អន្តរជាតិ
ចិន ថ្កោលទោសអាមេរិកជុំវិញការដាក់ទណ្ឌកម្មមន្ត្រីជាន់ខ្ពស់សភាចំនួន១៤នាក់
លោកស្រី Hua Chunying អ្នកនាំពាក្យក្រសួងការបរទេសចិន នៅក្នុងសន្និសីទសារព័ត៌មាន នៅថ្ងៃទី៨ ខែធ្នូ ឆ្នាំ ២០២០។ រូបភាព ក្រសួងការបរទេសចិន
×![]()
ដោយ: ធៀន ភារិន្ទ
រដ្ឋាភិបាលក្រុងប៉េកាំង នៅថ្ងៃទី៨ ខែធ្នូ បានរិះគន់រដ្ឋាភិបាលក្រុងវ៉ាស៊ីនតោន ជុំវិញការដាក់ទណ្ឌកម្មលើមន្ត្រីជាន់ខ្ពស់ គណៈអចិន្ត្រៃយ៍នៃសភាប្រជាជនចំនួន ១៤នាក់។ ទណ្ឌកម្ម ដែលចិនហៅថា ជាទង្វើដ៏ឆ្កួត និងអាក្រក់នេះ កាន់តែធ្វើឲ្យទំនាក់ទំនងទ្វេភាគី អាមេរិក-ចិន អាប់អួរថែមទៀត។ 
ក្រសួងការបរទេស និងក្រសួងហិរញ្ញវត្ថុអាមេរិក បានប្រកាសបង្កកទ្រព្យសម្បត្តិ សមាជិកគណៈអចិន្ត្រៃយ៍នៃសភាប្រជាជនចំនួន ១៤រូប ជុំវិញការអនុម័តច្បាប់សន្តិសុខជាតិ និងសេចក្តីសម្រេចស្តីពីគុណសម្បត្តិរបស់សមាជិកសភាហុងកុង។ ទណ្ឌកម្មនេះ ធ្វើឡើងស្របពេលរដ្ឋបាលរបស់លោកដូណាល់ ត្រាំ ប្រធានាធិបតីអាមេរិក ជិតផុតអាណត្តិ និងបង្កឲ្យទំនាក់ទំនងក្រុងវ៉ាស៊ីនតោន-ក្រុងប៉េកាំង កាន់តែល្អក់កករមួយកម្រិតទៀត។
ទីក្រុងប៉េកាំង ដែលព្រមានវ៉ាស៊ីនកុំដាក់ទណ្ឌកម្មម្ដងហើយនោះ បានប្រតិកម្មខ្លាំងនឹងទណ្ឌកម្មនេះ។ អ្នកនាំពាក្យក្រសួងការបរទេសចិន Hua Chunying បានហៅទណ្ឌកម្មអាមេរិកថា មានបំណងអាក្រក់ ដើម្បីជ្រៀតជ្រែកចូលមកក្នុងកិច្ចការផ្ទៃក្នុងរបស់ចិន។
«រដ្ឋាភិបាល និងប្រជាជនចិន ជំទាស់ជាដាច់ខាត និងថ្កោលទោសខ្លាំងបំផុត លើកាយវិការដ៏អាក្រក់ ឆ្កួត និងគ្មានហេតុផលរបស់អាមេរិក»។ លោកស្រីអ្នកនាំពាក្យក្រសួងការបរទេសចិន បានលើកឡើងបែបនេះក្នុងសន្និសីទសារព័ត៌មានថ្ងៃទី៨ ខែធ្នូ។ ក្រសួងការបរទេសចិន ជំរុញឲ្យអាមេរិកដកការសម្រេចចិត្តរបស់ខ្លួន បញ្ឈប់ការជ្រៀតជ្រែកក្នុងកិច្ចការរបស់ចិន និងឈប់ដើរខុសផ្លូវតទៅទៀត។ ចិនក៏ព្រមានចាត់វិធានការតបវិញដើម្បីការពារអធិបតេយ្យ សន្តិសុខ និងផលប្រយោជន៍នៃការអភិវឌ្ឍរបស់ខ្លួនផងដែរ។
បន្ទាប់ពីសេចក្តីថ្លែងការណ៍នេះ ក្រសួងការបរទេសចិន បានកោះហៅភារៈធារីអាមេរិក ឲ្យមកពន្យល់ពីការដាក់ទណ្ឌកម្ម។ នេះបើតាមការចុះផ្សាយរបស់ទីភ្នាក់ងារព៏ត៌មាន AFP។
បន្ថែមពីលើទណ្ឌកម្ម នៅថ្ងៃទី៧ ខែធ្នូ កន្លងទៅ សភាតំណាងរាស្ត្រអាមេរិក បានអនុម័តលើគម្រោងអនុញ្ញាតឲ្យប្រជាជនហុងកុង អាចមានសិទ្ធិរស់នៅជាអចិន្ត្រៃយ៍នៅអាមេរិកផងដែរ។ កន្លងមក អង់គ្លេស អូស្ត្រាលី និងកាណាដា ក៏បានធ្វើបែបនេះផងដែរ ដើម្បីឲ្យប្រជាជនហុងកុង មានសិទ្ធិរស់នៅបរទេសជាអចិន្ត្រៃយ៍។
បន្ទាប់ពីច្បាប់សន្តិសុខជាតិចូលជាធរមាននៅដើមខែកក្កដាកន្លងមក សហគមន៍អន្តរជាតិ បានរិះគន់ទីក្រុងប៉េកាំងយ៉ាងខ្លាំង ជុំវិញការបង្ក្រាបលទ្ធិប្រជាធិបតេយ្យនៅក្នុងដែនដីស្វយ័តមួយនេះ។ អង់គ្លេស អាមេរិក និងប្រទេសផ្សេងទៀតសុទ្ធតែរិះគន់ចិន ថាមិនគោរពសេចក្តីប្រកាសរួមគ្នារវាងចិន-អង់គ្លេស ឆ្នាំ១៩៨៤។ នៅក្នុងខែសីហា កន្លងទៅ អាមេរិក បានដាក់ទណ្ឌកម្មលើលោកស្រី ការី ឡាំ ប្រធានប្រតិបត្តិហុងកុង និងមន្ត្រីពាក់ព័ន្ធផ្សេងទៀតដែរ៕
Tag:
ចិន
អាមេរិក
© រក្សាសិទ្ធិដោយ thmeythmey.com
