COVID-19
ជាតិ
សង្គមជាតិ
COVID-19៖ អាណាព្យាបាលព្រមានមិនឲ្យកូនរៀនតាមអនឡាញ៣ខែ បើសាលារៀនCIA មិនបញ្ចុះតម្លៃតាមបំណង
ទិដ្ឋភាពអាណាព្យាបាលសិស្សដែលបានមកទាមទារដល់មុខសាលារៀនCIA FRIST International School ឲ្យបញ្ចុះតម្លៃលើការបង់ថ្លៃការសិក្សាតាមអនឡាញ នាព្រឹកថ្ងៃទី២៥ ខែមេសា
×![]()
ភ្នំពេញ៖ អាណាព្យាបាលសិស្សមួយចំនួន បានបន្តទាមទារឲ្យសាលាCIA FIRST International School បញ្ចុះតម្លៃត្រឹម៥០ភាគរយ លើការបង់ថ្លៃសិក្សាតាមអនឡាញក្នុងអំឡុងកូវីដ-១៩ នាព្រឹកថ្ងៃទី២៥ ខែមេសានេះ ។ អាណាព្យាបាលសិស្ស បានប្រាប់ដល់សារព័ត៌មានថ្មីថា បើខាងសាលានៅតែមិនអាចសម្រេចបញ្ចុះតម្លៃត្រឹម៥០ភាគរយ តាមការស្នើសុំទេ ពួកគេនឹងផ្តាច់ការបង់ថ្លៃសិក្សាតាមអនឡាញរយៈ៣ខែសិន។
«រៀនតាមអនឡាញ គិតតម្លៃ៥០ភាគរយ» «ពហិការរៀនតាមអនឡាញ បើនៅគិតតម្លៃ១០០ភាគរយ»។ នេះជាសំណេរលើនៅក្រដាសរបស់អាណាព្យាបាលសិស្សប្រមាណ១០០នាក់ ដែលបានទាមទារឱ្យខាងសាលារៀនបញ្ចុះថ្លៃសិក្សាសម្រាប់កូនៗរបស់ពួកគេ។
លោក ហេង តូច ដែលមានកូន២នាក់រៀននៅសាលា CIA FIRST International School បានបញ្ជាក់ថា ការណ៍ដែលលោកមកទាមទារឲ្យសាលាបញ្ចុះតម្លៃនេះ ដោយសារតែលោកខ្វះលទ្ធភាពបង់ថ្លៃសាលាកូន ក្រោយពីលោកផ្អាកមុខរបររកស៊ី២ខែមកហើយ។ មានសម្បុរស្រអែម ពាក់អាវយឺត ស្លៀកខោប៊យ បុរសវ័យជាង៤០ឆ្នាំរូបនេះ បាននិយាយដូច្នេះថា៖«ការចំណាយលើការសិក្សាកូនរបស់ខ្ញុំមួយខែវាចូលជិត៨០០ដុល្លារហើយ ខ្ញុំសព្វថ្ងៃផ្អាកមុខរបរលក់ស៊ុបមួយរយៈសិន ព្រោះតែវិបត្តិកូវីដ លក់មិនដាច់ ដល់ពេលអ៊ីចឹងយើងអត់មានចំណូលសម្រាប់ផ្គត់ផ្គង់លើការចំណាយការសិក្សាកូន»។
គិតមកត្រឹមថ្ងៃទី២៥ ខែមេសានេះ អាណាព្យាបាលសិស្សបានមកទាមទារនៅមុខសាលា CIA FIRST International School ចំនួន៤លើកហើយ ខណៈភាគីសាលាបានសម្រេចបញ្ចុះតម្លៃពី១៥ ទៅ២៥ភាគរយប៉ុណ្ណោះ។ តែពួកគេនៅតែមិនសុខចិត្ត និងបន្តទាមទារឲ្យសាលាបញ្ចុះតម្លៃត្រឹម៤៥ ទៅ៥០ភាគរយ ទើបពួកគេឯកភាពឲ្យកូនរៀនបន្តតាមអនឡាញ។
ស្ត្រីដែលជាអាណាព្យាបាលសិស្សម្នាក់ទៀតដែលសុំមិនបញ្ជេញឈ្មោះ បានមើលឃើញពីគុណភាពការរៀនតាមអនឡាញរបស់កូន ហាក់បីមិនទាន់ដល់កម្រិត ដែលសមស្របនឹងការចំណាយលើការសិក្សាកូនខ្លួនឡើយ។ ស្ត្រីរូបនេះ និយាយដូច្នេះថា៖«គុណភាពរៀនតាមអនឡាញ មិនដូចនឹងការមករៀននៅសាលាផ្ទាល់ទេ ចំពោះសាលាឲ្យយើងបង់១០០ភាគរយវាអត់ត្រូវទេ ព្រោះអ្វីៗគ្រប់យ៉ាង និងការចំណាយវាធ្លាក់មកលើបន្ទុក និងខុសត្រូវលើឪពុកម្តាយទាំងអស់។ ណាមួយការរៀនតាមអនឡាញក៏ជួបផលលំបាកសម្រាប់កូនខ្ញុំ។សេវាអ៊ីនធឺណិតផ្ទះខ្ញុំរៀងយឺត កូនខ្ញុំរៀនតាមអនឡាញ ចូលៗ ពេលខ្លះលាតចេញពីក្រុមដែលកំពុងតែបង្រៀនហ្នឹង។ ដូច្នេះការរៀនតាមអនឡាញរបស់កូនខ្ញុំវាមិនទៀងទាត់ឡើយ »។
អាណាព្យាបាលទាំងពីរនាក់ខាងលើនេះ គឺសុទ្ធតែសម្រេចចិត្តថា បើខាងសាលាមិនបញ្ចុះតម្លៃលើការសិក្សាតាមអនឡាញត្រឹម៥០ភាគរយទេនោះ ពួកគេនឹងបង្គំចិត្តផ្អាកការបង់ថ្លៃលើការសិក្សាតាមអនឡាញរយៈពេល៣ខែសិន។
កន្លងមកភាគីសាលារៀនក៏ទទួលស្គាល់ពីស្ថានភាពដ៏លំបាករបស់អាណាព្យាបាលសិស្សនេះ ប៉ុន្តែពួកគេ ក៏មានផលលំបាកផ្ទាល់ខ្លួនដូចគ្នា។ នោះគឺការចំណាយលើបុគ្គលិក ការជួលអគារសាលារៀន និងកម្ចីធនាគារ ដែលសងវិញជាដើម ។
ជុំវិញបញ្ហានេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន អំពាវនាវឱ្យអាណាព្យាបាលសិស្ស និងម្ចាស់សាលារៀនឯកជន សម្បទានគ្នាទៅវិញទៅមក លើថ្លៃសិក្សារបស់សិស្ស នៅក្នុងបរិបទវិបត្តិកូវីដ១៩នេះ។
ថ្លែងប្រាប់សារព័ត៌មានថ្មីៗ លោក ហង់ ជួន ណារ៉ុន បានលើកឡើងយ៉ាងដូច្នេះថា៖«សុំឱ្យមានការយោគយល់គ្នា ចរចាគ្នារកដំណោះស្រាយ និងសម្បទានគ្នាទៅវិញទៅមក ព្រោះអីកូវីដហ្នឹង ប៉ះពាល់ទាំងអាណាព្យាបាល និងម្ចាស់សាលា»៕
Tag:
សិស្ស
ឪពុកម្តាយ
សិក្សា
អនឡាញ
© រក្សាសិទ្ធិដោយ thmeythmey.com
