ជាតិ
រដ្ឋមន្រ្តីអប់រំ៖ វិញ្ញាសាបាក់ឌុបមិនតឹងពេក មិនធូរពេក តែល្មមសម្រាប់សិស្ស
× ភ្នំពេញ៖ លោក ហង់ជួន ណារ៉ុន រដ្ឋមន្រ្តីក្រសួងអប់រំ អះអាងថា កម្រិតវិញ្ញាសាដែលក្រសួងបានចេញសម្រាប់បេក្ខជនប្រឡងសញ្ញាបត្រមធ្យមសិក្សាទុតិយភូមិ គឺមិនតឹងពេក ហើយក៏មិនធូរពេក ប៉ុន្តែល្មមសម្រាប់សិស្ស។
ក្រោយការប្រឡងសញ្ញាបត្រមធ្យមសិក្សាទុតិយភូមិ គេតែងឮពាក្យថា វិញ្ញាសាឆ្នាំនេះធូរជាងឆ្នាំមុន ឬឆ្នាំមុនធូរជាងឆ្នាំនេះ។ ចំពោះបញ្ហានេះ លោក ហង់ជួន ណារ៉ុន បញ្ជាក់បែបនេះ៖ «កម្រិតវិញ្ញាសានេះ គឺក្នុងកម្រិតមួយដែលវាមិនតឹងពេក ក៏ប៉ុន្តែមិនធូរពេក ក្នុងកម្រិតមួយដែលល្មម សម្រាប់ឱ្យសិស្ស។ ការរៀនរយៈពេល១២ឆ្នាំ គឺជាការវិនិយោគធំណាស់សម្រាប់ឪពុកម្ដាយ សម្រាប់សិស្សានុសិស្ស អ៊ីចឹង បើរៀនហើយ មិនចេះបានន័យថាការវិនិយោគនេះ នឹងខាតបង់»។
រដ្ឋមន្រ្តីក្រសួងអប់រំ បន្ថែមថា ក្រសួងតែងលើកទឹកចិត្តសិស្សឱ្យខិតខំប្រឹងប្រែងរៀនសូត្រ ដើម្បីឱ្យពួកគេអាចបន្តយកចំណេះទៅរៀននៅថ្នាក់ឧត្តម ឬទៅធ្វើការងារផ្សេងៗ។ លោករដ្ឋមន្រ្តី យល់ថា ការប្រឡងនេះ មិនមែនជាការដាក់ទោសទណ្ឌសិស្សនោះទេ តែជាការគិតគូរដល់សិស្ស។ ត្រង់ចំណុចនេះ លោក ហង់ជួន ណារ៉ុន ចង់សំដៅលើការវិនិយោគរយៈពេល១២ឆ្នាំ របស់សិស្ស និងអាណាព្យាបាល ដែលទំនុកបម្រុងលើការសិក្សារបស់កូនៗ។
លោក ហង់ជួន ណារ៉ុន កាត់វិញ្ញាសាក្នុងការប្រឡងសញ្ញាបត្រមធ្យមសិក្សាទុតិយភូមិ នៅមណ្ឌលប្រឡងវិទ្យាល័យព្រះស៊ីសុវត្ថិ កាលពីឆ្នាំ២០១៩
បើតាមក្រសួងអប់រំ ការប្រឡងនេះ មានវិញ្ញាសាចំនួន ៧មុខ សម្រាប់ថ្នាក់វិទ្យាសាស្រ្ត និងថ្នាក់វិទ្យាសាស្រ្តសង្គម។ ចំពោះថ្នាក់វិទ្យាសាស្រ្ត មានមុខវិជ្ជាដូចជា គណិតវិទ្យា, អក្សរសាស្រ្តខ្មែរ, គីមីវិទ្យា, រូបវិទ្យា, ជីវវិទ្យា, ភាសាអង់គ្លេស និងប្រវត្តិវិទ្យា ដែលជាមុខវិជ្ជាជ្រើសរើស។ ដោយឡែក ថ្នាក់វិទ្យាសាស្រ្តសង្គម មានមុខវិជ្ជាដូចជា គណិតវិទ្យា, អក្សរសាស្រ្តខ្មែរ, សីលធម៌, ភូមិវិទ្យា, ប្រវត្តិវិទ្យា, ភាសាអង់គ្លេស និងផែនដី-បរិស្ថានវិទ្យា ដែលជាមុខវិជ្ជាជ្រើសរើស។
តាមរយៈកំណែទម្រង់នេះ ក្រសួងអប់រំ យុវជន និងកីឡា ទទួលបានផលវិជ្ជមានជាច្រើន ក្រោយសិស្សានុសិស្សអាចប្រឡងជាប់ដោយជោគជ័យ ក្រោមពាក្យស្លោក «ចេះ គឺជាប់»។ គួរបញ្ជាក់ថា លទ្ធផលនៃការប្រឡងសញ្ញាបត្រទុតិយភូមិ កាលពីឆ្នាំ២០២១ មានបេក្ខជនជាប់ចំនួន៧២ ០១៦នាក់ ស្មើ៦៥,៦៥ភាគរយ ក្នុងនោះបេក្ខជនប្រឡងនិទ្ទេស A ចំនួន១ ៧៥៣នាក់៕
បេក្ខជនប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំ២០១៩
Tag:
បាក់ឌុប
អប់រំ
វិញ្ញាសា
© រក្សាសិទ្ធិដោយ thmeythmey.com