធិតេយ្យ ចូ បៃឌិន រិះគន់លោកត្រាំថាបែរខ្នងដាក់ពលរដ្ឋអាមេរិកនៅគ្រាលំបាក។
លោក ដូណាល់ ត្រាំ ដែលកំពុងបន្តសម្រាកព្យាបាលជំងឺកូវីដ-១៩នៅសេតវិមានអាមេរិក បានប្រកាសផ្អាកចរចាជាមួយសមាជិកសភាបក្សប្រជាធិបតេយ្យជុំវិញសេចក្តីព្រាងច្បាប់ជំនួយកូវីដ-១៩ រហូតដល់ការបោះឆ្នោតចប់ ។ លោក ត្រាំ ដែលឆ្លងកូវីដ-១៩កាលពីថ្ងៃ១ ខែតុលា បានត្រលប់ពីពេទ្យវិញក្រោយសម្រាកព្យាបាលនៅទីនោះអស់៣យប់មក។
«ខ្ញុំបានបញ្ជាឲ្យអ្នកតំណាងខ្ញុំបញ្ឈប់ការចរចា រហូតការបោះឆ្នោតចប់។ ភ្លាមៗក្រោយខ្ញុំឈ្នះ យើងនឹងអនុម័តសេចក្តីព្រាងច្បាប់ជំនួយដ៏សំខាន់មួយនេះ ដែលផ្តោតសំខាន់លើអាជីវកម្មធុនតូច និងប្រជាជនអាមេរិកដែលប្រឹងប្រែងធ្វើការ»។ លោក ត្រាំ សរសេរបែបនេះ លើបណ្ដាញសង្គម Twitter។
កិច្ចចរចាលើជំនួយសេដ្ឋកិច្ចកូវីដ-១៩ រវាងប្រធានសភាអាមេរិក អ្នកស្រី ណាន់ស៊ី ផេឡូស៊ី និងរដ្ឋមន្ត្រីរតនាគារ លោក Steven Mnuchin បានចាប់ផ្ដើមក្នុងខែកក្កដា។ ទង្វើរបស់លោកត្រាំ ទទួលរងការរិះគន់ពីសំណាក់ថ្នាក់ដឹកនាំនៃបក្សប្រជាធិតេយ្យ ដែលអះអាងថា ជំនួយនេះគឺសំខាន់ដើម្បីជួយពលរដ្ឋអាមេរិករាប់លាននាក់ដែលបាត់បង់ការងារធ្វើដោយសារវិបត្តិសុខាភិបាល។
ទាក់ទិនដំណឹងនេះ អ្នកស្រី ផេឡូស៊ី បានបញ្ជាក់ថា ប្រធានាធិបតី ត្រាំ បានបង្ហាញចរិតពិតរបស់លោក ដោយគិតតែប្រយោជន៍ខ្លួនជាងប្រទេសជាតិ។ ចំណែកលោក បៃឌិន បានរិះគន់លោក ត្រាំ ថាបែរខ្នងដាក់ពលរដ្ឋអាមេរិកនៅគ្រា ដែលពួកគេរងទុក្ខលំបាក។
ក្រៅពីអ្នកទាំង២ ក៏មានសមាជិកសភាមកពីសាធារណរដ្ឋម្នាក់ផងដែរ ដែលរិះគន់លោកត្រាំ។ លោក John Katko បានសរសេរលើTwitterដូច្នេះថា៖«ខណៈជីវិតប្រជាជនកំពុងរងគ្រោះ យើងមិនអាចបញ្ឈប់ការចរចាលើកញ្ចប់ថវិកាជំនួយបានឡើយ។ ខ្ញុំទទូចឲ្យលោកប្រធានាធិបតីគិតឡើងវិញចំពោះការសម្រេចចិត្តនេះ»។
មែនទែនទៅ ចាប់តាំងពីបើកកិច្ចចរចាលើកញ្ចប់ជំនួយកូវីដ-១៩មក ទាំងសមាជិកសភាបក្សសាធារណរដ្ឋនិងបក្សប្រជាធិតេយ្យ និយាយមិនសូវត្រូវគ្នាសោះ។ ខាងសេតវិមានរបស់លោក ត្រាំ ប្រកាសថា ខ្លួននឹងគាំទ្រកញ្ចប់ថវិកាជំនួយកូវីដ-១៩ ក្នុងទំហំទឹកប្រាក់ ១,៦ទ្រីលានដុល្លារ តែអ្នកស្រី ផេឡូស៊ី ចង់ឲ្យរដ្ឋាភិបាលបញ្ចេញជំនួយច្រើនជាងនេះ។
កាលពីសប្ដាហ៍មុន សភាតំណាងអាមេរិកដែលគ្រប់គ្រងដោយបក្សប្រជាធិតេយ្យ បានអនុម័តសេចក្តីព្រាងច្បាប់ជំនួយកូវីដ-១៩ ប្រមាណ២,២ទ្រីលានដុល្លារ ទោះបីដឹងថា វានឹងពុំអាចឆ្លងផុតព្រឹទ្ធសភាដែលក្ដោបក្ដាប់ដោយបក្សសាធារណរដ្ឋក្ដី។ ប្រធានមតិភាគច្រើនព្រឹទ្ធសភាអាមេរិក លោក Mitch McConnell បានបង្ហាញជំហរថា លោកនឹងមិនគាំទ្រសេចក្តីព្រាងច្បាប់ទាំងឡាយណាដែលលើស២ទ្រីលានដុល្លារ៕
Tag:
សហរដ្ឋអាមេរិក
ដូណាល់ ត្រាំ
COVID-19
© រក្សាសិទ្ធិដោយ thmeythmey.com
