កម្ពុជា និងវៀតណាម បានសម្រេចបន្ទាត់ព្រំដែនបាន ៦ភាគរយបន្ថែមទៀត ដែលស្មើនឹង៩០ភាគរយហើយ។ នេះបើតាមសម្ដេច ហ៊ុន សែន ថ្លែងក្នុងពិធីជួបសំណេះសំណាលជាមួយពលរដ្ឋខ្មែររស់នៅអាម៉េរិក និងកាណាដា នៅថ្ងៃទី១២ ឧសភា នាទីក្រុងវ៉ាស៊ីនតោន សហរដ្ឋអាម៉េរិក។
«អ៊ីចឹងគេថា ហ៊ុន សែន លក់ដី ,ហ៊ុន សែន លក់ដី តើដីកន្លែងណា ដែល ហ៊ុន សែន លក់? »។ នេះជាការលើកឡើងរបស់សម្ដេច ហ៊ុន សែន ដោយបានបញ្ជាក់ថា គណៈកម្មាធិការចម្រុះកិច្ចការព្រំដែនកម្ពុជា និងវៀតណាម នឹងចុះហត្ថលេខាលើកិច្ចព្រមព្រៀង ស្តីពីព្រំដែនទ្វេភាគី ៦ភាគរយបន្ថែមទៀត នៅពេលខាងមុខ។
ប្រមុខរដ្ឋាភិបាល បាននិយាយថា៖«ឥឡូវចុងក្រោយនេះ ការចរចារវាងគណៈកម្មាធិការព្រំដែនទាំងពីរ(កម្ពុជា-វៀតណាម) បានសម្រេច៦ភាគរយបន្ថែមទៀត បូកទៅវាបាន៩០ភាគរយ»។
ត្រង់ចំណុចនេះ នាយករដ្ឋមន្រ្តី ហ៊ុន សែន បានឆ្លៀតផ្លែផ្កាទៅអ្នករិះគន់សម្ដេចពីបញ្ហាព្រំដែន ក្នុងន័យនេះថា បើសម្ដេច កាត់ដីឱ្យវៀតណាមនោះ មិនមែនរដ្ឋាភិបាលសម្ដេច សុខចិត្តចំណាយពេលរាប់ឆ្នាំ ដើម្បីចរចាជាមួយវៀតណាម រកច្រកផ្លូវគូសបន្ទាត់ និងបោះបង្គោលព្រំដែនឡើយ។
« ក្នុងចំណុចនេះ ខ្ញុំគួរតែនិយាយបន្តិចដែរថា បើគួរតែឱ្យដីគេដដែល ចាំបាច់អីចរចាយូរឆ្នាំម្ល៉េះ។ និយាយគ្នាឱ្យច្បាស់នូវកន្លែងហ្នឹង ចាំបាច់អីទៅចុះហត្ថលេខា ម្ដងបាន៨៤ភាគរយ ឥឡូវសម្រេចបាន៦ភាគរយទៀត ហើយឯកភាពគ្នាថា នឹងចុះហត្ថលេខានៅក្នុងឆ្នាំ២០២២ អា(ព្រំដែន) ៦ភាគរយ»។ នេះបើតាមសម្ដេច ហ៊ុន សែន ដែលបានបន្ថែមថា ក្រោយចុះហត្ថលេខាហើយ ភាគីកម្ពុជា និងវៀតណាម នឹងបោះបង្គោលព្រំដែន លើទីតាំងកំណត់៦ភាគរយនេះ ដោយបង្គោលព្រំដែននីមួយៗ សុទ្ធតែមានការកំណត់សម្គាល់ទីតាំងដោយប្រព័ន្ធផ្កាយរណប។
កាលពីថ្ងៃទី៥ធ្នូ ២០១៩ ព្រះមហាក្សត្រព្រះបាទ នរោត្តម សីហមុនី បានចេញព្រះរាជក្រមប្រកាសឲ្យប្រើសន្ធិសញ្ញាព្រំដែនបំពេញបន្ថែម២០១៩ កម្ពុជា-វៀតណាម។សន្ធិសញ្ញាបំពេញបន្ថែម ដែលរដ្ឋាភិបាលកម្ពុជា-វៀតណាម ចុះហត្ថលេខានៅឆ្នាំ២០១៩នេះ គឺទទួលស្គាល់បង្គោលព្រំដែនដែលភាគីទាំងពីរ បានបោះរួចរាល់ចំនួន ៨៤ភាគរយ។ ចំណែកសល់១៦ភាគរយទៀត ភាគីទាំងពីរបន្តពិភាក្សា និងដោះស្រាយបន្តទៀត។
ក្រោយមកនៅថ្ងៃទី១ ខែសីហា ឆ្នាំ២០២០ គណៈកម្មាធិការកិច្ចការព្រំដែនកម្ពុជានិងវៀតណាម បានចុះហត្ថលេខាលើឯកសារផែនទីថ្មី មានឈ្មោះជាផ្លូវការថា ផែនទីលេខាព្រំដែន ខ្នាត ១/២៥ ០០០ នៅច្រកទ្វារព្រំដែនអន្តរជាតិម៉ុកប៉ៃ ខេត្តតៃនិញ ប្រទេសវៀតណាម។
ផែនទីខ្នាត ១/២៥ ០០០ គឺជាផែនទី ដែលបង្ហាញពីការកំណត់ខណ្ឌសីមានិងការបោះបង្គោលព្រំដែន៨៤ភាគរយនេះឯង។ ផែនទីថ្មីនេះ ត្រូវបានបោះពុម្ពសរុប៥០០ផ្ទាំង ដោយប្រទេសដាណឺម៉ាក។ ២៥០ផ្ទាំង ប្រគល់មកឲ្យកម្ពុជា ហើយ២៥០ផ្ទាំង ប្រគល់ទៅឲ្យវៀតណាម។ ភាគទាំងពីរ ប្តេជ្ញាចិត្តទាំងអស់គ្នា ថានឹងពន្លឿនឲ្យឆាប់ចប់លើការបោះបង្គោលព្រំដែន១៦ភាគរយទៀត ដែលនៅសល់។
កម្ពុជា-វៀតណាម បានផ្លាស់ប្ដូរលិខិតតូបករណ៍នៃការផ្ដល់សច្ចាប័នលើសន្ធិសញ្ញាបំពេញបន្ថែម២០១៩ ក្រោយបំពេញនីតិវិធីផ្ទៃក្នុង រវាងប្រទេសទាំង២ចប់សព្វគ្រប់ កាលពីថ្ងៃទី២២ធ្នូ ២០២០ តាមរយៈលោក ប្រាក់ សុខុន រដ្ឋមន្រី្តក្រសួងការបរទេសកម្ពុជា និងសហប្រតិបត្តិការអន្តរជាតិ និងលោក ផាម ប៊ិញមិញ រដ្ឋមន្ត្រីការបរទេសវៀតណាម ដើម្បីយកទៅអនុវត្តការងារព្រំដែននេះ៕