COVID-19
សង្គមអន្តរជាតិ
អន្តរជាតិ
កម្មវិធីស្បៀងអាហារពិភពលោក អំពាវនាវរកលុយ៦,៨ពាន់លានដុល្លារដើម្បីបញ្ចៀសការអត់ឃ្លាន
លោក David Beasley នាយកប្រតិបត្តិកម្មវិធីស្បៀងអាហារពិភពលោក។ រូបភាព៖ AFP
×![]()
កម្មវិធីស្បៀងអាហារពិភពលោក (WFP) ត្រូវការរៃអង្គាសថវិកា ៦,៨ពាន់លានដុល្លារក្នុងពេល៦ខែខាងមុខ ដើម្បីបញ្ចៀសភាពអត់ឃ្លានអំឡុងវិបត្តិកូវីដ-១៩។ ទីភ្នាក់ងាររបស់អង្គការសហប្រជាជាតិមួយនេះបញ្ជាក់បែបនេះនៅថ្ងៃទី ១៣ ខែតុលា។ 
កម្មវិធីស្បៀងអាហារពិភពលោក ដែលឈ្នះពានរង្វាន់ណូបែលសន្តិភាពកាលពីសប្ដាហ៍មុន បានអះអាងថា មកទល់ពេលនេះ ខ្លួនរៃអង្គាសបានប្រាក់១,៦ពាន់លានដុល្លារហើយ។ លោក David Beasley នាយកប្រតិបត្តិ WFP បានបញ្ជាក់ក្នុងសន្និសីទមួយដែលរៀបចំឡើងដោយអង្គការស្បៀងអាហារនិងកសិកម្ម (FAO) ដូច្នេះថា៖«យើងត្រូវរៃអង្គាសលុយច្រើនថែមទៀតដើម្បីឲ្យច្បាស់ថាយើងបញ្ចៀសអំពើអត់ឃ្លាន»។
តាមការចុះផ្សាយរបស់ទីភ្នាក់ងារព័ត៌មាន Reuters លោក Beasley កត់សម្គាល់ថា មនុស្ស៧លាននាក់បានបាត់បង់ជីវិតដោយសារអត់អាហារក្នុងឆ្នាំនេះ ខណៈជំងឺរាតត្បាតសកលកូវីដ-១៩ ដែលអាចធ្វើឲ្យតួលេខភាពអត់ឃ្លានកើនទ្វេដងទូទាំងពិភពលោក បានសម្លាប់មនុស្ស១លាននាក់។ លោកសង្កត់ធ្ងន់ទៀតថា ប្រសិនបើពិភពលោកមិនដោះស្រាយបញ្ហាជំងឺកូវីដ-១៩ដាច់ស្រេចទេនោះ អត្រាអ្នកស្លាប់ដោយសារភាពអត់ឃ្លាន អាចកើនឡើងចន្លោះពី៣ទៅ៥ដងឯណោះ។
កម្មវិធីស្បៀងអាហារពិភពលោកដែលមានមូលដ្ឋាននៅរដ្ឋធានីរ៉ូម នៃប្រទេសអ៊ីតាលី អះអាងថា ខ្លួនជួយមនុស្សប្រមាណ៩៧លាននាក់ក្នុងប្រទេស៨៨ ជារៀងរាល់ឆ្នាំ ហើយមនុស្សម្នាក់ក្នុងចំណោម៩នាក់ ពុំទាន់មានអាហារបរិភោគគ្រប់គ្រាន់ឡើយ។
ក្រោយថយចុះជាច្រើនទសវត្សរ៍ ភាពអត់ឃ្លានពិភពលោកបានកើនឡើងជាថ្មី ចាប់តាំងពីឆ្នាំ២០១៦ ដែលបង្កឡើងដោយជម្លោះ និងបម្រែបម្រួលអាកាសធាតុ។ ត្រង់នេះ លោក Beasley និយាយដូច្នេះថា «ប្រសិនបើអ្នកគិតអំពីទ្រព្យសម្បត្តិលើផែនដីថ្ងៃនេះ យើងពុំគួរមើលឃើញកូនក្មេងណាម្នាក់អត់អាហារ ឬស្លាប់ដោយសារអត់ឃ្លានឡើយ»។ ។
អំឡុងជំងឺរាតត្បាតសកលកូវីដ-១៩ កម្មវិធីស្បៀងអាហារពិភពលោក បានបញ្ជូនបរិក្ខារសុខាភិបាលទៅកាន់ប្រទេសជាង១២០ ហើយផ្ដល់សេវាកម្មដឹកជញ្ជូនដល់បុគ្គលិកមនុស្សធម៌តាមនាវាផងដែរ ជាពិសេសនៅកន្លែងដែលការហោះហើរមិនដំណើរការ៕
Tag:
កម្មវិធីស្បៀងអាហារ UN
កូវីដ-១៩
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
