នៅថ្ងៃទី២៧ ខែធ្នូ ធនាគារកណ្តាលចិន បានទាមទារឲ្យក្រុមហ៊ុនទូទាត់ប្រាក់ Ant របស់លោកមហាសេដ្ឋី ជេក ម៉ា រក្សាប្រតិបត្តិការដើមរបស់ខ្លួនជាក្រុមហ៊ុនផ្ដល់សេវាកម្មផ្នែកទូទាត់ប្រាក់ ហើយកែប្រែរបៀបធ្វើមុខជំនួញសព្វថ្ងៃ។
សេចក្តីថ្លែងការណ៍របស់ធនាគារកណ្តាលប្រជាជន(PBOC) លើកឡើងថា ក្រុមហ៊ុន Ant ខ្វះគោលនយោបាយក្នុងការគ្រប់គ្រងហិរញ្ញវត្ថុ ល្មើសនឹងបញ្ញត្តិរបស់និយ័តករ ប្រើប្រាស់យុទ្ធសាស្ត្រទីផ្សារដើម្បីកម្ចាត់គូប្រជែង ក៏ដូចជាបង្កផលប៉ះពាល់ដល់សិទ្ធិស្របច្បាប់របស់អ្នកប្រើប្រាស់។ ធនាគារកណ្ដាលចិន រកឃើញថា Ant បានបោះជំហានទៅក្នុងវិស័យផ្សេងដែលខុសពីគោលដៅដើមរបស់ខ្លួនដែរ។
ការបញ្ជាឲ្យក្រុមហ៊ុន Ant ផ្លាស់ប្តូររបៀបនៃការធ្វើជំនួញនេះ កើតឡើងក្រោយអាជ្ញាធរហិរញ្ញវត្ថុចិន ផ្អាកមិនផ្តល់អាជ្ញាប័ណ្ណជួញដូរភាគហ៊ុន (IPO) ឲ្យក្រុមហ៊ុននេះឈានជើងចូលទីផ្សារភាគហ៊ុននៅក្រុងហុងកុង និងសៀងហៃ ។ នៅថ្ងៃទី២៤ ធ្នូ អាជ្ញាធរទីផ្សារចិន ទើបតែបើកការស៊ើបអង្កេតលើការសង្ស័យធ្វើជំនួញផ្តាច់មុខរបស់ក្រុមហ៊ុន Alibaba ដែលកាន់កាប់ភាគហ៊ុនចំនួន៣៣ភាគរយរបស់ក្រុមហ៊ុនAnt។
កម្មវិធី Alipay ដែលបង្កើតដោយក្រុមហ៊ុន Ant ជាកម្មវិធីទូទាត់ប្រាក់ដ៏ល្បីនៅចិន ដែលមានមនុស្សប្រើជាង១ពាន់លាននាក់។ កម្មវិធីនេះផ្តល់សេវាហិរញ្ញវត្ថុ កម្ចី វិនិយោគ និងប្រព័ន្ធពិន្ទុឥណទាន។ គិតត្រឹមរយៈពេល១ឆ្នាំ ទឹកប្រាក់ប្រមាណ១៧លានលានដុល្លារ ត្រូវបានទូទាត់តាមរយៈកម្មវិធីនេះ ក្នុងប្រទេសជាង៥០។
កម្មវិធី Alipay និងគូប្រជែង WeChat Pay បានកែប្រែការទូទាត់ប្រាក់នៅចិន ដោយប្រជាជនចិនប្រើប្រាស់កម្មវិធីទាំងនោះសម្រាប់បង់ទិញម្ហូប តាក់ស៊ី បង់ថ្លៃទឹកនិងអគ្គីសនី រហូតដល់សំបុត្ររថភ្លើង និងយន្តហោះ។
ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុន Ant បានពង្រីកការធ្វើជំនួញរបស់ខ្លួនហួសពីការទូទាត់ប្រាក់ ដោយពង្រីកដល់ការផ្តល់ប្រាក់កម្ចីរហ័ស បើកប្រតិបត្តិការផ្តល់ការវិនិយោគទ្រង់ទ្រាយតូច និងបង្កើតប្រព័ន្ធពិន្ទុឥណទានដល់អ្នកប្រើប្រាស់។ បន្ថែមពីនេះ ក្នុងឆ្នាំ២០១៩ ក្រុមហ៊ុននេះបានបង្កើតសេវាថែទាំសុខភាព ដែលឲ្យអនុញ្ញាតឲ្យអតិថិជនបង់ប្រាក់ថ្លៃព្យាបាលជំងឺដូចជាមហារីក និងជំងឺបាត់បង់ការចងចាំជាដើម។
ក្នុងសេចក្ដីថ្លែងការណ៍ខាងលើ លោក Pan Gongsheng ទេសាភិបាលរងធនាគារកណ្តាលចិន បានបញ្ជាឲ្យក្រុមហ៊ុននេះរៀបចំកាលវិភាគ និងផែនការក្នុងការផ្លាស់ប្តូររបៀបធ្វើជំនួញដូចជាសេវាឥណទាន ធានារ៉ាប់រង និងការគ្រប់គ្រងទ្រព្យសម្បត្តិរបស់អ្នកប្រើប្រាស់។ យ៉ាងណាក្តី ធនាគារកណ្តាលចិន ពុំបានចេញបញ្ជាឲ្យបំបែកក្រុមហ៊ុន Ant ឡើយ ប៉ុន្តែបង្គាប់ឲ្យបង្កើតក្រុមហ៊ុនផ្សេងមួយទៀតដើម្បីគ្រប់គ្រងមូលធន និងពិនិត្យការអនុវត្តតាមបទបញ្ញត្តិហិរញ្ញវត្ថុរបស់អាជ្ញាធរ។
លើសពីនោះ ក្រុមហ៊ុន Ant ត្រូវសុំអាជ្ញាប័ណ្ណពីរដ្ឋសម្រាប់ប្រតិបត្តិការ និងសេវាកម្មផ្សេងទៀតដូចជាការផ្តល់ប្រាក់កម្ចីជាដើម។ ធនាគារចិន ក៏តម្រូវឲ្យក្រុមហ៊ុននេះបង្ហាញពីតម្លាភាពក្នុងការទូទាត់សាច់ប្រាក់ និងឈប់ពាក់ព័ន្ធក្នុងការប្រកួតប្រជែងមិនស្មើរភាព។ ក្រុមហ៊ុន Ant នៅថ្ងៃទី២៧ ធ្នូ បាននិយាយថាខ្លួននឹងបង្កើតក្រុមការងារដើម្បីធ្វើការជាមួយធនាគារ និងនិយ័តករដើម្បីបំពេញការទាមទារ៕