អន្តរជាតិ
លោក ត្រាំ ប្រាប់ពលរដ្ឋអាមេរិកកុំឲ្យខ្លាចកូវីដ-១៩ ក្រោយចេញពីពេទ្យវិញ ប្រធានាធិបតី ដូណាល់ ត្រាំ ឈរនៅសេតវិមានអាមេរិក ក្រោយចេញពីពេទ្យវិញ បន្ទាប់ពីសម្រាកព្យាបាលអស់៧២ម៉ោងរួចមក។ រូបភាព AP
× ប្រធានាធិបតី ដូណាល់ ត្រាំ ប្រាប់ឲ្យប្រជាជនអាមេរិកកុំភ័យខ្លាចជំងឺកូវីដ-១៩ ក្រោយលោកវិលត្រលប់ទៅកាន់សេតវិមានអាមេរិកវិញ នៅថ្ងៃទី ៥ ខែតុលា។ លោកត្រាំបានចេញពីពេទ្យ បន្ទាប់ពីសម្រាកព្យាបាលអស់ពេល៧២ម៉ោងរួច។ ពីសេតវិមាន លោក ត្រាំ ក៏ទទូចឲ្យពលរដ្ឋខ្លួនចេញធ្វើសកម្មភាពប្រចាំថ្ងៃនៅខាងក្រៅ តែត្រូវប្រុងប្រយ័ត្នជានិច្ច។
«កុំបណ្ដោយឲ្យវា(កូវីដ-១៩)គ្របដណ្ដប់អ្នក។ កុំភ័យខ្លាចវា»។ លោក ដូណាល់ ត្រាំ និយាយបែបនេះក្នុងវីដេអូមួយ ភ្លាមៗក្រោយលោកទៅដល់សេតវិមានវិញ។ លោកសង្កត់ធ្ងន់ថា៖«ចេញទៅខាងក្រៅ តែត្រូវប្រុងប្រយ័ត្ន»។
និយាយទាំងគ្មានពាក់ម៉ាស់ ប្រធានាធិបតី បញ្ជាក់ថា លោកមានអារម្មណ៍មិនល្អ នៅពេលលោកត្រូវផ្លាស់ទៅសម្រាកព្យាបាលនៅមន្ទីរពេទ្យយោធា Walter Reed ព្រោះលោកត្រូវតែឈរនៅជួរមុខដើម្បីដឹកនាំប្រទេសទោះមានហានិភ័យនិងគ្រោះថ្នាក់ក៏ដោយក្តី។ យ៉ាងណា លោកអះអាងថា លោករៀនសូត្របានពីច្រើនពីជំងឺកូវីដ-១៩ ហើយឥឡូវ លោកមានសុខភាពល្អប្រសើរ ហើយប្រហែលជាមានប្រព័ន្ធស៊ាំ។ ត្រង់នេះ លោក ត្រាំ មិននិយាយឲ្យបានច្បាស់ឡើយ។
លោក ត្រាំ ដែលនឹងប្រជែងជាមួយលោកចូ បៃឌិន បេក្ខជនប្រធានាធិបតីបក្សប្រជាធិតេយ្យ ក្នុងការបោះឆ្នោតនាថ្ងៃទី៣ ខែវិច្ឆិកា ត្រូវបានបញ្ជូនទៅកាន់មន្ទីរពេទ្យនៅថ្ងៃទី២ ខែតុលា ក្រោយឆ្លងកូវីដ-១៩។ ជំងឺនេះបានសម្លាប់មនុស្សជាង១លាននាក់ហើយនៅទូទាំងពិភពលោក ហើយជាង២១ម៉ឺននាក់នាក់ក្នុងសហរដ្ឋអាមេរិក ដែលជាតួលេខខ្ពស់ជាងប្រទេសណាៗទាំងអស់។
ប្រាប់សារព័ត៌មានមួយនៅរដ្ឋ Florida ខណៈធ្វើយុទ្ធនាការនៅរដ្ឋដ៏សំខាន់មួយនេះ លោក បៃឌិន បានរិះគន់លោក ត្រាំ ដែលនិយាយថា ពលរដ្ឋអាមេរិកមិនគួរភ័យខ្លាចជំងឺ ឬបណ្ដោយឲ្យជំងឺគ្របដណ្ដប់ជីវិតពួកគេ។ លោកនិយាយបែបឌឺដងលោក ត្រាំ ថា គួរតែប្រាប់បែបនេះទៅដល់មនុស្សទាំង ២០៥ ០០គ្រួសារ ដែលបាត់បង់សមាជិកគ្រួសារពួកគេដោយសារកូវីដ-១៩ ។
បន្ថែមពីនេះ អតីតអនុប្រធានាធិបតីអាមេរិករូបនេះ ក៏រិះគន់លោក ត្រាំ រឿងព្រងើយកន្ដើយចំពោះសារសំខាន់នៃការពាក់ម៉ាស់ ដោយលោកចាត់ទុកម៉ាស់ទាំងនេះ ជារបស់សំខាន់ក្នុងការជួយជីវិត និងបង្ការការរាលដាលជំងឺ។ លោកបន្តថា នេះគឺជាក្តីកង្វល់ដ៏ធំមួយ ហើយលោកសង្ឃឹមថា គ្មានពលរដ្ឋអាមេរិកណាមួយធ្វើតាមទង្វើលោក ត្រាំ។
នៅសេតវិមាន មនុស្សនៅជុំវិញលោក ត្រាំ បានរកឃើញថា ឆ្លងជំងឺកូវីដ-១៩ជាបន្តបន្ទាប់។ នៅថ្ងៃទី ៥ ខែតុលា អ្នកស្រី Kayleigh McEnany រដ្ឋមន្ត្រីព័ត៌មានអាមេរិក បានអះអាងថា អ្នកស្រីមានលទ្ធផលតេស្តវិជ្ជមានសម្រាប់កូវីដ-១៩។ ក្រៅពីអ្នកស្រី McEnany លោក Chad Gilmartin និង Karoline Leavit ដែលធ្វើការនៅការិយាល័យព័ត៌មានសេតវិមាន ក៏តេស្តវិជ្ជមានផងដែរ៕
Tag:
សហរដ្ឋអាមេរិក
ដូណាល់ ត្រាំ
កូវីដ-១៩
COVID-19
© រក្សាសិទ្ធិដោយ thmeythmey.com