COVID-19
ជាតិ
ក្រសួងសុខាភិបាល ប្រាប់ឲ្យខេត្តជាប់ព្រំដែនថៃប្រុងប្រយ័ត្នខ្ពស់ ក្រោយថៃផ្ទុះជំងឺកូវីដ-១៩ ជាង៥០០ករណី
× ភ្នំពេញ៖ ក្រសួងសុខាភិបាលកម្ពុជា បានណែនាំបន្ទាន់ដល់អាជ្ញាធរ និងពលរដ្ឋ នៅក្នុងខេត្តពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងកោះកុង ដែលជាប់ព្រំដែននឹងប្រទេសថៃ មានការប្រុងប្រយ័ត្នខ្ពស់ ពីការឆ្លងរាលដាល នៃវីរុសកូវីដ-១៩។ ការណែនាំបន្ទាន់នេះកើតឡើង ក្រោយខេត្ត សាមុត សាខន ប្រទេសថៃ បានរកឃើញពលរដ្ឋប្រមាណ ៥០០នាក់ វិជ្ជមានកូវីដ-១៩។ ខេត្តសាមុត សាខន មកប្រទេសកម្ពុជា មានចម្ងាយប្រហែល៣០០គីឡូម៉ែត្រ។ នេះបើតាមសេចក្តីណែនាំរបស់ក្រសួងសុខាភិបាល។
ក្នុងសេចក្តីណែនាំនោះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំ ឲ្យបណ្តាខេត្តនៅតាមបណ្តោយព្រំដែន ជាប់ប្រទេសថៃ ត្រូវតែបង្កើនការប្រុងប្រយ័ត្នខ្ពស់ ក្នុងការត្រួតពិនិត្យរាល់អ្នកដំណើរដែលចូលមកកម្ពុជា ដោយត្រូវឆែកសុខភាព ឲ្យបានហ្មត់ចត់ជាទីបំផុត ពិសេសត្រូវវាស់កម្តៅ បំពេញទម្រង់បែបបទប្រកាសសុខភាពអ្នកដំណើរ។
ក្រសួងណែនាំទៀតថា រាល់អ្នកដំណើរចូលមកកម្ពុជា ត្រូវដាក់ឲ្យធ្វើចត្តាឡីស័កចំនួន ១៤ថ្ងៃ ជាចាំបាច់។ វត្ថុសំណាករបស់អ្នកដំណើរត្រូវបញ្ជូនមកធ្វើតេស្តនៅវិទ្យាស្ថានប៉ាស្ទ័រកម្ពុជា វិទ្យាស្ថានជាតិសុខភាពសាធារណៈ និងមន្ទីរពេទ្យខេត្តសៀមរាប នៅថ្ងៃដែលអ្នកដំណើរទាំងនោះមកដល់ច្រកចូលប្រទេសកម្ពុជា។ បណ្តាខេត្តជាប់ព្រំដែនថៃ ក៏ត្រូវរៀបចំកន្លែងមានគម្លាតសុវត្ថិភាព ពីបុគ្គលម្នាក់ទៅម្នាក់ នៅកន្លែងវាស់កម្តៅ កន្លែងបំពេញបែបបទចូលកម្ពុជា ឬកន្លែងរង់ចាំយកវត្ថុសំណាកផងដែរ។ នេះជាការណែនាំរបស់ក្រសួងសុខាភិបាល ដែលបានបន្តថា អាជ្ញាធរថ្នាក់ក្រោមជាតិ ត្រូវចូលរួមក្នុងការត្រួតពិនិត្យ ការធ្វើចត្តាឡីស័កអ្នកដំណើរចូលមកកម្ពុជា ឲ្យបានត្រឹមត្រូវ ចៀសវាងអ្នកដំណើរចាកចេញពីកន្លែងធ្វើចត្តាឡីស័ក ដោយមិនបានដឹង។
ក្រៅពីណែនាំដល់អាជ្ញាធរមានសមត្ថកិច្ច ក្រសួងសុខាភិបាល ក៏ស្នើឲ្យប្រជាពលរដ្ឋនៅតាមសហគមន៍ ផ្តល់ព័ត៌មានដល់អាជ្ញាធរភូមិ-ឃុំ ប្រសិនបើមានអ្នកចំណូលថ្មីចូលក្នុងសហគមន៍របស់ខ្លួន ហើយមិនបានត្រួតពិនិត្យសុខភាព និងការធ្វើចត្តាឡីស័យចំនួន ១៤ថ្ងៃទេនោះ។
សូមជម្រាបថា គិតត្រឹមថ្ងៃទី២០ធ្នូ កម្ពុជាមានករណីឆ្លងកូវីដ-១៩ សរុប ៣៦២ករណី ក្នុងនោះបានជាសះស្បើយចំនួន ៣៤៥នាក់ហើយ។ ក្នុងចំណោមអ្នកជំងឺ ១៧នាក់ ដែលកំពុងសម្រាកព្យាបាល មាន១៣នាក់សម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ២នាក់ នៅមណ្ឌលសុខភាពចាក់អង្រែ និង២នាក់ទៀត នៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕
© រក្សាសិទ្ធិដោយ thmeythmey.com