ក្រុមប្រឹក្សាការពាររដ្ឋធម្មនុញ្ញអ៊ីរ៉ង់ នៅថ្ងៃទី២ ខែធ្នូ បានអនុម័តច្បាប់ថ្មីមួយ ដែលអនុញ្ញាតឲ្យអ៊ីរ៉ង់ មានលទ្ធភាពចម្រាញ់សារធាតុអ៊ុយរ៉ានីញ៉ូមក្នុងបរិមាណជាច្រើនឡើងវិញ ប្រសិនបើភាគីអឺរ៉ុប មិនដកទណ្ឌកម្មលើអ៊ីរ៉ង់ក្នុងរយៈពេលពីរខែ។ យ៉ាងណាក៏ដោយ ចំណាត់ការ ដែលធ្វើឡើងដើម្បីឆ្លើយតបនឹងករណីឃាតកម្មលើអ្នកវិទ្យាសាស្ត្រនុយក្លែអ៊ែរអ៊ីរ៉ង់នេះ មិនត្រូវបានគាំទ្រពីភាគីរដ្ឋាភិបាលប្រធានាធិបតី ហាសាន់ រូហានី ឡើយ។
ឃាតកម្មលើលោកMohsen Fakhrizadeh ដែលអ៊ីស្រាលីចាត់ទុកថាជា «ប្រធានគម្រោងអាវុធនុយក្លេអ៊ែរអ៊ីរ៉ង់» បានធ្វើឲ្យសភាអ៊ីរ៉ង់ ទាមទារឲ្យរដ្ឋាភិបាលអ៊ីរ៉ង់ ផ្អាកការត្រួតពិនិត្យពីសហគមន៍អន្តរជាតិលើកម្មវិធីនុយក្លេអ៊ែររបស់ខ្លួន។ នៅថ្ងៃទី២ ខែធ្នូ កន្លងទៅ សភាអ៊ីរ៉ង់ បានអនុម័តសេចក្តីស្នើច្បាប់យុទ្ធសាស្ត្រដើម្បីលុបចោលទណ្ឌកម្ម។
នីតិវិធីបន្ទាប់ សេចក្តីស្នើច្បាប់នេះ ត្រូវធ្លាក់ទៅលើតុក្រុមប្រឹក្សាការពាររដ្ឋធម្មនុញ្ញអ៊ីរ៉ង់ ដែលមានតួនាទីពិនិត្យមើល និងបកស្រាយច្បាប់ ឬសេចក្តីស្នើច្បាប់ ថាតើច្បាប់ ឬសេចក្តីស្នើច្បាប់ទាំងនោះ ស្របតាមរដ្ឋធម្មនុញ្ញអ៊ីរ៉ង់ ឬច្បាប់ឥស្លាមនិកាយស៊ីអ៊ីតឬអត់? អ្នកនាំពាក្យក្រុមប្រឹក្សាលោក Abbas Ali Kadkhodaei ដែលត្រូវបានស្រង់សម្តីដោយសារព័ត៌មាន Iran Press និយាយថា ក្រុមប្រឹក្សា បានពិនិត្យរួចហើយថា សេចក្តីស្នើច្បាប់នេះ មិនផ្ទុយនឹងរដ្ឋធម្មនុញ្ញឡើយ។
បន្ទាប់ពីការយល់ព្រមរបស់ក្រុមប្រឹក្សាការពាររដ្ឋធម្មនុញ្ញ សេចក្តីស្នើច្បាប់ខាងលើ នឹងបញ្ជូនទៅប្រធានាធិបតីអ៊ីរ៉ង់ លោកHassan Rouhani ដើម្បីចុះហត្ថលេខាប្រើប្រាស់។ ប្រធានាធិបតីមានរយៈពេល ៥ថ្ងៃ (ថ្ងៃធ្វើការ) ដើម្បីប្រកាសឲ្យប្រើច្បាប់នេះ។ សំណើច្បាប់នេះ នឹងជំរុញឲ្យរដ្ឋាភិបាលអ៊ីរ៉ង់ ផ្អាកការគោរពដោយស្ម័គ្រចិត្តលើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ និងបង្កើនការចម្រាញ់សារធាតុអ៊ុយរ៉ានីញ៉ូមឡើងវិញ។ នេះបើតាមការចុះផ្សាយរបស់ទីភ្នាក់ងារព័ត៌មាន AP។
ច្បាប់យុទ្ធសាស្ត្រនេះ បានដាក់កម្រិតឲ្យប្រទេសអឺរ៉ុប ដែលជាភាគីនៃកិច្ចព្រមព្រៀងនុយក្លេអ៊ែរអ៊ីរ៉ង់ ត្រឹមរយៈពេល ២ខែប៉ុណ្ណោះ ដើម្បីលុបចោលទណ្ឌកម្ម ស្តារទំនាក់ទំនងវិស័យធនាគារវិញ និងលុបចោលរបាំងពន្ធគយលើការនាំចេញប្រេងរបស់អ៊ីរ៉ង់។ ប្រសិនបើផុតរយៈពេលនេះ អ៊ីរ៉ង់ អាចត្រលប់ទៅចម្រាញ់សារធាតុអ៊ុយរ៉ានីញ៉ូមយ៉ាងហោចណាស់ ១២០គីឡូក្រាម ឬ២០ភាគរយក្នុងមួយឆ្នាំឡើងវិញ និងដកចោលការត្រួតពិនិត្យរបស់អង្គការថាមពលអាតូមិចអន្តរជាតិ (IAEA) ជាដើម។
បើផ្អែកតាម កិច្ចព្រមព្រៀងសកម្មភាពដ៏ទូលំទូលាយរួមឆ្នាំ២០១៥ (JCPOA) អ៊ីរ៉ង់មិនអាចចម្រាញ់សារធាតុអ៊ុយរ៉ានីញ៉ូមឲ្យលើស៣,៦៧ភាគរយ ដែលអាចប្រើប្រាស់ក្នុងគោលដៅស៊ីវិល ដូចជាវិស័យថាមពល។ នៅក្នុងឆ្នាំ ២០១៩ អ៊ីរ៉ង់ បានបំពានកិច្ចព្រមព្រៀងនេះ ដោយបង្កើនការចម្រាញ់សារធាតុអ៊ុយរ៉ានីញ៉ូមទៅ ៤,៥ភាគរយទៅហើយ។
យ៉ាងណាក៏ដោយ សេចក្ដីស្នើច្បាប់អ៊ីរ៉ង់ថ្មីនេះ មិនទទួលបានការពេញចិត្តពីរដ្ឋាភិបាលអ៊ីរ៉ង់ឡើយ ព្រោះវានឹងដាក់សម្ពាធលើរដ្ឋាភិបាល។ មុនច្បាប់យុទ្ធសាស្ត្រដើម្បីលុបចោលទណ្ឌកម្ម ធ្លាក់លើតុក្រុមប្រឹក្សាការពារដ្ឋធម្មនុញ្ញ លោក ហាសាន់ រូហានី ប្រធានាធិបតីអ៊ីរ៉ង់ បានជំទាស់ថា ច្បាប់នេះ នឹងធ្វើឲ្យប៉ះពាល់ដល់កិច្ចខិតខំការទូតអ៊ីរ៉ង់ដើម្បីស្តារកិច្ចព្រមព្រៀងនុយក្លេអ៊ែរឡើងវិញ និងការបន្ធូរបន្ថយទណ្ឌកម្មលើអ៊ីរ៉ង់។
ចំណាត់ការបែបនេះ ក៏បង្កឲ្យមានផលវិបាកដល់គោលនយោបាយការបរទេសរបស់ប្រធានាធិបតីជាប់ឆ្នោតអាមេរិក លោក ចូ បៃឌិ ក្នុងការស្តារទំនាក់ទំនងអាមេរិក និងអ៊ីរ៉ង់ឡើងវិញ។ ទំនាក់ទំនងទ្វេភាគីរវាងក្រុងវ៉ាស៊ីនតោន និងតេហេរ៉ង់ បានធ្លាក់ចុះយ៉ាងខ្លាំងក្រោមការដឹកនាំរបស់ប្រធានាធិបតីអាមេរិកដូណាល់ ត្រាំ ដោយសារការដាក់ទណ្ឌកម្ម ការបាញ់សម្លាប់មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីរ៉ង់ Qasem Soleimani និងការដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ជាដើម៕