តាមទិន្នន័យរបស់ក្រសួងកសិកម្ម និងអភិវឌ្ឍជនបទ ទិន្នផលអង្ករសរុប នៅក្នុងឆ្នាំ២០២៣ បានកើនឡើង ១,៩ភាគរយ ដោយមានទំហំ ៤៣,៥លានតោន។ ក្នុងចំនួនដ៏ច្រើននេះ វៀតណាម អាចផ្គត់ផ្គង់អង្ករបានទាំងសម្រាប់ទីផ្សារ ក្នុងស្រុក និងការនាំចេញ។ 

 

ដោយសារតែតម្រូវការខ្ពស់លើទីផ្សារអន្តរជាតិ វៀតណាមអាចនាំចេញអង្ករ បានក្នុងតម្លៃជាមធ្យម ៦៦៣ដុល្លារ ក្នុងមួយតោន។ 

 

ជុំវិញការនាំចេញនេះ វៀតណាមបាននាំចេញអង្ករបានយ៉ាងច្រើន ដែលមានធ្លាប់មានពីមុនមកក្នុងប្រវត្ថិសាស្រ្តរបស់ខ្លួន ក្នុងទំហំ ៨,៣លានតោន។ ទន្ទឹមនេះ វៀតណាមអាចទាញចំណូលពីការនាំចេញអង្ករ បាន ៤,៧៨ពាន់លានដុល្លារ។​

 

ការហក់ឡើងនៃតម្លៃអង្ករនេះ គឺដោយសារពិភពលោក កំពុងប្រឈមបញ្ហាជាច្រើនដូចជាសង្រ្គាមនៅអ៊ុយក្រែន ភាពតានតឹងនៅតំបន់មជ្ឈិមបូព៌ា បាតុភូតធម្មជាតិ El Nino និងការហាមឃាត់ការនាំចេញប្រភេទអង្ករពីបណ្តាប្រទេសមួយចំនួនដូចជា ឥណ្ឌា រុស្ស៊ី និងអេមីរ៉ាតអារ៉ាប់រួមជាដើម។ 

 

តម្រូវការអង្កររបស់វៀតណាម នៅក្នុង២០២៤ អាចនឹងបន្តខ្ពស់ ដោយសារតែចិន និងហ្វីលីពីនកម្មង់ទិញច្រើន ខណៈការផ្គត់ផ្គង់នៅទីផ្សារអន្តរជាតិមានចំនួនទាប។ 

 

សូមបញ្ជាក់ថា កន្លងមក អង្ករវៀតណាមប្រភេទ ST25 បានទទួលចំណាត់ថ្នាក់លេខមួយ លើពាន «World’s Best Rice» ខណៈកម្ពុជាទទួលបានចំណាត់ថ្នាក់លេខ២។ ចំណែកថៃ មិនបានចូលរួមប្រកួតនោះឡើយ៕