ប្រេងឆៅរបស់កម្ពុជា ចំនួន ២៩៥ ,០០០បារ៉ែល ដែលក្រុមហ៊ុន KrisEnergy បូមបានពីប្លកA នៃដែនសមុទ្រកម្ពុជា ត្រូវបាននាវាMT Strolovos របស់ក្រុមហ៊ុន World Tankers Management  លួចដឹកចេញពីដែនទឹកកម្ពុជា កាលពីអំឡុងខែមិថុនា ​ឆ្នាំ២០២១។ មកទល់បច្ចុប្បន្ន កម្ពុជាមិនទាន់មានតម្រុយយកប្រេងទាំងនោះ មកវិញបានឡើយ។ 

 

ពាក់ព័ន្ធនឹងការនិតីវិធីក្នុងការយកប្រេងឆៅរបស់កម្ពុជាមកវិញនេះ លោក ជៀប សួរ ដែលជាអគ្គនាយកប្រេងកាតនៃក្រសួងរ៉ែ និងថាមពល បានលើកឡើងថា ការងារនេះ គឺដោះស្រាយមិនទាន់ចប់នៅឡើយទេ។ លោកបានបញ្ជាក់ប្រាប់សារព័ត៌មានថ្មីៗ (ThmeyThmey)តាមប្រព័ន្ធតេលេក្រាមនាព្រឹកថ្ងៃទី២៣មីនា ឆ្នាំ២០២២ ដូច្នេះ​៖ « បច្ចុប្បន្ន មេធាវីយើងកំពុងពិភាក្សា ជាមួយតំណាងក្រុមហ៊ុន KrisEnergy និងក្រុមហ៊ុនកប៉ាល់ MT Strovolos។ ពេលចប់យើងនឹងជូនដំណឹង»។​ 

 

ជុំវិញនិតីវិធីបញ្ចប់លើប្រេងឆៅនេះ អគ្គនាយកប្រេងកាតនៃក្រសួងរ៉ែ និងថាមពល ​មិនអាចបញ្ជាក់បានឡើយ ខណៈកម្ពុជាបានដាក់ឯកសារបន្ថែមជាបន្តបន្ទាប់ លើបណ្ដឹងទាមទារប្រេងឆៅប្រមាណ៣០​ម៉ឺន​បារ៉ែល ត្រលប់មកវិញ ទៅកាន់ប្រទេសឥណ្ឌូណេស៊ី។ 

 

សូមជម្រាបថា អាជ្ញាធរនៃប្រទេសឥណ្ឌូណេស៊ី បានឃាត់មនុស្សជិត២០នាក់ និងនាវា MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១។ មូលហេតុនៃការលួចដឹកប្រេងទាំងនេះចេញពីកម្ពុជា គឺក្រោមហេតុផលក្រុមហ៊ុន KrisEnergy ជំពាក់បំណុលម្ចាស់នាវាMT Strovolos ដែលក្រុមហ៊ុនKrisEnergy បានជួលមកផ្ទុកប្រេងរបស់កម្ពុជាដែលបូមបាន។

 

ពាក់ព័ន្ធនឹងករណីលួចដឹកប្រេងឆៅនេះ កន្លងមកក្រុមហ៊ុន World Tankers Management ដែលគ្រប់គ្រងលើនាវា ​MT Strovolos បានចេញមុខបដិសេធលើអំពីលួចដឹកប្រេងឆៅជិត៣០ម៉ឺនបារ៉ែល ចេញពីដែនទឹកកម្ពុជា។ លើសពីនេះ ក្រុមហ៊ុននេះបានទាមទារឱ្យរដ្ឋាភិបាលប្រទេសឥណ្ឌូណេស៊ី ដោះលែង​នាវិក​របស់ខ្លួនមកវិញ ​បន្ទាប់ពី​កងទ័ពជើងទឹក​ឥណ្ឌូណេស៊ី ​បានចាប់រឹបអូស​នាវា​ MT Strovolos ​ទៅតាមការស្នើសុំ​របស់អាជ្ញាធរ​កម្ពុជា៕