ដ្បិតក្រុមជម្រើសជាតិបាល់ទះកម្ពុជា បានត្រឹមមេដាយប្រាក់ក្តី ប៉ុន្តែកម្ពុជា បានធ្វើឱ្យប្រទេសក្នុងតំបន់ លែងហ៊ានមើលស្រាល និងមើលងាយដូចមុន។ នេះជាសម្តីប្រធានក្រុមជម្រើសជាតិបាល់ទះកម្ពុជា សួន ចាន់ណារ៉ូ ថ្លែងប្រាប់សារព័ត៌មានថ្មីៗ ក្រោយចប់ការប្រកួតវគ្គផ្ដាច់ព្រ័ត្រ ដែលកម្ពុជា ចាញ់ឥណ្ឌូណេស៊ី ដោយលទ្ធផល ៣-០សិត នៃព្រឹត្តិការណ៍ស៊ីហ្គេម លើកទី៣២ កាលពីថ្ងៃទី៨ ឧសភា។
 

«ខ្ញុំគ្រាន់តែបង្ហើបបន្តិចទេថា ចប់ស៊ីហ្គេម កីឡាករយើងនឹងមានតម្លៃខ្លួនទៅលេងក្រៅប្រទេសដូចជា ថៃ ឥណ្ឌូណេស៊ី ហ្វីលីពីន វៀតណាម និងម៉ាឡេស៊ី »។ នេះជាការបង្ហើបព័ត៌មានពីកីឡាករ សួន ចាន់ណារ៉ូ ដែលបានបន្ថែមថា ក្លិបបាល់ទះនៅប្រទេសថៃ បានទាក់ទងមករូបលោក និងខាងសហព័ន្ធបាល់ទះកម្ពុជា ដើម្បីនាំកីឡាករកម្ពុជាទៅលេងនៅលីគថៃ៕