ជាតិ
សង្គមជាតិ
អ្នកគ្រូជីវវិទ្យា កែវ យុទ្ធារី៖ សិស្សត្រូវទន្ទេញមេរៀន អនុវត្តលំហាត់ និង ស្វះស្វែងសួរគ្រូ ទើបបាននិទ្ទេសល្អ
× ភ្នំពេញ៖ សល់ជាង២ខែទៀត នឹងដល់ថ្ងៃប្រឡងសញ្ញាបត្រទុតិយភូមិ (បាក់ឌុប)។ អ្នកស្រី កែវ យុទ្ធារី ដែលជាគ្រូជីវវិទ្យានៅវិទ្យាល័យបាក់ទូកបានណែនាំឲ្យសិស្សមើលមេរៀន និងអនុវត្តលំហាត់ដែលបានរៀនជាមួយគ្រូនៅតាមសាលារៀនជារៀងរាល់ថ្ងៃ។ រាល់ចំណុចណាដែលសិស្សមិនទាន់យល់ អាចយកមកសួរគ្រូបន្ថែម ទើបពួកគេមានទុនក្នុងការប្រឡងបាក់ឌុបទទួលបាននិទ្ទេសល្អ។
សូមតាមដានវីដេអូសម្ភាសរវាងកញ្ញា សៅ សុខអេង អ្នកសារព័ត៌មានថ្មីៗ និងអ្នកគ្រូ កែវ យុទ្ធារី ផ្នែកជីវវិទ្យានៅវិទ្យាល័យបាក់ទូកដូចតទៅ៖
បង្រៀនផ្នែកជីវវិទ្យានៅវិទ្យាល័យបាក់ទូកអស់រយៈពេលជាង១៨ឆ្នាំមកហើយ អ្នកគ្រូ កែវ យុទ្ធារី បានណែនាំឲ្យសិស្សដូច្នេះថា៖«សិស្សត្រូវយកមេរៀនទាំងអស់មកសង្ខេប។ យើងត្រូវយកវិញ្ញាសាដែលបានចេញប្រឡងនៅឆ្នាំមុនៗ យកមកធ្វើឡើងវិញ។ កន្លែងណាដែលមិនចេះ អាចយកមកសួរគ្រូនៅក្នុងថ្នាក់បាន។ បើសិស្សធ្វើហើយ អត់ចេះចម្លើយហ្នឹង យើងអាចយកមកសួរគ្រូត្រង់កន្លែងឆ្ងល់បាន»។
អ្នកគ្រូ កែវ យុទ្ធារី បានជំរុញឲ្យសិស្សានុសិស្សទន្ទេញមេរៀនជីវវិទ្យាឲ្យបានច្រើន។ អ្នកគ្រូ យុទ្ធារី មានប្រសាសន៍ដូច្នេះថា៖«ប៉ុន្មានឆ្នាំចុងក្រោយនេះ ចេញសំណួរមេរៀនច្រើនជាងលំហាត់។ អ៊ីចឹងគ្រប់ថ្នាក់ដែលខ្ញុំចូលត្រឡប់មកវិញហ្នឹង ខ្ញុំជួយរំលឹករូបមន្តទាំងអស់ ហើយឲ្យគាត់ទន្ទេញមេរៀន និងមើលសំណួរ។ មានសំណួរនៅក្នុងវិញ្ញាសាខ្លះមានចេញប្រឡងជាន់ឆ្នាំគ្នាដែរ ដោយសារសំណួរហ្នឹងវាល្អ។ អ៊ីចឹងមានតែឲ្យគាត់ខំប្រឹងរៀនដោយខ្លួនឯង។ គ្មានអ្នកណាជួយយើងបានជាជាងយើងជួយខ្លួនឯងទេ។ គ្រូគ្រាន់តែបានបង្ហាញកន្លែងនេះដែលរៀនទៅ ចេញប្រឡង»។
ពេលកៀកដល់ថ្ងៃប្រឡងបាក់ឌុប អ្នកគ្រូ យុទ្ធារី បានដាស់តឿនដល់សិស្សថែទាំសុខភាពឲ្យបានល្អ កុំបរិភោគអាហារណាដែលងាយនឹងប៉ះពាល់ដល់សុខភាព និងជៀសវាងកុំដើរទៅណាឆ្ងាយដែលបង្កឲ្យមានគ្រោះហានិភ័យ និងឆ្លងជំងឺកូវីដ-១៩។
ខណៈពេលដែលសិស្សានុសិស្សប្រឡងបាក់ឌុបលើមុខវិជ្ជាជីវវិទ្យា អ្នកគ្រូ យុទ្ធារី បានណែនាំឲ្យសិស្សធ្វើលំហាត់ និងសំណួរណាដែលខ្លួនចេះធ្វើមុន។ អ្នកគ្រូ បានប្រាប់ដូច្នេះថា៖«នៅពេលដែលយើងប្រឡងយើងកុំគិតថាសំណួរណាបានពិន្ទុច្រើនបានយើងធ្វើ សំណួរណាដែលយើងចេះយើងបង់លេខ ហើយធ្វើភ្លាម។ ហើយកុំចាំធ្វើសំណួរនេះពិន្ទុតិចចាំធ្វើក្រោយ បើយើងចាំធ្វើអ៊ីចឹង យើងអាចនឹងភ្លេច»៕
Tag:
បាក់ឌុប
សិស្ស
គ្រូ
អប់រំ
© រក្សាសិទ្ធិដោយ thmeythmey.com