ជាតិ
សង្គមជាតិ
ប្រធានរាជបណ្ឌិត្យសភា លោក សុខ ទូច៖ «អ្នកស្រី ត្រឹង ងា គឺជាជនកម្រ ដែលបានលះបង់ដើម្បីជាតិ»
លោក សុខ ទូច ប្រធានរាជបណ្ឌិត្យសភាជាតិកម្ពុជា បាននាំយកសញ្ញាបត្រកិត្តិបណ្ឌិតផ្នែកអក្សរសាស្ត្រ និងឯកសណ្ឋានទៅជូនអ្នកស្រី ត្រឹង ងា ឈ្មោះដើម ឡាយ ហ៊ុនគី ដល់គេហដ្ឋានរបស់អ្នកស្រីផ្ទាល់តែម្ដងក្នុងរាជធានីភ្នំពេញ នាថ្ងៃទី២២ ធ្នូ ២០២០។
×![]()
ដោយ: ប៉ូ សាគុន
ភ្នំពេញ៖ អ្នកស្រី ត្រឹង ងា ឈ្មោះដើម ឡាយ ហ៊ុនគី បានទទួលសញ្ញាបត្រកិត្តិបណ្ឌិតផ្នែកអក្សរសាស្ត្រ ពីរាជបណ្ឌិត្យសភាកម្ពុជា ជាផ្លូវការហើយ នៅរសៀលថ្ងៃទី២២ ធ្នូនេះ។ ប្រធានរាជបណ្ឌិត្យសភាជាតិកម្ពុជា លោក សុខ ទូច បានបញ្ជាក់ថា អ្នកស្រី ត្រឹង ងា គឺជាជនកម្រម្នាក់ ដែលបានលះបង់ និងបំពេញភារកិច្ចជូនជាតិពេញមួយជីវិតរបស់អ្នកស្រី។ ចំណែកប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ក៏បានបញ្ជាក់ដែរថា តម្លៃសញ្ញាបត្រនេះ គឺស័ក្ដិសមនឹងអ្នកស្រី ត្រឹង ងា ទទួលបានបំផុត។
លោក សុខ ទូច ប្រធានរាជបណ្ឌិត្យសភាជាតិកម្ពុជា បាននាំយកសញ្ញាបត្រកិត្តិបណ្ឌិតផ្នែកអក្សរសាស្ត្រ និងឯកសណ្ឋានទៅជូនអ្នកស្រី ត្រឹង ងា ឈ្មោះដើម ឡាយ ហ៊ុនគី ដល់គេហដ្ឋានរបស់អ្នកស្រីផ្ទាល់តែម្ដង ក្នុងរាជធានីភ្នំពេញ។
លោក សុខ ទូច បានបញ្ជាក់ប្រាប់សារព័ត៌មានថ្មីៗថា មូលហេតុរាជបណ្ឌិត្យសភាជាតិកម្ពុជា ផ្ដល់សញ្ញាបត្រដល់អ្នកស្រី ត្រឹង ងា គឺដោយសារអ្នកស្រីបានបំពេញការងារពេញមួយជីវិត និងជាមនុស្សមាន និងតម្លៃខ្ពស់ណាស់សម្រាប់ជាតិ។
ប្រធានរាជបណ្ឌិត្យសភាជាតិកម្ពុជា បានបន្ថែមដូច្នេះ៖«យើងបានឃើញពីប្រវត្តិរូប និងការងារជាក់ស្ដែងរបស់គាត់(អ្នកស្រី ត្រឹង ងា) ដែលផ្ដល់ជូនជាតិពេញមួយជិវិតរបស់លោក។ គាត់បានបំពេញភារកិច្ចជូនជាតិ ហើយនេះជាការតបស្នងរបស់យើងជូនគាត់។ អ្នកស្រីគឺជាជនកម្រ ដែលបានលះបង់ដើម្បីជាតិ។ ខ្ញុំចង់ឱ្យមានអ្នកបន្តវេនដូចអ្នកស្រីច្រើនទៀត»។
ចំណែកប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ក៏បានមើលឃើញថា ស្នាដៃសៀវភៅរបស់អ្នកស្រី ត្រឹង ងា ដែលមានចំណងជើងថា “អរិយធម៌ខ្មែរ” ត្រូវបានសិស្សទទួលស្គាល់តាំងពីសម័យមុនសង្គ្រាមរហូតដល់បច្ចុប្បន្ន។ សៀវភៅនេះ នៅតែមានតម្លៃរសម្រាប់កូនខ្មែរគ្រប់រូប តជំនាន់ទៅមុខទៀត។
«គាត់(អ្នកស្រី ត្រឹង ងា) ស័ក្ដិសមបំផុតនឹងទទួលបានគោរមងារនេះ។ ខ្ញុំនិយាយនេះមិនមែនដោយសារខ្ញុំជាសិស្សរបស់គាត់ទេ ប៉ុន្តែដោយសារខ្ញុំមើលឃើញពីតម្លៃការងារជាក់ស្ដែងរបស់គាត់។ កាលណាយើងឱ្យកិត្តិយសដល់បុគ្គលរូបណាបានត្រឹមត្រូវ នោះគឺជាការលើកទឹកចិត្ត និងជាគំរូរដល់បញ្ញវន្តជំនាន់ក្រោយ ឱ្យមានការខំប្រឹងប្រែង។ ប្រទេសរីកចម្រើនអាស្រ័យលើបញ្ញវន្ត ក្នុងការជ្រោមជ្រែងប្រទេស។ ខ្ញុំគ្រាន់តែប្រាប់ខ្ញុំថា នៅមានអ្នកស័ក្ដិសមមួយចំនួនទៀត ដែលគួរតែបានគោរមងារ ប៉ុន្តែខ្ញុំមិនអាចស្នើសុំបានភ្លាមៗទៀតទេ។ អ្នកខ្លះគាត់បានចែកឋានខ្លះហើយ»។
រីឯលោក ត្រឹង បញ្ចារុណ ត្រូវជាកូនប្រុសរបស់អ្នកស្រី ត្រឹង ងារ បានសម្ដែងក្ដីរីករាយ ខណៈម្ដាយរបស់លោក ទទួលបានគោរមងារកិត្តិបណ្ឌិតផ្នែកអក្សរសាស្ត្រនេះ។ លោកក៏បានបញ្ជាក់ដែរថា សៀវភៅ “អរិយធម៌ខ្មែរ” ដែលជាស្នាដៃរបស់ម្ដាយលោក នៅតែមានតម្លៃដល់បច្ចុប្បន្ន ព្រោះក្រសួងអប់រំយុវជន និងកីឡា បានយកអត្ថបទមួយចំនួនក្នុងសៀវភៅនេះ ទៅដាក់ក្នុងកម្មវិធីសិក្សារបស់រដ្ឋ។
លោក ត្រឹង បញ្ចារុណ បន្ថែម៖«ក្នុងនាមជាកូនចៅ និងក្រុមគ្រួសារ ខ្ញុំមានចិត្តសប្បាយរីករាយ និងមានក្ដីរំភើប។ នេះជាកិត្តិយសរបស់ម្ដាយខ្ញុំ តាមរយៈស្នាដៃ “អរិយធម៌ខ្មែរ” សម្រាប់កូនខ្មែរគ្រប់រូប។ ខ្ញុំសង្ឃឹមថាកូនខ្មែរទាំងអស់នៅតែស្វែងយល់ពីវប្បធម៌ខ្មែរ សង្គមធម៌របស់ខ្មែរ តាមរយៈសៀវភៅអរិយធម៌ខ្មែរ ដើម្បីឱ្យប្រជាជនខ្មែរយើងដឹងពីជាតិសាស្ត្រខ្មែរ។ មុនយើងដឹងពីប្រវត្តិរបស់ជាតិដទៃ គួរតែយើងដឹងពីប្រវត្តិប្រទេសជាតិរបស់យើងជាមុនសិន»។
បច្ចុប្បន្នអ្នកស្រី ឡាយ ហ៊ុនគី ហៅ ត្រឹង ងា មានជន្មាយុ៨៥ឆ្នាំ។ អ្នកស្រីកំពុងតែរួបរឹតដោយជំងឺពុកឆ្អឹងខ្នង និងលើសសម្ពាធឈាម។ អ្នកស្រី ឡាយ ហ៊ុនគី បានបោះពុម្ពសៀវភៅ”អរិយធម៌ខ្មែរ” កាលពីឆ្នាំ១៩៧៤។អ្នកស្រីជាអតីតសាស្ត្រាចារ្យអក្សរសាស្ត្រមួយរូប។
ត្រឹង ងា ជាឈ្មោះស្វាមីរបស់អ្នកស្រី ដែលជាអតីតសាស្ត្រាចារ្យ និងជាអ្នកនិពន្ធសៀវភៅ «ប្រវត្តិសាស្ត្រខ្មែរ» ភាគទី១ និងទី២ ដែលបោះពុម្ពផ្សាយនៅឆ្នាំ១៩៧៣។ សាស្ត្រារ្យត្រឹង ងា ត្រូវបានខ្មែរក្រហមយកទៅសម្លាប់នៅមន្ទីរស-២១ កាលពីអំឡុងខែវិច្ឆិកា ឆ្នាំ១៩៧៥៕
Tag:
ត្រឹង ងា
ឡាយ ហ៊ុនគី
© រក្សាសិទ្ធិដោយ thmeythmey.com
