ជាតិ
ពលរដ្ឋបារាំង លោក ហ្គ្រីប៊ែល ចំណាយពេល និងថវិកាជាច្រើនជួសជុលឡាន RENAULT ចំណាស់៥០ឆ្នាំហើយ
×![]()
ដោយ: នាយយ៉ាន
បារាំង៖ ពលរដ្ឋបារាំង លោកត្រកូល ហ្គ្រីប៊ែល បានទិញឡានម៉ាក RENAULT ប្រភេទ 12 ម៉ូឌែល TN ពណ៌ស ផលិតឆ្នាំ១៩៧៣ ១គ្រឿង កាលពីអំឡុងឆ្នាំ២០២២។ ដោយសារវាជិះមិនបាន គាត់បានទុកចតរថយន្ដនេះនៅមុខផ្ទះ ហាលវាលប្រហែលកន្លះឆ្នាំហើយ។ គាត់ត្រូវការពេលដើម្បីធ្វើបញ្ជីលើគ្រឿងបន្លាស់ដែលត្រូវជួសជុល ឬគ្រឿងដែលត្រូវការស្វែងរកជាមុន។ សម្រាប់ការជួសជុលរថយន្តនេះ លោក បានចំណាយពេលវេលា កម្លាំង និងថវិកាអស់ច្រើនដែរ។
សូមអញ្ជើញលោកអ្នកនាង ទស្សនាវីដេអូខាងក្រោមនេះ៖
ម៉ាស៊ីនមិនឆេះទេ។ កៅអ្វីខាងមុខទាំង២ត្រូវតែដូរ។ ទ្រង់ទ្រាយត្រូវតម្រង់បន្តិច និងបាញ់ថ្នាំពណ៌សឡើងវិញ ហើយបិតដងក្រូម៉េថ្មីខាងឆ្វេង។ បញ្ហាមួយចុងក្រោយ ច្រែះស៊ីដែកខ្លះដែរ។ ពេលនេះ ម្ចាស់យានយន្ដកញ្ចាស់នេះ កំពុងតែដកគ្រឿងចេញទាំងអស់ ទុកវានៅកន្លែងទូលាយល្មម ដោយមានរបៀបរៀបរយ។ គ្រឿងដែលត្រូវទុក គាត់នឹងសម្អាតវាយ៉ាងជាក់លាក់។ គ្រឿងខ្លះ គាត់នឹងប្រើតែអេប៉ុងធម្មតា អេប៉ុងដែក ឬច្រាស ជាមួយទឹកសាប៊ូ តែសម្រាប់ខ្លះទៀត គាត់នឹងត្រូវខាត់វា។ ហើយសម្រាប់គ្រឿងខ្លះៗទៀត គាត់នឹងប្រើសាំង ឬគីមី ដើម្បីសម្អាត។ ប្រសិនជាច្រែះស៊ីដែក គាត់នឹងប្រើម៉ូទ័រស្វានជាមួយច្រាសរោមរឹង និងថ្នាំ ដើម្បីដកច្រែះចេញ។ បើសិនជាត្រូវការក្រូម៉េឡើងវិញ គាត់នឹងឱ្យជាងធ្វើ។ កិច្ចការមួយទៀត ដែលគាត់នឹងទុកឱ្យជាងធ្វើ គឺសម្អាតម៉ាស៊ីន តាមរបៀបពិសេស។ គឺជាបច្ចេកទេសបាញ់គ្រាប់ឈើតូចៗខ្លាំងៗ ! វាថ្លៃបន្តិច ប៉ុន្តែវាធ្វើឱ្យមើលទៅសម្អាតហើយ ទោះបីជាម៉ាស៊ីនពី៥០ឆ្នាំមុនក៏ដោយ ផ្ទៃវាចេញមកមានសភាពដូចទំនើបវិញ មិនគួរឱ្យជឿ។
តាមធម្មតា ពេលយករថយន្ដមួយមកធ្វើទំនើបកម្ម លោកត្រកូល ហ្គ្រីប៊ែល មិនព្រមធ្វើតាមលទ្ធភាពទេ។ គ្រឿងណា ដែលមិនអាចជួសជុលឱ្យបានល្អប្រសើរ គាត់ដូរវាតែម្ដង។ ឧទាហរណ៍ទ្រង់ទ្រាយឡានគាត់មិនតោនទេ។ បើសិនជាត្រូវការ គាត់រកផ្នែកទ្រង់ទ្រាយពីឡានប្រភេទដូចគ្នាទៅដូរវិញ។ ជម្រើសទីមួយ គាត់រកទិញគ្រឿងបន្លាស់ប្រើប្រាស់ហើយពីឡានដទៃ ប្រភេទដូចគ្នា ឆ្នាំដូចគ្នា។ ជម្រើសទី២ គាត់ទិញគ្រឿងបន្លាស់ថ្មី ដែលក្រុមហ៊ុនមួយចំនួនផលិត សម្រាប់ជួសជុលរថយន្ដបុរាណ។ សូមបញ្ជាក់ថា គឺជាគ្រឿងបន្លាស់ ដែលផលិតថ្មី ក៏ប៉ុន្តែដែលដូចគ្រឿងដើម។
ជាចុងក្រោយ រួចរាល់បន្ទាប់ពីបាញ់ថ្នាំពណ៌ដូចពីដើម ឬលាបថ្នាំការពារច្រែះសម្រាប់គ្រឿងខាងក្រោម គាត់ដំឡើងឡានឡើងវិញ។ ប្រសិនបើគេបានបន្ថែមគ្រឿងខ្លះ ឧទាហរណ៍សម្រាប់សោភ័ណភាព តាំងពីយូរមកហើយ គាត់ទុកវាប្រើបន្ត។ ក៏ប៉ុន្តែបើសិនជាគេបានបន្ថែមគ្រឿងខុសសម័យ គាត់យកវាទៅបោះចោល មិនប្រើបន្តទេ។ ដល់ជំហាននេះ គាត់មានតែគ្រឿងស្អាតបំផុត ដូច្នេះគាត់ដំឡើងរថយន្ដឡើងវិញ ដោយប្រុងប្រយ័ត្នណាស់ កុំឱ្យធ្វើកាយវិការខុសនាំឱ្យខូចអ្វីមួយ សូម្បីតែស្នាមតិចតួច។ នេះជាមូលហេតុដែលធ្វើឱ្យគាត់ដំឡើងមួយៗ ដោយប្រើក្រដាសកាសែត ក្រដាសកាតុង ឬពូក ដើម្បីការពាររហូត។ អំពីផ្លាកលេខ លេខចាស់ ឬលេខថ្មីក៏ដោយ គាត់កូម្ម៉ង់ផ្លាកថ្មី តាមស្តង់ដារនៃសម័យរថយន្ដ ដើម្បីកុំឱ្យខុសសម័យ។ នៅសហភាពអឺរ៉ុប ច្បាប់ចរចរអនុញ្ញាតឱ្យធ្វើបែបនេះ សម្រាប់ឡានដែលមានអាយុកាល ៣០ឆ្នាំឡើងទៅ។
គាត់មិនដែលទិញរថយន្ដបុរាណ ដែលគេបានកែច្នៃ។ យ៉ាងណាក៏ដោយ នៅទ្វីបអឺរ៉ុប មិនសូវមានទេ។ អ្វីដែលគាត់ពេញចិត្ត គឺជាឡានចាស់ៗ ដែលរក្សាសភាពដូចកាលពីនៅថ្មី។ ហេតុនេះ គាត់មានរបៀបក្នុងការប្រើប្រាស់រថយន្ដ ដែលគាត់បានសង្គ្រោះហើយ ! ទីមួយ បើមិនជិះ មួយសប្ដាហ៍ម្ដង គាត់បញ្ឆេះម៉ាស៊ីន។ ទីពីរ គាត់មិនយកទៅបើកបរនៅពេលដែលអាកាសធាតិត្រជាក់ពេក ឬនៅពេលដែលធ្លាក់ភ្លៀង។ ទីបី មុននឹងបើកបរ គាត់ពិនិត្យកម្រិតប្រេង កម្រិតទឹក និងពន្លឺហ្វារ និងស៊ីញ៉ូ។ ទីបួន បន្ទាប់ពីបានប្រើហើយ គាត់សម្អាតឡានតាមក្រោយ។ ប្រសិនបើត្រូវការលាងទឹក លាងហើយ គាត់ជូត ឬបាញ់ខ្យល់ ដើម្បីវាស្ងួត។ ជាការពិត ភាពសើមគឺជាខ្មាំងនៃលោហធាតុ។ ជាទូទៅ រៀងរាល់ដង ដែលគាត់បើកបររថយន្ដបុរាណណាមួយរបស់គាត់ គាត់មិនប្រញាប់ប្រញាល់នោះទេ។ គាត់ប្រើពេលច្រើន ដោយធ្វើគ្រប់កាយវិការមួយៗ។ គាត់ថែរក្សាស្នាដៃរបស់គាត់គ្រប់យ៉ាង ដោយការពារវាជានិច្ច និងថែទាំវាឱ្យបានល្អបំផុត។
RENAULT 12 (R12) TN គឺជា R12 គូទវែង ដែលប្រណីតជាង។ ត្រូវបានចាប់ផ្ដើមផលិតម៉ូឌែលនេះ ឆ្នាំ១៩៧៣។ ហើយមួយឆ្នាំក្រោយមក ឈ្មោះម៉ូឌែលត្រូវបានដូរ។ រថយន្ដ R12 ត្រូវបានផលិតពីឆ្នាំ១៩៦៩ ដល់ឆ្នាំ១៩៨០។ ក្នុងរោងចក្រផ្សេងៗ នៅប្រទេសបារាំង នៅប្រទេសអេស្ប៉ាញ នៅអតីតប្រទេសយូហ្កូស្លាវី និងនៅប្រទេសកូឡំប៊ី។ ចំណែកនៅប្រទេសតួកគី គេបន្តផលិតទៀតរហូតដល់ឆ្នាំ២០០៦ សរុបទាំងអស់ ៤ ០៩០ ៦២៩ គ្រឿង។ សូមបញ្ជាក់ថា R12 ភាគច្រើនមានទ្រង់ទ្រាយធម្មតា មិនមែនជាទ្រង់ទ្រាយគូទវែងទេ។ ក៏ប៉ុន្តែធ្លាប់មានម៉ូឌែលពិសេសមួយ បង្កើតឡើងរួមជាមួយក្រុមហ៊ុន Gordini បែបកីឡា។ ពីឆ្នាំ១៩៧០ ទៅឆ្នាំ១៩៧៤ R12 Gordini បានប្រណាំងឈ្នះ ២៤ប្រកួត ទូទាំងពិភពលោក។
បងប្អូនបង្កើត RENAULT Fernand និង Marcel បានបង្កើតក្រុមហ៊ុន RENAULT ឆ្នាំ១៨៩៨ នៅទីក្រុង Boulogne-Billancourt ប្រទេសបារាំង។ បើតាមចំនួនរថយន្ដផលិត ឆ្នាំ២០២១ ក្រុមសម្ព័ន្ធ RENAULT-NISSAN-MITSUBISHI ជាក្រុមសម្ព័ន្ធចំណាក់ថ្នាក់លេខ៣ ទូទាំងពិភពលោក៕
:
Tag:
រថយន្ត
យានយន្ត
រថយន្តបុរាណ
ឡានបុរាណ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
