បទយកការណ៍ / បទសម្ភាសន៍
ជាតិ
ជីវិតបុគ្គល៖ បោះចោលកាត្វកិច្ចយោធា មកចាប់យកអាជីពអ្នកលក់ការ៉េម
× ខេត្តព្រះវិហារ៖ យោធិន ស្នា បច្ចុប្បន្ន មានអាយុ ៤៨ឆ្នាំ បានចំណាយពេលប្រមាណជា២០ឆ្នាំចូលបម្រើក្នុងជួរកងទ័ពដើម្បីការពារទឹកដី។ ចូលបម្រើជាតិនៅឆ្នាំ១៩៨៨ ប៉ុន្តែលោកបានបោះបង់អាជីពយោធាចោលនៅឆ្នាំ២០១០ ហើយបែរមកចាប់យកអាជីពអ្នកលក់ការ៉េមវិញចាប់ពីពេលនោះមក។ លក់ការ៉េម មានជីវភាពប្រសើរជាងធ្វើយោធា។
ដោយនឿយណាយនឹងអាជីពជាយោធាអស់រយៈពេលប្រមាណជា២០ឆ្នាំរួចមក លោក ស្នា បានសម្រេចចិត្តលះបង់កាំភ្លើងដែលជាមិត្តដ៏ជិតស្និទ្ធិចោលទាំងស្រុងនៅឆ្នាំ២០១០ ហើយចាប់យកអាជីពជាអ្នកលក់ការ៉េមវិញ។ មូលហេតុចម្បងនៃការសម្រេចចិត្តនេះគឺដោយសារប្រាក់ខែយោធា៨០ដុល្លារអាមេរិក មិនអាចចិញ្ចឹមគ្រួសារលោក ស្នា បាន។
មានដើមកំណើតនៅក្នុងខេត្តតាកែវ ធ្លាប់បម្រើការយោធានៅក្នុងខេត្តពោធិ៍សាត់ បច្ចុប្បន្នមានអាជីពលក់ការ៉េមនៅក្នុងខេត្តព្រះវិហារ។ ជារៀងរាល់ព្រឹកនៅវេលាម៉ោង៦និង៣០នាទីព្រឹក លោក ស្នា បានរៀបចំម៉ូតូកញ្ចាស់របស់គាត់ និងធុងការ៉េមនៅពីក្រោយម៉ូតូរួចជាស្រេចហើយ។ ម៉ោង៧ព្រឹកគត់ ម៉ូតូរបស់គាត់ចាប់ផ្តើមវិលកង់រហូតដល់ម៉ោង៧យប់ទើបត្រឡប់មកផ្ទះវិញ។
ក្បាលពាក់មួក ករុំក្រមា ដៃពាក់ស្រោមការពារកម្តៅថ្ងៃ អាជីវករលក់ការ៉េមតាំងពីជាង៣ឆ្នាំមក បានឈរនិយាយនៅក្រោមដើមឈើមួយដើមព័ទ្ធជុំវិញដោយម៉ូយ នៅក្នុងស្រុកត្បែងមានជ័យខេត្តព្រះវិហារ ថា៖«ក្នុងមួយថ្ងៃៗខ្ញុំជិះម៉ូតូមិនតិចជាង១០០គីឡូមែត្រទេដោយចំណាយសាំងអស់ជាង២លីត្រ។ ធុញ ប៉ុន្តែខ្ញុំមិនដឹងធ្វើយ៉ាងដូចម្តេចទេ»។
និយាយបណ្តើរ ដៃលូកការ៉េមលក់បណ្តើរ យោធិនរូបនេះ បាននិយាយប្រាប់ដោយស្មោះថា អាជីពលក់ការ៉េម រកប្រាក់ចំណូលបានច្រើនជាងអាជីពយោធាឆ្ងាយណាស់។ កាលពីនៅធ្វើការជាយោធា លោក ស្នា ទទួលបានប្រាក់បៀវត្សរ៍៨០ដុល្លារអាមេរិកក្នុងមួយខែ។ ប៉ុន្តែអាជីពជាអ្នកលក់ការ៉េមអនុញ្ញាតអោយលោកអាចរកប្រាក់ចំណេញបានពី៣០០ទៅ៥០០ដុល្លារអាមេរិកជារៀងរាល់ខែ។ លោកនិយាយទាំងសប្បាយចិត្តថា៖«ថ្ងៃខ្លះ ខ្ញុំរកប្រាក់ចំណេញបានជិត២០ឬជាង២០ដុល្លារក៏មាន។ កាលពីនៅធ្វើជាយោធា បែកប្រពន្ធបែកកូន ប្រាក់ខែចាយមិនគ្រប់ទេ»។
សព្វថ្ងៃនេះ មុខរបរលក់ការ៉េមហាក់បីដូចជាធ្វើអោយលោក ស្នា នឿយហត់ និងធុញទ្រាញ់ខ្លះមែន។ ប៉ុន្តែលោកសប្បាយចិត្តនឹងប្រាក់ចំណូលទទួលបានប្រចាំខែ។ លោក ស្នា មិនមែនគ្រាន់តែជាអ្នកលក់ការ៉េមធម្មតាប៉ុណ្ណោះទេ។ ប៉ុន្តែ គាត់ជាអ្នកផលិតការ៉េមដោយខ្លួនឯង និងលក់ដោយខ្លួនឯង។
ដៃធ្លាប់កាន់កាំភ្លើងអស់រយៈពេលជាច្រើនឆ្នាំ ហើយលោកទើបចាប់យកអាជីពផលិត និងលក់ការ៉េមថ្មីៗនេះទេ តើលោកមានបំណងចង់ទៅបម្រើការជាយោធាវិញទេ? មិនឆ្លើយអ្វីទាំងអស់ ប៉ុន្តែក្បាលរបស់បុរសអាយុ៤៨ឆ្នាំរូបនេះគ្រវីដោយចង់និយាយថា«ទេ»។ លោក ស្នា បញ្ចប់ការជជែកគ្នាលេងដោយនិយាយថា៖«ខ្ញុំស្នេហាជាតិយូរហើយគ្មានបានអ្វីទេ។ អ្នកឡើងធំ មានតែមនុស្សដដែលៗ ឬបក្សពួកដដែលៗ»៕
© រក្សាសិទ្ធិដោយ thmeythmey.com