លោក ទិត្យ សាមឿន ចៅសង្កាត់ផ្សារដើមគ បានបញ្ជាក់ប្រាប់​សារព័ត៌មានថ្មីៗថា នៅរសៀលនេះ ក្រុមគ្រូពេទ្យនឹងធ្វើតេស្តអាជីវករផ្សារដើមគ ជាង២០០នាក់ ដើម្បីទប់ស្កាត់ជំងឺកូវីដ-១៩។  លោកចៅសង្កាត់ផ្សារដើមគបានអះអាងថា ​អាជីវករទាំងនោះ មានជាប់ពាក់ព័ន្ធនឹងអ្នកជំងឺកូវីដ-១៩ បំប្លែងថ្មី«ដែលតា»ម្នាក់ ដែលចេញចូលក្នុងផ្សារនេះ។​ 
 

ក្រៅពីអាជីវករ អាជ្ញាធរក៏នឹងប្រមូល និងណែនាំដល់ពលរដ្ឋ នៅម្តុំផ្សារដើមគ ដែលជាប់ពាក់ព័ន្ធនឹងអ្នកជំងឺ មកធ្វើតេស្តរកជំងឺកូវីដ-១៩ផងដែរ។ យ៉ាងណាក៏ដោយ អាជ្ញាធរមិនទាន់មានចំណាត់ការលើការបិទផ្សារនៅឡើយទេ។ ​បើតាម​​ចៅសង្កាត់ផ្សារដើមគ ដោយលោកបានបន្តថា ប្រសិនជាអាជីវករណា គេចវេះ មិនមកយកសំណាករកជំងឺកូវីដ-១៩ ​ពួកគេ នឹងមិនអនុញ្ញាតឲ្យចូលលក់ដូរនៅក្នុងផ្សារវិញនោះទេ។

​

ខណៈ​អាជីវករផ្សារដើមគកំពុងយកសំណាក លទ្ធផលសំណាករបស់អាជីវករនៅផ្សារសិនជូរីក៏បានបង្ហាញថា អាជីវករចំនួន១៦២នាក់មានអវិជ្ជមានកូវីដ-១៩ទាំងអស់​។ នេះបើតាមលោក ភា ចំរើន អនុគណៈកម្មការគ្រប់គ្រងផ្សារសិនជូរី ដែលបញ្ជាក់ប្រាប់សារព័ត៌មានថ្មីៗ។ 

 

បើតាម​លោក ភា ចំរើន លទ្ធផលសំណាករបស់អាជីវករផ្សារសិនជូរី ដែលអវិជ្ជមានទាំងនោះ​ គឺពួកគេនឹងអាចបន្តលក់នៅក្នុងផ្សារជាធម្មតា ដោយមិនតម្រូវឲ្យធ្វើចត្តាឡីស័កឡើយ​។ «ផ្សារនឹងត្រូវបើកដំណើរការធម្មតា ពីព្រោះអត់មានការឆ្លងជំងឺកូវីដ-១៩»។ នេះជាការលើកឡើងរបស់ លោកអនុគណៈកម្មការគ្រប់គ្រងផ្សារសិនជូរី ដោយបញ្ជាក់ថា ខាងផ្សារនឹងពង្រឹងវិធានការការពារ និងរឹតបន្តឹងជាងមុនដើម្បីទប់ស្កាត់ជំងឺកូវីដ-១៩៕