ជាតិ
សង្គមជាតិ
បវេសនកាលឆ្នាំថ្មី ៖ សិស្សរីករាយ និងតាំងចិត្តខិតខំសិក្សា បើទោះកូវីដ-១៩ បន្តគំរាមកំហែង
×![]()
ភ្នំពេញ៖ សិស្សនៅគ្រប់កម្រិត ពីថ្នាក់មេត្តយ្យដល់ថ្នាក់មធ្យមសិក្សា បានបង្ហាញអារម្មណ៍រីករាយនៅពេលដែលពួកគេបានវិលត្រឡប់មកសិក្សាក្នុងថ្នាក់រៀនឡើងវិញ ក្រោយពីពួកគេខកខានរៀនជាយូរខែមកហើយ។ សម្រាប់ឆ្នាំសិក្សាថ្មីនេះ ពួកគេបានប្រាប់អ្នកសារព័ត៌មានថ្មីៗថា ពួកគេនឹងតាំងចិត្តខិតខំរៀនសូត្រ។ 
សូមអញ្ជើញតាមដានទស្សនាវីដេអូសម្ភាសរវាងកញ្ញា សៅ សុខអេង អ្នកសារព័ត៌មានថ្មីៗ និងសិស្សានុសិស្សនៅវិទ្យាល័យជាស៊ីមសន្ធរម៉ុកដូចតទៅ៖
យុវតី សក្កដា សុផាវីន ជាសិស្សឡើងថ្នាក់ទី៩សម្រាប់ឆ្នាំសិក្សាថ្មីនៅវិទ្យាល័យជាស៊ីមសន្ធរម៉ុក ដែលកំពុងតែឈររង់ចាំគ្រូហៅឈ្មោះឲ្យចូលរៀន បានបញ្ជាក់ថា ខ្លួនសប្បាយរីករាយនឹងការវិលត្រឡប់មករៀននៅក្នុងថ្នាក់វិញ។ យុវតីអាយុ១៤ឆ្នាំរូបនេះ បាននិយាយថា ការចូលរៀនឆ្នាំសិក្សាថ្មីនេះ គឺផ្តល់ភាពងាយស្រួលដល់សិស្សអាចសិក្សាបានពេញលេញ។
«ខ្ញុំទន្ទឹងរង់ចាំថ្ងៃហ្នឹងយូរហើយ។ ការរៀនតាមអនឡាញ ខ្ញុំរៀនបានកម្រិតមធ្យម ដោយសារខ្ញុំស្តាប់គ្រូអត់សូវបាន។ ពេលខ្ញុំមានចម្ងល់អី ខ្ញុំពិបាកសួរគាត់មែនទែន។ ពេលខ្ញុំរៀនហ្នឹង ខ្ញុំរៀនអត់ល្អដូចនៅក្នុងថ្នាក់ទេ។ ពេលខ្ញុំរៀននៅក្នុងថ្នាក់វាល្អជាងដល់ទៅ៤០ភាគរយ»។ នេះការលើកឡើងរបស់យុវតី សុផាវីន។
ទោះបីត្រេកអរនឹងការចូលរៀនវិញ យុវតីរូបនេះក៏ព្រួយបារម្ភពីជំងឺកូវីដ-១៩ដែរ។ តែយ៉ាងណាយុវតីរូបនេះនៅតែពេញចិត្តនឹងការរៀនក្នុងថ្នាក់ជាជាងរៀនតាមអនឡាញ និងខិតខំយកចិត្តទុកដាក់រៀនសូត្របន្ថែមទៀត។ យុវតីដែលពាក់ម៉ាស់ពណ៌ខ្មៅរូបនេះបាននិយាយថា៖«សម្រាប់ឆ្នាំសិក្សាឆ្នាថ្មីនេះ ខ្ញុំមានការតាំងចិត្តនឹងខិតខំប្រឹងរៀនសូត្រឲ្យបានខ្លាំងជាងឆ្នាំមុនៗ»។
នឹកមិត្តភក្តិ នឹកគ្រូ និងថ្នាក់រៀន គឺជាអារម្មណ៍របស់យុវសិស្ស ជៀម នរៈបញ្ញា ដែលចូលរៀនឆ្នាំសិក្សាថ្មីនេះត្រូវឡើងថ្នាក់ទី១២ នៅវិទ្យាល័យជាស៊ីមសន្ធរម៉ុក ដែលបានចូលរៀនដោយអនុវត្តតាមការណែនាំរបស់ក្រសួងសុខាភិបាល។ «ខ្ញុំសប្បាយចិត្តដោយបានចូលរៀនវិញ។ ការរៀនអនឡាញ ខ្ញុំអត់សូវបានចាប់បាន។ ខ្ញុំរៀនទី១១ ឆ្នាំមុន គឺចាប់បានគ្រឹះតិចមែនទែន។ ខ្ញុំនឹកមិត្តភក្តិខ្ញុំខ្លាំង ខ្ញុំខានជួបយូរដែរហើយតាំងពីខែមីនាឆ្នាំ២០២០»។ នេះជាលើកឡើងរបស់ យុវសិស្ស នរៈបញ្ញាដោយបន្ថែមថាខ្លួននឹងបន្តរៀនសូត្រដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិឆ្នាំនេះ។
ចំណែកយុវតី គន់ ស្រីនូ ដែលជាសិស្សដែលទើបតែផ្លាស់ពីខេត្តត្បូងឃុំមករៀននៅវិទ្យាល័យជាស៊ីមសន្ធរម៉ុកសម្រាប់ឆ្នាំសិក្សាថ្មីនេះ ត្រូវឡើងថ្នាក់ទី១០ បានទន្ទឹងរង់ចាំការចូលរៀនក្នុងថ្នាក់វិញយូរហើយ ព្រោះការរៀនជាមួយគ្រូផ្ទាល់នេះ វាជួយឱ្យ ស្រីនូ ទទួលបានចំណេះដឹងច្រើន ជាងសិក្សាតាមអនឡាញ។
«ថ្ងៃបើកបវេសនកាលឆ្នាំថ្មីនេះ គឺជាថ្ងៃថ្មីសម្រាប់ខ្ញុំ អ្វីៗគឺថ្មីៗទាំងអស់។ ដូច្នេះខ្ញុំនឹងខិតខំប្រឹងប្រែងរៀនសូត្រដើម្បីគ្រួសារ ម៉ាក់ប៉ា និងខ្លួនឯង»។ នេះជាការលើកឡើងរបស់យុវតី គន់ ស្រីនូ។
នាឱកាសបវេសនកាលឆ្នាំសិក្សាថ្មីនេះ សម្តេចនាយករដ្ឋមន្ត្រី ហ៊ុន សែនបានណែនាំដល់សិស្សានុសិស្សទាំងអស់ខិតខំសិក្សា។ រដ្ឋាភិបាលកម្ពុជាបានណែនាំដល់លោកគ្រូ អ្នកគ្រូបន្តធ្វើជាឪពុកម្តាយទី២ សម្រាប់បង្រៀនសិស្សានុសិស្ស។ ប្រមុខដឹកនាំរូបនេះក៏ណែនាំដល់ឪពុកម្តាយ និងអាណាព្យាបាលសិស្សបន្តតាមដានលើការសិក្សាកូនផងដែរ។
គ្រឹះស្ថានសិក្សាគ្រប់កម្រិតទាំងអស់សរុបមានចំនួន១៨០០០ ក្នុងនោះមេត្តយ្យសិក្សាសហគមន៍មានចំនួន៣០០០ គ្រឹះស្ថានសិក្សាចំណេះទូទៅសាធារណៈមានចំនួន១៣៥០០ គ្រឹះស្ថានសិក្សាចំណេះទូទៅឯកជនមានចំនួន១៥០០។ សិស្សសរុបមានចំនួន៣លាន៥សែននាក់។ ក្នុងនោះមានសិស្សស្រី៤៩ភាគរយ។ នេះបើតាមលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលបានថ្លែងនៅក្នុងថ្ងៃបើកបវេនកាលនៅវិទ្យាល័យអប់រំពិសេសកំពង់ចាម ខេត្តកំពង់ចាម។
បើតាមលោក ហង់ជួន ណារ៉ុន ចំពោះគ្រឹះស្ថានឧត្តមសិក្សាសរុបមានចំនួន១២៥ ក្នុងនោះគ្រឹះស្ថានឧត្តមសិក្សាសាធារណៈមានចំនួន៤៨ និងគ្រឹះស្ថានឧត្តមសិក្សាឯកជនមានចំនួន៧៧។ សិស្សសរុបចំនួន២១ម៉ឺននាក់៕
Tag:
សិស្ស
បវេសនកាល
អប់រំ
© រក្សាសិទ្ធិដោយ thmeythmey.com
