កីឡាអន្តរជាតិ
អន្តរជាតិ
Mascot ដែល Arsenal ផ្អាកការងារ នឹងត្រឡប់ទៅទីលានវិញ ក្រោយ Ozil ធានាប្រាក់ខែ
× តុក្កតា Mascot Gunnersaurus ដែលត្រូវក្លិប Arsenal បញ្ឈប់ពីការងារកាលពីខែមុន នឹងត្រឡប់ទៅកាន់ទីលានវិញ ក្រោយ Mesut Ozil ប្រកាសធានាផ្តល់ប្រាក់ខែឲ្យ។
លោក Jerry Quy ដែលជាអ្នកពាក់ Mascot អំឡុងពេលប្រកួតរបស់កាំភ្លើងធំនៅកីឡដ្ឋាន Emirates អស់រយៈពេល ២៧ ឆ្នាំមកហើយនោះ ត្រូវបានក្លិបមានមូលដ្ឋានក្រុងឡុងដ៍បញ្ចប់ពីការងារកាលពីខែតុលា ក្នុងចំណោមការងារចំនួន៥៥ ដើម្បីបន្ថយការចំណាយ ដែលបណ្តាលមកពីជំងឺ COVID-19។
ការបញ្ឈប់ការងាររបស់លោក Quy បានធ្វើឲ្យអ្នកគាំទ្ររបស់ Arsenal បង្ហាញការមិនពេញចិត្តតាមរយៈបណ្តាញសង្គម ខណៈក្លិបអះអាងថា Mascot នឹងត្រឡប់មកវិញនៅពេលមានការអនុញ្ញាតឲ្យមានអ្នកគាំទ្រចូលកីឡដ្ឋានវិញ។
យ៉ាងណាក៏ដោយ បន្ទាប់មានការរ៉ាប់រងលើប្រាក់ខែរបស់លោក Quy ពីសំណាក់កីឡាករសញ្ជាតិអាល្លឺម៉ង់ Ozil តុក្កតា Mascot Gunnersaurus នឹងត្រឡប់ចូលទីលានវិញ ក្រោយអវត្តមានរយៈពេលមួយខែ។
អ្នកគាំទ្រសង្ឃឹមថា Mascot នឹងបង្ហាញខ្លួនសារជាថ្មីនៅពេល Arsenal ទទួលភ្ញៀវ Wolverhampton Wanderers ក្នុងក្របខណ្ឌលីគកំពូលអង់គ្លេសនៅថ្ងៃទី២៨ ខែវិច្ឆិកា។ អ្នកគាំទ្រក៏រំពឹងដែរថា Mascot នឹងធ្វើឲ្យក្រុមលោក Mikel Arteta លេងក្នុងដីប្រសើរឡើងវិញ បន្ទាប់ពីក្រុមប្រកួតចាញ់ Leicester City ១-០ និង Aston Villa ៣-០ រួចមកហើយនោះ។
ស្របពេលនេះដែរ Gunnersaurus បានបង្ហោះរូបភាពរបស់ខ្លួន ដោយអះអាងថារូបគេនឹងត្រឡប់ទៅកីឡដ្ឋាន Emirates វិញឆាប់ៗនេះ៕
Tag:
Arsenal
Mesut Ozil
Mascot Gunnersaurus
© រក្សាសិទ្ធិដោយ thmeythmey.com