កីឡាអន្តរជាតិ
អន្តរជាតិ
World Cup៖ ស្វែងយល់ពូល A រវាងម្ចាស់ផ្ទះរុស្ស៊ី អារ៉ាប៊ីសាអូឌីត អេហ្ស៊ីប និងអ៊ុយរូហ្គាយ
× រុស្ស៊ីឈ្នះការបោះឆ្នោតដើម្បីបានសិទ្ធិធ្វើជាម្ចាស់ផ្ទះការប្រកួតបាល់ទាត់ FIFA World Cup 2018 កាលពីខែធ្នូ ឆ្នាំ២០១០។ នេះជាលើកទី២ហើយដែលក្រុមមកពីតំបន់អឺរ៉ុបអាចធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោកនេះបន្ទាប់ពីអាល្លឺម៉ង់បានសិទ្ធិនៅឆ្នាំ២០០៦។ រុស្ស៊ីដែលមានអ្នកចាត់ការទូទៅ លោក Stanislav Cherchesov ស្ថិតក្នុងពូល A ត្រូវស្វាគមន៍ អារ៉ាប៊ីសាអូឌីតពីតំបន់អាស៊ី, អេហ្ស៊ីបពីអាហ្វ្រិក និង អ៊ុយរូហ្គាយពីអាមេរិកខាងត្បូង។
រុស្ស៊ីនឹងចាប់ផ្តើមប្រកួតបើកឆាក World Cup ជាមួយអារ៉ាប៊ីសាអូឌីត នៅថ្ងៃទី១៤ ខែមិថុនា នាកីឡដ្ឋាន Luzhniki ក្នុងក្រុងម៉ូស្គូ វេលាម៉ោង១០យប់ [ម៉ោងនៅកម្ពុជា]។ ការប្រកួតបើកឆាកគឺជាព្រឹត្តិការណ៍សំខាន់មួយដែរ សម្រាប់អ្នកគាំទ្រនៅលើពិភពលោក បន្ទាប់ពីការប្រកួតក្នុងវគ្គផ្តាច់ព្រ័ត្រ។ អារ៉ាប៊ីសាអូឌីត ក៏នឹងក្លាយជាក្រុមពីអាស៊ីដំបូងគេដែលអាចចូលរួមក្នុងការប្រកួតបើកឆាកព្រឹត្តិការណ៍ដ៏នេះផងដែរ។
អ្វីដែលយើងគួរដឹងអំពីក្រុមទាំង៣ដែលត្រូវជួបម្ចាស់ផ្ទះរុស្ស៊ី
អេហ្ស៊ីប៖ ព្រឹត្តិការណ៍ World Cup នៅរុស្ស៊ីឆ្នាំ២០១៨ គឺជាវត្តមានលើកដំបូងរបស់អេហ្ស៊ីបចាប់តាំងពីបង្ហាញខ្លួននៅឆ្នាំ១៩៩០ ដែលអ៊ីតាលីធ្វើម្ចាស់ផ្ទះ។ ខ្សែប្រយុទ្ធឆ្នើមរបស់ Liverpool កីឡាករ Mohamed Salah គឺជាវីរបុរសដែលជួយឲ្យប្រទេសក្នុងពិភពអារ៉ាប់មួយនេះបានកៅអីទៅកាន់វគ្គផ្តាច់ព្រ័ត្រនៅរុស្ស៊ីនាខែមិថុនាខាងមុខនេះ។
អារ៉ាប៊ីសាអូឌីត៖ Mohammad Al-Sahlawi ខ្សែប្រយុទ្ធដ៏មានថាមពល និងភាពស្វាហាប់របស់អារ៉ាប៊ីសាអូឌីតបានបង្ហាញទម្រង់លេងដ៏អស្ចារ្យក្នុងវគ្គជម្រុះតាមពូលប្រចាំទ្វីបអាស៊ីជាមួយគ្រាប់បាល់ស៊ុតបញ្ចូលទី១៦គ្រាប់ដើម្បីនាំងប្រទេសក្នុងពិភពអារ៉ាប់នេះឈានទៅរុស្ស៊ីឆ្នាំ២០១៨។
អ៊ុយរូហ្គាយ៖ ជាម្ចាស់ជើងឯក World Cup ពីរសម័យកាល ពោលគឺឈ្នះក្នុងព្រឹត្តិកាណ៍លើកដំបូងក្នុងនាមជាម្ចាស់ផ្ទះឆ្នាំ១៩៣០ និងលើកទី២ក្នុងឆ្នាំ១៩៥០ ដែលប្រេស៊ីលជាម្ចាស់ផ្ទះ។ ក្រុមមកពីអាមេរិកឡាទីនមួយនេះមានកីឡាករឆ្នើមរបស់ខ្លួនដូចជា Luis Suarez និង Edison Cavani។
អ្វីដែលគួរចាប់អារម្មណ៍ជាងគេសម្រាប់ក្រុមនៅពូល A នេះ គឺអាយុររបស់អ្នកចាំទីអេហ្ស៊ីប Essam El-Hadary ដែលមានវ័យរហូតសល់ ៤៥ឆ្នាំ និងជាកីឡាករចំណាស់ជាងគេនៅ World Cup លើកទី២២នេះ៕
Tag:
បាល់ទាត់ FIFA World Cup
GroupA
© រក្សាសិទ្ធិដោយ thmeythmey.com