COVID-19
ជាតិ
×![]()
ដោយ: ខន ចំប៉ា
ភ្នំពេញ៖ កម្ពុជាធ្លាប់បានរកឃើញវីរុសប្រភេទថ្មីពីឥណ្ឌា(B.1.617) ចំនួន១ករណី ប៉ុន្តែអ្នកជំងឺបានជាសះស្បើយហើយ។ នេះជាការបញ្ជាក់របស់លោក ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល តាមរយៈកិច្ចសម្ភាសមួយជាមួយទូរទស្សន៍ BTV នៅយប់ថ្ងៃទី១១ ឧសភានេះ។ អ្នកនាំពាក្យរូបនេះបញ្ជាក់ទៀតថា វីរុសបំប្លែងពីប្រទេសឥណ្ឌា នៅមិនទាន់រីកសាយភាយនៅក្នុងប្រទេសកម្ពុជានៅឡើយទេ។
តាមរយៈកិច្ចសម្ភាសដដែល លោកស្រី ឱ វណ្ណឌីន បញ្ជាក់ថា វីរុសកូវីដ-១៩ បំប្លែងពីឥណ្ឌា ត្រូវបានរកឃើញនៅកម្ពុជាតាំងពីថ្ងៃទី ២៥ ខែមេសាមកម្ល៉េះលើអ្នកដំណើរបរទេស ហើយមកទល់ពេលនេះ ហើយអ្នកជំងឺរូបនោះ ក៏បានសះស្បើយហើយដែរ។ អ្នកនាំពាក្យក្រសួងសុខាភិបាល បន្ថែមដូច្នេះ៖ «យើងរកឃើញតែ១ករណី ហើយក៏ជាករណីនាំចូល ហើយគាត់ក៏បានជាសះស្បើយរួចទៅហើយដែរ។ យើងក៏មិនទាន់ឃើញថាមានការរីកសាយភាយ នៅក្នុងប្រទេសយើងនេះនៅឡើយទេ»។
ទោះជាមិនទាន់ករណីឆ្លងរីកសាយភាយនៅក្នុងប្រទេសកម្ពុជា ក៏ដោយប៉ុន្តែវីរុសកូវីដ-១៩ បំប្លែងខ្លួនពីឥណ្ឌានេះ កំពុងមានវត្តមាននៅក្នុងបណ្តាប្រទេសអាស៊ានជាច្រើនរួមមាន វៀតណាម ថៃ ឥណ្ឌូណេស៊ី ម៉ាឡេស៊ី សិង្ហបុរី និងហ្វីលីពីន។ មានតែឡាវ មីយ៉ាន់ម៉ា និងព្រុយណេប៉ុណ្ណោះ ដែលមិនទាន់ប្រកាសរកឃើញវីរុសបំប្លែងខ្លួនពីឥណ្ឌា(B.1.617)។ កូវីដ-១៩ បំប្លែងខ្លួនថ្មីល្បីខាងឆ្លងរហ័ស ចម្លងលឿន និងអាចគេចពីប្រព័ន្ធការពារផងនោះ ត្រូវបានអង្គការសុខភាពពិភពលោក ចាត់ទុកជាប្រភេទធ្វើឱ្យមានក្ដីបារម្ភនៅកម្រិតពិភពលោក( Variant of Concern)។ វីរុសបំប្លែងថ្មីចំនួន ៣ប្រភេទទៀត ដែលស្ថិតក្នុងថ្នាក់នេះដែរ មានវីរុសបំប្លែងខ្លួននៅអាហ្វ្រិកខាងត្បូង នៅប្រេស៊ីល និងអង់គ្លេស។
ក្រៅពីបញ្ជាក់ពីវត្តមានវីរុសកូវីដ-១៩ ប្រភេទបំប្លែងថ្មីដែលមានប្រភពពីប្រទេសឥណ្ឌា អ្នកជំនាញរូបនេះ ក៏បានលើកឡើងជាថ្មីដែរ ចំពោះប្រភេទវីរុសកូវីដ-១៩ថ្មី ដែលមានប្រភពពីអង់គ្លេស (B.1.1.7) ដែលកំពុងតែរីករាលដាលយ៉ាងសកម្ម និងខ្លាំងក្លានៅក្នុងប្រទេសកម្ពុជា។ លោកស្រី ឱ វណ្ណឌីន បានបញ្ជាក់ថា គិតត្រឹមថ្ងៃទី៩ ឧសភា កម្ពុជាបានរកឃើញប្រភេទវីរ៉ុសបំប្លែថ្មីពីអង់គ្លេសនេះ លើអ្នកជំងឺកូវីដ-១៩ សរុប១២១នាក់ហើយ ចាប់តាំងពីរកឃើញដំបូងលើអ្នកដំណើរបរទេស៣នាក់ កាលពីថ្ងៃទី១៤កុម្ភៈមកម្ល៉េះ។
សូមបញ្ជាក់ថា បច្ចុប្បន្ន កម្ពុជាមានអ្នកឆ្លងកូវីដ-១៩ សរុប ២០ ២២៣នាក់ហើយ ដោយករណីនាំចូលមាន៥៨៨ករណី។ ចំណែកអ្នកជាសះស្បើយ៨ ១៧០នាក់ ខណៈអ្នកស្លាប់កើនដល់ ១៣១នាក់៕
© រក្សាសិទ្ធិដោយ thmeythmey.com
