ប្រធានសមាគមគ្រឹះស្ថានឧត្តមសិក្សា៖ សិស្សពូកែ កុំថ្នាំងថ្នាក់នឹងនិទ្ទេស ព្រោះវាជា«ឆ្នាំសំណាង និងស៊យ»

ជាតិ

សង្គមជាតិ

ប្រធានសមាគមគ្រឹះស្ថានឧត្តមសិក្សា៖ សិស្សពូកែ កុំថ្នាំងថ្នាក់នឹងនិទ្ទេស ព្រោះវាជា«ឆ្នាំសំណាង និងស៊យ»

17, Dec 2020 , 4:00 pm

រូបភាព

ដោយ: ឡាយ សុភាវតី

ភ្នំពេញ៖ សិស្សពូកែ ដែលជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២០ កុំថ្នាំងថ្នាក់នឹងនិទ្ទេស ព្រោះវាជា«ឆ្នាំស៊យ និងសំណាង» នៅក្នុងវិស័យអប់រំនៅកម្ពុជា។ នេះជាការលើកឡើងរបស់លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា។

លោក ហេង វ៉ាន់ដា មើលឃើញថា ការសម្រេចរបស់រដ្ឋាភិបាល ដែលឲ្យបេក្ខជនប្រឡងសញ្ញាបត្របាក់ឌុបជាប់ស្វ័យប្រវត្តិ ដោយគ្មានកំណត់និទ្ទេស នៅក្នុងបរិបទកូវីដ-១៩ គឺជាជម្រើសល្អប្រសើរ សម្រាប់ឲ្យពួកគេអាចបន្តជ្រើសរើសជំនាញដែលខ្លួនពេញចិត្តនៅថ្នាក់ឧត្តមសិក្សា និងដើម្បីបញ្ចៀសការឆ្លងជំងឺកូវីដ-១៩ ក្នុងសហគមន៍។

ដ្បិតការសម្រេចឲ្យជាប់ស្វ័យប្រវត្តិ ជាជម្រើសមួយល្អ ប៉ុន្តែវាក៏ធ្វើសិស្សពូកែ មិនអាចបញ្ចេញសមត្ថភាព និងឈានដល់គោលដៅនិទ្ទេសល្អ ដែលពួកគេបានកំណត់នោះឡើយ។ លោក ហេង វ៉ានដា យល់ពីអារម្មណ៍របស់សិស្សពូកែទាំងនេះ។ ប៉ុន្តែលោកស្នើឲ្យសិស្សពូកែទាំងនោះ កុំអន់ចិត្តនឹងនិទ្ទេស ព្រោះវាជា«ឆ្នាំសំណាង និងស៊យ» ដោយសារបញ្ហារាតត្បាតនៃជំងឺកូវីដ-១៩។

ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា ថ្លែងប្រាប់សារព័ត៌មានថ្មីៗតាមប្រព័ន្ធតេឡេក្រាម នៅថ្ងៃទី១៧ ធ្នូ ដូច្នេះថា៖««ចំពោះសិស្សពូកែ សិស្សខំរៀន សូមកុំឲ្យមានអារម្មណ៍ថ្នាំងថ្នាក់ សោកស្ដាយ គឺគួរតែគិតគូរដល់ជីវិតរស់នៅក្នុងសង្គមទាំងមូល ហើយចាត់ទុកជាឆ្នាំសំណាង ឆ្នាំស៊យមួយសម្រាប់យើង។ តែយើងបានមកវិញដោយក្ដីសុខសប្បាយ ឆ្ងាយពីកូវីដ-១៩។ ហើយខ្ញុំជឿជាក់ថាតាមសកលវិទ្យាល័យប្រាកដជាគេមានការបញ្ចុះថ្លែ ឬផ្ដល់អាហារូបករណ៍ដូចឆ្នាំមុខអ៊ីចឹង»។

អត្ថបទទាក់ទង

បេក្ខជនប្រឡងបាក់ឌុប និងឌីប្លូមទាំងអស់ ជាប់ដោយស្វ័យប្រវត្តិ ដោយមិនកំណត់និទ្ទេស

កាលពីថ្ងៃទី១៦ ធ្នូ ក្រសួងអប់រំ យុវជន និងកីឡា ប្រកាសជាផ្លូវការថា បេក្ខជនចុះឈ្មោះប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) និងមធ្យមសិក្សាបឋមភូមិទាំងអស់ គឺជាប់ដោយស្វ័យប្រវត្តិ ដោយគ្មានការកំណត់និទ្ទេសឡើយ។ ការសម្រេចនេះ ធ្វើឡើងតាមការអនុសាសន៍របស់ សម្ដេច ហ៊ុន សែន នាយករដ្ឋមន្រី្ត។

គួរបញ្ជាក់ថា បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅឆ្នាំសិក្សា២០២០នេះ មានជាង១២ម៉ឺននាក់ ។ បើតាមលោក ហង់ ជួន ណារ៉ុន រដ្ឋមន្ត្រីក្រសួងអប់រំ ធ្លាប់បញ្ជាក់កន្លងមក៕