គួរកត់សម្គាល់ថា កាលពីថ្ងៃទី១២ មីនា ក្រសួងបានសម្រេចបិទតែសាលារដ្ឋ និងឯកជន នៅក្នុងស្រុកគិរីសាគរ ក្នុងខេត្តកោះកុង ប៉ុណ្ណោះ ប៉ុន្តែដោយសារឆ្លងរាលដាលនៅតែកើតមាននៅក្នុងស្រុកមួយនេះ បង្ខំឱ្យក្រសួងសម្រេចសាលាទូទាំងខេត្តតែងម្តង។ 

 

គិតត្រឹមពេលនេះ មានរាជធានីភ្នំពេញ កណ្តាល ព្រៃវែង កោះកុង ដែលផ្អាកសាលារៀនរដ្ឋ និងឯកជន រួមទាំងគ្រឹះស្ថានអប់រំបណ្តុះបណ្តាលបច្ចេកទេសទាំងអស់។ ចំណែកនៅព្រះសីហនុ និងសៀមរាប គឺគ្រាន់តែផ្អាកសាលារៀនមួយចំនួន ដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈ។ ចំពោះខេត្តកំពង់ចាម ដែលជាខេត្តគំរាមកំហែងពីជំងឺកូវីដ-១៩ដែរនោះ គឺគ្រាន់តែមានការផ្អាកគ្រឹះស្ថានអប់រំបណ្តុះបណ្តាលបច្ចេកទេស ប៉ុន្តែមិនទាន់មានការផ្អាកសាលារៀននៅឡើយទេ។

 

 

គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប១៣០៥នាក់។ ករណីសហគមន៍២០កុម្ភៈ មានដល់ទៅ៧៩២ នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។ អ្នកជំងឺចំនួន ៦៤៧នាក់ បានសះស្បើយ ខណៈអ្នកចំនួន ៦៥៦ នាក់ទៀត កំពុងបន្តសម្រាកព្យាបាល។ កាលពីថ្ងៃទី១១ខែមីនាកន្លងទៅ មានបុរសម្នាក់បានបាត់បង់ជីវិត៕