COVID-19
អន្តរជាតិ
លោក Thanathorn ថា រដ្ឋាភិបាល ប្រាយុទ្ធ យកបណ្តឹងប្រមាថស្ដេច ដើម្បីបំបិទសំឡេងខ្លួន
អ្នកនយោបាយប្រឆាំងដ៏សំខាន់របស់ថៃ លោក Thanathorn Juangroongruangkit ។ រូបថត AFP
×![]()
អ្នកនយោបាយប្រឆាំងថៃ លោក Thanathorn Juangroongruangkit នៅថ្ងៃទី២១ មករា បានការពារពាក្យរិះគន់ខ្លួនលើកម្មវិធីវ៉ាក់សាំងរដ្ឋាភិបាលថៃ។ ពាក្យរិះគន់ ក៏នាំដល់ការប្ដឹងប្រឆាំងរូបលោកពីបទប្រមាថមហាក្សត្រ។ លោក Thanathorn អះអាងថា រដ្ឋាភិបាលថៃយកបណ្ដឹងនេះដើម្បីបំបិទសំឡេងរបស់លោក។ 
ក្រសួងសេដ្ឋកិច្ច និងសង្គមឌីជីថលថៃ នៅថ្ងៃទី២០ មករា បានប្តឹងលោក Thanathorn Juangroongruangkit ទៅតុលាការពីបទប្រមាថព្រះមហាក្សត្រ។ ការប្តឹងអ្នកនយោបាយប្រឆាំងដែលត្រូវតុលាការធម្មនុញ្ញហាមមិនឲ្យធ្វើនយោបាយ១០ឆ្នាំ ធ្វើឡើងបន្ទាប់ពីនាយករដ្ឋមន្ត្រីថៃ លោកប្រាយុទ្ធ ចន្ទអូចា នៅថ្ងៃទី១៩ មករា អះអាងថាលោកនឹងចាត់វិធានការលើបុគ្គលទាំងឡាយណាដែលចែកចាយព័ត៌មានមិនពិតពីគម្រោងវ៉ាក់សាំងរបស់រដ្ឋាភិបាល។
រដ្ឋភិបាលថៃ បានបញ្ជាទិញវ៉ាក់សាំងរបស់ក្រុមហ៊ុន AstraZeneca ចំនួន៦១លានដូស ក្នុងឆ្នាំ២០២០។ វ៉ាក់សាំងនេះ នឹងត្រូវផលិតនៅប្រទេសថៃដោយក្រុមហ៊ុនឱសថ Siam Bioscience ក្រោយសម្រេចបានកិច្ចព្រមព្រៀងជាមួយក្រុមហ៊ុន AstraZeneca ។ ក្រុមហ៊ុន Siam Bioscience គ្រប់គ្រងដោយការិយាល័យទ្រព្យសម្បត្តិមហាក្សត្រ។
ការចុះកិច្ចព្រមព្រៀងនេះហើយជាដើមចមនៃការរិះគន់របស់លោក Thanathorn ។ លោកនិយាយថា កិច្ចព្រមព្រៀងនេះខ្វះតម្លាភាព ព្រោះក្រុមហ៊ុន Siam Bioscience មានប្រៀបជាងក្រុមហ៊ុនដទៃ។ លោកបន្ថែមថា រដ្ឋាភិបាលថៃ ពឹងផ្អែកមួយភាគធំលើវ៉ាក់សាំងAstraZeneca ជាជាងរកប្រភពវ៉ាក់សាំងផ្សេងទៀតដែលជាហេតុនាំឲ្យថៃមានភាពយឺតយ៉ាវក្នុងការចាក់វ៉ាក់សាំង ដោយត្រូវរង់ចាំដែលខែមិថុនា ខណៈប្រទេសមួយចំនួនបានចាប់ផ្តើមចាក់វ៉ាក់សាំងហើយ។
ក្នុងសន្និសីទសារព័ត៌មាននៅថ្ងៃទី២១ ខែមករា លោក Thanathorn លើកឡើងទៀតថា ការចរចាក្នុងការជ្រើសរើសក្រុមហ៊ុនផលិតវ៉ាក់សាំង AstraZeneca ពុំបានឆ្លងកាត់បានឆ្លងកាត់ដំណាក់កាលជ្រើសរើស ឬប្រៀបធៀបសមត្ថភាពជាមួយក្រុមហ៊ុនឱសថក្នុងស្រុកឯទៀតឡើយ។ លោកក៏លើកជាសំណួរថា ហេតុអ្វីបានជាក្រុមហ៊ុន Siam Bioscience ជាក្រុមហ៊ុនតែមួយគត់ដែលទទួលបានបានសិទ្ធិក្នុងការផលិតវ៉ាក់សាំង។
បន្ថែមពីនេះ អ្នកនយោបាយប្រឆាំង និងជាមេដឹកនាំចលនាវឌ្ឍនភាពថៃ និយាយថាមកដល់ពេលនេះរដ្ឋាភិបាលជោគជ័យក្នុងការទទួលបានវ៉ាក់សាំងចំនួន២៦លានដូសតែប៉ុណ្ណោះ គួបផ្សំ២លានដូសទៀតពីក្រុមហ៊ុនចិន Sinovac ។ អ្នកនយោបាយរូបនេះចោទថា រដ្ឋាភិបាលលោក ប្រាយុទ្ធ យកមាត្រា១១២ ដែលចែងពីការការពារមហាក្សត្រដើម្បីបំបិទសំឡេងរបស់លោក។
លោកThanathorn ត្រូវបានតុលាការធម្មនុញ្ញថៃហាមមិនឲ្យធ្វើនយោបាយរយៈពេល១០ឆ្នាំ ហើយបក្សរបស់លោកត្រូវបានរំលាយដោយសារទទួលកម្ចីមិនស្របច្បាប់។ បក្សរបស់លោកទទួលបានសំឡេងច្រើនគួរសម ជាពិសេសក្នុងចំណោមយុវជនថៃ ក្នុងការបោះឆ្នោតសាកលឆ្នាំ២០១៩៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
