សង្គមអន្តរជាតិ
អន្តរជាតិ
ក្រុមបាតុករថៃ ទុកពេល៣ថ្ងៃឲ្យលោក ប្រាយុទ្ធ ចុះចេញពីតំណែងនាយករដ្ឋមន្ត្រី បាតុកម្មទាមទារឲ្យនាយករដ្ឋមន្រ្តីថៃ លោកប្រាយុទ្ធ ចាន់អូចា ចុះចេញពីតំណែង និងកំណែទម្រង់ផ្សេងទៀត។ រូបភាព៖ បាងកកប៉ុស្តិ៍
× ក្រុមបាតុករថៃ នៅថ្ងៃទី២១ ខែតុលា បានកំណត់រយៈពេល ៣ថ្ងៃសម្រាប់លោក ប្រាយុទ្ធ ចាន់អូចា ប្រមុខរដ្ឋាភិបាលថៃ ចុះចេញពីតំណែង និងទម្លាក់បទចោទលើមេដឹកនាំបាតុកម្មផ្សេងទៀតដែលខ្លះកំពុងស្ថិតក្រោមការឃុំខ្លួន និងខ្លះនៅក្រៅឃុំបណ្ដោះអាសន្ន។ ការទាមទាររបស់ក្រុមបាតុករនេះ ធ្វើឡើងស្របពេលលោក ប្រាយុទ្ធ លើកឡើងពីលទ្ធភាពនៃការដកក្រឹត្យអាសន្ននៅក្នុងទីក្រុងបាងកក។
ថ្លែងនៅលើកញ្ចក់ទូរទស្សន៍ នាយករដ្ឋមន្ត្រីថៃ លោកប្រាយុទ្ធ ចាន់អូចា បញ្ជាក់ថា លោកនឹងបន្ធូរបន្ថយភាពតានតឹងនយោបាយនៅក្នុងទីក្រុងបាងកក។ បើតាមការអះអាងរបស់ប្រមុខរដ្ឋាភិបាលថៃ លោកកំពុងរៀបចំលើកចោលស្ថានភាពអាសន្នកម្រិតធ្ងន់នៅក្នុងទីក្រុងបាងកក ដែលបានដាក់នៅសប្តាហ៍មុន បើសិនបើគ្មានឧប្បទ្ទវហេតុហិង្សាកើតឡើង។ នេះបើតាមការចុះផ្សាយរបស់កាសែងបាងកកប៉ុស្តិ៍។
ទន្ទឹមនេះ លោក ប្រាយុទ្ធ បានទទូចឲ្យក្រុមបាតុករបញ្ឈប់ការធ្វើបាតុកម្ម និងជជែកដេញដោលគ្នាដោយសន្តិភាពវិញ ជាពិសេសគឺការជជែកដេញដោលគ្នានៅក្នុងសភាដែលគ្រោងបើកកិច្ចប្រជុំវិសមញ្ញនៅថ្ងៃទី២៦ ខែតុលាខាងមុខ។ ក្នុងន័យនេះ ប្រមុខរដ្ឋាភិបាល បានជំរុញឲ្យគ្រប់ភាគីទាំងអស់ កុំបង្កឲ្យមានកំហុសប្រវត្តិសាស្ត្រកើតឡើងម្តងទៀត។
ការឈានជើងថយមួយជំហានរបស់ភាគីរដ្ឋាភិបាលនេះ ធ្វើឡើងក្នុងគោលបំណងបន្ធូរបន្ថយសម្ពាធបាតុកម្មនៅក្នុងទីក្រុងបាងកក ដែលកំពុងមានពុះកញ្ជ្រោលខ្លាំង ដើម្បីទាមទារឲ្យលោកប្រាយុទ្ធចុះចេញពីតំណែង កំណែងទម្រង់ស្ថាប័នព្រះមហាក្សត្រ និងរដ្ឋធម្មនុញ្ញជាដើម។
យ៉ាងណាក៏ដោយ ការថយមួយជំហាននេះ គឺមិនទាន់គ្រប់គ្រាន់ឡើយសម្រាប់ក្រុមបាតុករថៃ។ ក្រុមបាតុករជាច្រើនពាន់នាក់ បានដើរតម្រង់ទៅវិមានរដ្ឋាភិបាលថៃ ដើម្បីដាក់ញត្តិឲ្យលោកប្រាយុទ្ធចុះចេញពីតំណែង ក្នុងរយៈពេល៣ថ្ងៃ។ «ប្រាយុទ្ធត្រូវតែចុះចេញពីតំណែងជាមុន ហើយនេះគឺជារឿងងាយស្រួលបំផុតដែលត្រូវធ្វើ»។ បាតុករថៃម្នាក់ ដែលបានចូលរួមក្នុងការដង្ហែញាតិទៅដាក់នៅវិមានរដ្ឋាភិបាលថៃ បានលើកឡើងបែបនេះ។
បន្ទាប់ពីមន្ត្រីរដ្ឋាភិបាលថៃទទួលលិខិតនោះ ក្រុមបាតុករបានអះអាងថា ខ្លួនទទួលបានជោគជ័យមួយជំហានទៀត។ បើតាមមេដឹកនាំបាតុកម្មថៃម្នាក់ កញ្ញា Patsaravalee Tanakitvibulpon បានបញ្ជាក់ថា គោលបំណងនៅថ្ងៃទី២១ ខែតុលា គឺទទួលបានជោគជ័យហើយ បន្ទាប់ពីមន្ត្រីរដ្ឋាភិបាលទទួលញាត្តិ។ ជាមួយគ្នាដែរ មេដឹកនាំបាតុកម្មរូបនេះ បានប្រកាសថា ខ្លួននឹងមិនបញ្ឈប់ឡើយ រហូតទាល់តែលោកប្រាយុទ្ធចុះចេញពីតំណែង។
សូមបញ្ជាក់ថា ប្រជាជនថៃជាច្រើនពាន់នាក់ បានចេញមកធ្វើបាតុកម្មជាបន្តបន្ទាប់ ចាប់តាំងពីរដ្ឋាភិបាលថៃប្រកាសក្រឹត្យអាសន្នកម្រិតធ្ងន់នៅក្នុងទីក្រុងបាងកកនៅសប្តាហ៍មុន។ បាតុកម្មនេះ បានឈានទៅដាក់ការប៉ះទង្គិចគ្នារវាងក្រុមបាតុករ និងកម្លាំងសមត្ថកិច្ចថែមទៀត។ ក្រឹត្យអាសន្ន មិនត្រូវបានគោរពឡើយ ដោយការជួបនៅតែមានដដែល ទាំងក្រុមប្រឆាំងរដ្ឋាភិបាល និងក្រុមគាំទ្ររាជានិយមផង។
© រក្សាសិទ្ធិដោយ thmeythmey.com