សង្គមអន្តរជាតិ
អន្តរជាតិ
នាយករដ្ឋមន្ត្រីកាណាដា ចាស្ទីន ទ្រូដូ ថ្លែងទៅកាន់អ្នកសារព័ត៌មាននៅវិមានសភាកាណាដានាពេលកន្លងមក។ រូបភាព AFP
×![]()
កាណាដា បានអនុញ្ញាតលើការចាក់វ៉ាក់សាំងកូវីដ-១៩ របស់ក្រុមហ៊ុនអាមេរិក Pfizer និងអាល្លឺម៉ង់ BioNTech ដោយផ្ដើមចាក់ឲ្យប្រជាជននៅទូទាំងប្រទេស ចាប់ពីសប្ដាហ៍ក្រោយទៅ។ ខណៈមានប្រជាជនសរុបជាង ៣៧,៥លាននាក់ កាណាដា រំពឹងបញ្ចប់យុទ្ធនាការនេះត្រឹមចុងខែកញ្ញា ឆ្នាំ២០២១។ កាណាដាជាប្រទេសទី៣ បន្ទាប់ពីចក្រភពអង់គ្លេស និងបារ៉ែន ដែលអនុម័តឲ្យប្រើប្រាស់វ៉ាក់សាំងបង្ការកូវីដ-១៩ របស់ក្រុមហ៊ុនទាំងពីរ។ 
កាណាដា ដែលបច្ចុប្បន្នមានករណីឆ្លងកូវីដ-១៩សរុបជាង៤៣,៥ម៉ឺនករណី និងស្លាប់១២៩៨៣នាក់នោះ កំពុងទទួលរងរលកឆ្លងទី២នៃជំងឺកូវីដ-១៩ ជាហេតុធ្វើឲ្យតំបន់មួយចំនួននៃប្រទេសនេះដាក់ចេញវិធានការសុខាភិបាលថ្មីទប់ស្កាត់ការឆ្លងរាលដាល។
ថ្លែងក្នុងសភានៅថ្ងៃទី៩ ខែធ្នូ ក្រោយអនុម័តឲ្យប្រើប្រាស់វ៉ាក់សាំងនេះរួចរាល់ នាយករដ្ឋមន្ត្រីកាណាដា ចាស្ទីន ទ្រូដូ បានអះអាងថា នេះជាថ្ងៃល្អសម្រាប់ពលរដ្ឋកាណាដា។ លោក ទ្រូដូ និយាយថា វ៉ាក់សាំង៣ម៉ឺនដូសដំបូង នឹងដឹកដល់ទឹកដីកាណាដា នាសប្ដាហ៍ក្រោយ ហើយយុទ្ធនាការចាក់វ៉ាក់សាំង ក៏នឹងចាប់ផ្ដើមផងដែរ។
តាមការចុះផ្សាយរបស់ទីភ្នាក់ងារព័ត៌មាន Reuters កាណាដា បានបញ្ជាទិញវ៉ាក់សាំងបង្ការកូវីដ-១៩ ២០លានដូស ដែលគ្រប់គ្រាន់សម្រាប់ចាក់ពលរដ្ឋ ១០លាននាក់ ហើយក៏ត្រៀមទិញ៥៦លានដូសថែមទៀតផងដែរ។ ការចាក់វ៉ាក់សាំង នឹងផ្ដល់ជូនដោយឥតគិតថ្លៃសម្រាប់ពលរដ្ឋកាណាដា។
ការចាក់វ៉ាក់សាំងទូទៅសម្រាប់ប្រជាជនកាណាដាទាំងអស់ នឹងចាប់ផ្ដើមក្នុងខែមេសាខាងមុខ ក្រោយក្រុមមនុស្សអាទិភាព ដូចជា មនុស្សចាស់ជរា បុគ្គលិកក្រុមហ៊ុន និងក្រុមគ្រូពេទ្យជួរមុខជាដើម ត្រូវចាក់វ៉ាក់សាំងបង្ការកូវីដ-១៩ រួចរាល់។ នេះបើតាមផែនការចាក់វ៉ាក់សាំងរបស់រដ្ឋាភិបាលកាណាដា ដែលចុះផ្សាយនៅថ្ងៃទី ៩ ខែធ្នូ។ ត្រង់ចំណុចនេះ ក្រសួងសុខាភិបាលកាណាដា សង្កត់ធ្ងន់ថា ការចាក់វ៉ាក់សាំងដល់ប្រជាជនទាំងជាង៣៧លាននាក់ នឹងសម្រេចជោគជ័យត្រឹមចុងខែកញ្ញា ឆ្នាំ២០២១។
វ៉ាក់សាំងបង្ការជំងឺកូវីដ-១៩របស់ក្រុមហ៊ុន Pfizer-BioNTech ដែលអាជ្ញាធរសុខាភិបាលកាណាដា អះអាងថា មានសុវត្ថិភាព ប្រសិទ្ធភាព និងគុណភាពល្អនេះ ត្រូវបានអនុម័តក្រោមលក្ខខណ្ឌមួយ ស្រដៀងនឹងការអនុញ្ញាតឲ្យប្រើប្រាស់បន្ទាន់របស់សហរដ្ឋអាមេរិកដែរ។ នៅថ្ងៃទី៨ ខែធ្នូ ពលរដ្ឋអង់គ្លេស បានក្លាយជាមនុស្សដំបូងគេ ដែលចាក់វ៉ាក់សាំងកូវីដ-១៩ របស់ក្រុមហ៊ុនទាំងពីរ បន្ទាប់ពីរដ្ឋាភិបាលក្រុងឡុងដ៏បានអនុម័តឲ្យប្រើប្រាស់កាលពីសប្ដាហ៍មុន។
គួររំឭកថា លទ្ធផលក្នុងដំណាក់ចុងក្រោយនៃការពិសោធ បង្ហាញ វ៉ាក់សាំង Pfizer នេះ មានប្រសិទ្ធភាពរហូតដល់៩៥ភាគរយប្រឆាំងកូវីដ-១៩។
ក្រោយអង់គ្លេស ប្រទេស បារ៉ែន កាលពីថ្ងៃទី ៤ ខែធ្នូ ក៏បានអនុម័តឲ្យប្រើប្រាស់បន្ទាប់វ៉ាក់សាំងកូវីដ-១៩ របស់ក្រុមហ៊ុន Pfizer-BioNTech ផងដែរ។ យ៉ាងណាមិញ រដ្ឋាភិបាលបារ៉ែន មិនបានបញ្ជាក់ចំនួនដូសដែលពួកគេទិញឬពេលណាដែលដឹកដល់ប្រទេសខ្លួនឡើយ តែសង្កត់ធ្ងន់ថា វ៉ាក់សាំងនេះ នឹងចាក់ឲ្យក្រុមមនុស្សប្រឈមហានិភ័យខ្ពស់។ នេះបើតាមទីភ្នាក់ងារព័ត៌មានរដ្ឋបារ៉ែន៕
Tag:
កាណាដា
Pfizer-BioNTech
វ៉ាក់សាំងកូវីដ-១៩
© រក្សាសិទ្ធិដោយ thmeythmey.com
