ក្រសួងការងារបានចេញសេចក្ដីជូនដំណឹងទាំងយប់ ពីវឌ្ឍនភាពទំនាស់ណាហ្គាវើលដ៍ និងអំពាវនាវជាថ្មីឲ្យក្រមអ្នកតវ៉ាបញ្ឈប់សកម្មភាព។

 

លិខិតដែលចេញនៅយប់ថ្ងៃទី១០មីនា របស់ក្រសួងការងារ បានលើកឡើងពីឫសគល់នៃវិវាទការងារនេះ ដោយសារវិបត្តិកូវីដ-១៩ ទើបមានការកាត់បន្ថយបុគ្គលិក រហូតដល់រហូតដល់១៦២១នាក់ ក្នុងចំណោមបុគ្គលិកសរុប៨៣៧១នាក់។ ចាប់តាំងពីខែមេសា ឆ្នាំ២០២១ នៃគម្រោងកាត់បន្ថយនេះ ត្រូវបានបុគ្គលិកជំទាស់ ហើយទាមទារឲ្យបុគ្គលិក ដែលជាសមាជិតសហជីព៣៧៣នាក់ ចូលបម្រើកការងារវិញ។ ក្រៅពីនេះ គឺមានលក្ខខ័ណ្ឌ៨ចំណុចផ្សេងទៀត មានដូចជា បញ្ឈប់គេងប្រវ័ញ្ចលើបុគ្គលិកហាត់ការដោយទទួលពួកគេជាបុគ្គលិកពេញសិទ្ធិ ផ្ដល់ប្រាក់សំណង់តាមច្បាប់បុគ្គលិកដែលបានកាត់ឈ្មោះ និងពិនិត្យឡើងវិញលើការដកប្រធានផ្នែកកាស៊ីណូជាដើម។ 

 

វិវាទនេះ ក្រសួងបានសម្របសម្រួល៩លើក ប៉ុន្តែនៅតែមិនដាច់ស្រេច រហូតដល់បច្ចុប្បន្ន។ ដើម្បីឈានដល់ការបញ្ចប់វិវាទដោយសន្តិវិធី ក្រសួងបានស្នើយ៉ាងដូច្នេះ៖ «ជាថ្មីម្ដងទៀត…ក្រសួងសូមអំពាវនាវដល់បងប្អូនបាតុករដែលជាអតីតបុគ្គលិក និងបុគ្គលិករបស់ក្រុមហ៊ុន ណាហ្គាវើលដ៍ ដែលបានចូលរួមធ្វើបាតុកម្មដោយអវត្តមានពីកន្លែងការងារ សូមបញ្ឈប់នូវសកម្មភាពដែលបង្កជាកំហុសនាំឲ្យប៉ះពាល់ដល់ផលប្រយោជន៍ស្របច្បាប់របស់ខ្លួន»។ 

 

ទន្ទឹមនឹងនេះ ក្រសួងបញ្ជាក់ថា នឹងបន្តសហការជាមួយស្ថាប័នពាក់ព័ន្ធ ដើម្បីដោះស្រាយរាល់កង្វល់របស់ក្រុមអ្នកតវ៉ា និងគិតគូរដល់សិទ្ធិស្របច្បាប់របស់វិនិយោគិនផងដែរ។