COVID-19
ជាតិ
សម្តេច ហ៊ុន សែន៖ យើងមិនរារាំងជនជាតិអង់គ្លេសចូលមកកម្ពុជានោះឡើយ
× សម្តេចនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជាមិនរារាំងជនជាតិអង់គ្លេសចូលមកកម្ពុជានោះឡើយ ប៉ុន្តែបន្តពង្រឹងវិធានការចត្តាឡីស័ក ដែលមានអ្នកដំណើរពីបរទេស ក្នុងនោះមានជនជាតិខ្មែរផងដែរនោះ មានពីរាប់រយនាក់ ទៅរាប់ពាន់នាក់ជារៀងរាល់ថ្ងៃ។
តាមរយៈការថ្លែងសារពិសេសពីក្រុងតាខ្មៅ នាព្រឹកនេះ សម្តេចបានអះអាង បណ្តាប្រទេសជាច្រើនបានសម្រេចបិទជើងហោះហើរពីអង់គ្លេស ដើម្បីទប់ស្កាត់ការរាលដាលកូវីដ-១៩ ទម្រង់ថ្មី។ «យើងមិនចាំបាច់ប្រកាសបិទទេ ព្រោះអង់គ្លេសមិនមានជើងហោះហើរផ្ទាល់មកកម្ពុជានោះឡើយ»។ នេះជាការបញ្ជាក់របស់សម្តេច ហ៊ុន សែន៕
អ្នកវិទ្យាសាស្ត្រអង់គ្លេស បានរកឃើញវត្តមានទម្រង់ថ្មីរបស់ជំងឺកូវីដ-១៩ ក្នុងខ្លួនអ្នកជំងឺម្នាក់ កាលពីខែកញ្ញា កន្លងទៅ។ នាយករដ្ឋមន្ត្រី អង់គ្លេស បូរីស ចនសុន បង្ហាញថា ទម្រង់ថ្មីនៃកូវីដ-១៩ មានល្បឿនឆ្លងលឿនជាងទម្រង់ចាស់រហូតដល់៧០ភាគរយ។
ក្រោយអង់គ្លេស បានប្រកាសរកឃើញទម្រង់ថ្មីនៃជំងឺកូវីដ-១៩ ប្រទេសមួយចំនួននៅតំបន់អឺរ៉ុប បានចាប់ផ្ដើមបិទព្រំដែនជាមួយប្រទេសនេះ ក្នុងនោះដូចជា កាណាដា បារាំង អាល្លឺម៉ង់ អៀរឡង់ អ៊ីតាលី ហូឡង់ និងបែលហ្ស៊ិកជាដើម។ នៅថ្ងៃបន្តបន្ទាប់ បណ្ដាប្រទេសផ្សេងទៀត នៅជុំវិញសកលលោក ក៏បានអនុវត្តវិធានការនេះដូចគ្នាជាមួយអង់គ្លេស ដូចយ៉ាង ឥណ្ឌា ប៉ាគីស្ថាន ប៉ូឡូញ អេស្ប៉ាញ ស្វ៊ីស ស៊ុយអែត និងរុស្ស៊ី ៕
© រក្សាសិទ្ធិដោយ thmeythmey.com