ទោះអាយុជាង៥០ឆ្នាំ តែMercedes-Benz នៅតែហំហួន លម្អផ្ទះបុរាណមួយកន្លែងក្នុងក្រុងភ្នំពេញ

ជាតិ

រថយន្ត

27, Jun 2022 , 7:59 pm

រូបភាព

ភ្នំពេញ៖ ភូមិគ្រឹះសសរ១០០ នៅសង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ សុទ្ធតែផ្ទះឈើរចនាបថខ្មែរបុរាណ។ នៅបរិវេណផ្ទះបុរាណនេះ ក៏មានរថយន្ដបុរាណ៥គ្រឿងដែរ ដែលត្រូវបានម្ចាស់ដាក់តាំងលម្អ និងមាន១គ្រឿងទៀតដែលអាចជិះបាន។ គឺជាឡានពីជំនាន់ផ្សេងៗ ដែលត្រូវបានផលិត ពីប្រហែលឆ្នាំ១៩២២ ដល់ឆ្នាំ១៩៧០។ ក្នុងនោះ ៣គ្រឿង ជាម៉ាកបារាំង RENAULT និង CITROËN ហើយ២គ្រឿងជាម៉ាកអាល្លឺម៉ង់ VOLKSWAGEN និង MERCEDES-BENZ ។

រថយន្ដម៉ាក MERCEDES-BENZ នេះ គឺជាប្រភេទW114 ម៉ូឌែល 230 ពណ៌ពងមាន់ ផលិត ឆ្នាំ១៩៦៨។ ទោះវាមានអាយុកាលជាង ៥០ឆ្នាំទៅហើយ ប៉ុន្តែរថយន្តមួយគ្រឿងនេះ នៅតែធន់ មាំ និងឈរយ៉ាងហំ បង្អួតរាង លម្អគេហដ្ឋានបុរាណនេះ។

ដើម្បីជ្រាបច្បាស់ សូមអញ្ជើញលោកអ្នកទស្សនាវីដេអូខាងក្រោមនេះ៖

ម៉ូឌែលនេះ មានលេខកូដក្រុមហ៊ុន W114.015 ។ លេខ២៣០ មកពីម៉ាស៊ីនមានចំណុះ ២៣០សង់ទីលីត្រ (តាមពិតត្រឹម ២២៩២ ម៉ីលីលីត្រ)។ ត្រូវបានផលិតអស់ ១៥២ ៨២២ គ្រឿង ពីឆ្នាំ១៩៦៨ ដល់ឆ្នាំ១៩៧៣។ ឆ្នាំ១៩៧៣ MERCEDES-BENZ ចាប់ផ្ដើមផលិតប្រភេទ W114 ជំនាន់ទី២ (ជំនាន់ចុងក្រោយ)។ ដោយឡែកពេលនោះ MERCEDES-BENZ ក៏ឈប់ផលិត W114 ម៉ូឌែល 230 ។

MERCEDES-BENZ W114 និង W115 មានម៉ាស៊ីនខ្លាំង ព្រោះរថយន្ដប្រភេទនេះ មានទម្ងន់ធ្ងន់ដែរ គឺ ១ ៣០០គីឡូក្រាម។ វាស៊ីសាំងច្រើនក្នុងបរិមាណ ១៥លីត្រ ក្នុង១០០គីឡូម៉ែត្រ។ ពីដើម អាចជិះបានដល់ល្បឿនអតិបរិមា ១៣៥គីឡូម៉ែត្រ ក្នុង១ម៉ោង។ MERCEDES-BENZ W114 និង W115 ត្រូវបានផលិតពីឆ្នាំ១៩៦៨ ដល់ឆ្នាំ១៩៧៦ ចំនួនសរុបអស់ ១ ៩១៩ ០៥៦ គ្រឿង។ បុរសសញ្ជាតិបារាំង លោក BRACQ Paul ជាអ្នករចនាឡានប្រភេទទាំង២នេះ។ តាមពិតវាដូចគ្នាទាំងស្រុង ខុសគ្នាតែម៉ាស៊ីនប៉ុណ្ណោះ។ ប្រភេទ W114 មានម៉ាស៊ីន ៦ស៊ីឡាំង ហើយអាស្រ័យតាមម៉ូឌែល ប្រភេទ W115 មានម៉ាស៊ីន ៥ស៊ីឡាំង ឬ៤ស៊ីឡាំង។

កាលពីឆ្នាំ១៩៧៦ នៅប្រទេសក្រិក មានអ្នករត់ឡានតាក់ស៊ីម្នាក់ ដែលទិញឡាន MERCEDES-BENZ W115 មួយគ្រឿង ហើយប្រើរយៈពេលយូរ ជិះអស់ជាង ៤ ៦០០ ០០០ គីឡូម៉ែត្រ។ ជាចុងក្រោយ ច្បាស់ហើយមិនសូវសល់គ្រឿងពីដើមច្រើនប៉ុន្មានទេ។ ក៏ប៉ុន្តែគាត់មិនបានដូរម៉ាស៊ីនទេ។ គាត់បានគ្រាន់តែថែរក្សាវាឱ្យបានល្អបំផុត។ MERCEDES-BENZ W115 គឺជាប្រភេទរថយន្ដមួយដ៏រឹងមាំណាស់។ រហូតដល់ខាង MERCEDES-BENZ សុំទិញឡានគាត់វិញ ដើម្បីដាក់តាំងក្នុងសារមន្ទីរ MERCEDES-BENZ នៅប្រទេសអាល្លឺម៉ង់ ។

MERCEDES-BENZ ជាក្រុមហ៊ុនអាល្លឺម៉ង់ ដែលបច្ចុប្បន្នស្ថិតនៅក្នុងក្រុមសម្ព័ន្ធ DAIMLERCHRYSLER ។ ក្រុមហ៊ុននេះ ត្រូវបានបង្កើតឡើង ឆ្នាំ១៩២៦ ដោយលោក DAIMLER Paul លោក BENZ Carl និងលោក JELLINEK Emil ដែលកូនស្រីឈ្មោះ Mercédès ។

អត្ថបទទាក់ទង

លោក SHARAF Rami ពេញចិត្តបើកឡាន Mercedes-Benz ផលិតឆ្នាំ១៩៦៨ ដែលមានតែមួយគត់នៅភ្នំពេញ

អាហារដ្ឋានមួយនៅខេត្តកំពង់ឆ្នាំង តាំងបង្អួតរថយន្តបុរាណម៉ាកល្បីៗដល់ទៅ៩គ្រឿង

ឡាន Mercedes-Benz ម៉ូឌែល W114 ផលិតជិត៥០ឆ្នាំមុន នៅតែអាចបើកបរក្នុងល្បឿនលឿនបាន

រថយន្ដតែមួយ ដែលម្ចាស់ឡានខាងលើ បើកបរជាប្រចាំ គឺជា M151 ម៉ូឌែល A2 មួយគ្រឿង ដែលមានអាយុកាល ៥០ឆ្នាំហើយ។ ក្រុមហ៊ុនអាម៉េរិកាំង FORD បានចាប់ផ្ដើមសិក្សារថយន្ដ M151 ឆ្នាំ១៩៥៩។ ត្រូវបានចាប់ផ្ដើមផលិតឆ្នាំ១៩៥៩ វិញ។ ពីឆ្នាំ១៩៦២ ដល់ឆ្នាំ១៩៦៤ ត្រូវផ្ទេរការផលិតទៅឱ្យក្រុមហ៊ុន KAISER ។ បន្ទាប់មកឆ្នាំ១៩៧១ ត្រូវផ្ទេរការផលិតទៅឱ្យក្រុមហ៊ុន AM General ដែលបញ្ចប់ផលិត M151 ឆ្នាំ១៩៨២។ ឆ្នាំ១៩៨៨ ត្រូវបានផលិត ១ ០០០គ្រឿងថែមទៀត សម្រាប់ទាហានប៉ាគីស្ថាន។ រយៈពេលជិត៣០ឆ្នាំ ត្រូវបានផលិតអស់ ១០០ ០០០ គ្រឿង។ 151 គឺជាប្រភេទ ហើយអក្សរ M មកពីអក្សរកាត់ MUTT ដែលមានន័យថា Military Utility Tactical Truck ។ ដូច្នេះគឺជាឡានសម្រាប់យោធា។ វាបង្វិលកង់ទាំង៤ ដើម្បីជិះលើផ្លូវមានឧបសគ្គ ឬក្រៅផ្លូវ។ អាចទុកឈ្មោះ M ថាជាម៉ាកក៏បាន។ ក៏ប៉ុន្តែវាមិនមែនជាម៉ាកចុះបញ្ជីយ៉ាងត្រឹមត្រូវ ដូចម៉ាករថយន្ដស៊ីវិលនោះទេ។ M151 A2 ពីដើមមានទម្ងន់ត្រឹម ១ ១០០គីឡូក្រាម។ ម៉ូឌែល A2 បានជំនួសម៉ូឌែល A1 ឆ្នាំ១៩៦៨។ ក្រៅពីប្រភេទ M151 ដែលជាប្រភេទសាមញ្ញធម្មតា ក៏គេបានបង្កើតប្រភេទផ្សេងៗ ដែលបំពាក់ដំបូលកំណាត់កៅស៊ូស្ទើរតែទាំងអស់ ដូចជា M718 (សង្ក្រោះបន្ទាន់) M825 (ដឹកកាំភ្លើងធំ) MRC108 (ដឹកឧបករណ៍គមនាគមន៍)។ ល៕