អន្តរជាតិ
នយោបាយអន្តរជាតិ
លោក គីម ជុងអ៊ុន មកដល់សិង្ហបុរី, ត្រៀមជួបលោក លី សៀនឡុង រូបភាព៖ Reuters
× យន្តហោះប៊ូអ៊ីង៧៤៧របស់ចិន ដឹកមេដឹកនាំកំពូលកូរ៉េខាងជើងលោក គីម ជុងអ៊ុន មកដល់សិង្ហបុរីហើយនៅរសៀលថ្ងៃអាទិត្យទី ១០ ខែមិថុនានេះ។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងត្បូង Yonhap ។
យន្តហោះរបស់ចិនដែលចុះចតនៅព្រលានយន្តហោះសិង្ហបុរី Changi នេះស្ថិតក្នុងចំណោមយន្តហោះចំនួនបីដែលហោះចេញពីកូរ៉េខាងជើងនៅថ្ងៃអាទិត្យនេះ។ គេជឿជាក់ថាយន្តហោះរបស់ចិនដែលចុះចតនេះដឹកលោក គីម ខណៈយន្តហោះផ្សេងទៀតនោះដឹកជញ្ជូនមន្ត្រីកូរ៉េខាងជើង អង្គរក្សផ្ទាល់ខ្លួនរបស់មេដឹកនាំកំពូល រថយន្តពិសេស និងសម្ភារផ្សេងទៀតផងដែរ។
ដោយឡែក ភ្លាមៗក្រោយយន្តហោះចុះចត គេឃើញរដ្ឋមន្ត្រីការបរទេសសិង្ហបុរីលោក វីវៀន បាឡាសគ្រីស្នាន់ បង្ហោះរូបភាពតាមគណនីហ្វេសប៊ុកខ្លួនពេលលោកឈរចាំស្វាគមន៍លោក គីម ជុងអ៊ុនចុះពីយន្តហោះ។ បន្ទាប់អញ្ជើញមកដល់ហើយនោះ លោក គីម នឹងអញ្ជើញជួបនាយករដ្ឋមន្ត្រីសិង្ហបុរីផងដែរ។ ក្រសួងការបរទេសសិង្ហបុរីបានចេញសេចក្តីប្រកាសព័ត៌មានថា នាយករដ្ឋមន្ត្រីសិង្ហបុរីលោក លី សៀនឡុង នឹងជួបលោក គីម នៅល្ងាចថៃ្ងអាទិត្យនេះ។
ចំណែកប្រធានាធិបតីអាមេរិកលោក ត្រាំ កំពុងធ្វើដំណើរតាមយន្តហោះ Air Force One ពីកាណាដាឆ្ពោះមកសិង្ហបុរី ហើយលោកទំនងជាមកដល់នៅពេលយប់នេះ។ នៅព្រឹកថ្ងៃចន្ទស្អែកនេះ លោក ត្រាំ នឹងជួបពិភាក្សាជាមួយលោក លី ម្តង ពោលគឺមុនកិច្ចប្រជុំផ្លូវការមកដល់។
តាមពិតទៅ មេដឹកនាំអាមេរិក និងកូរ៉េខាងជើង នឹងត្រូវជួបមុខគ្នាជាលើកដំបូងនៅឯ
សណ្ឋាគារ Capella លើកោះ Sentosa របស់សិង្ហបុរី។ ប្រធានបទសំខាន់នៃកិច្ចពិភាក្សាគឺ ការរំសាយអាវុធនុយក្លេអ៊ែរកូរ៉េខាងជើង។ មុនចាកចេញពីកាណាដាមកសិង្ហបុរីថ្ងៃ សៅរ៍ម្សិលមិញ លោក ត្រាំ បានបញ្ជាក់ក្នុងសារដែលបង្ហោះតាមគណនី Twitter ខ្លួនថា ជំនួបនេះជាបេសកកម្មស្វែងរកសន្តិភាព ហើយអ្វីដែលសំខាន់វាជាឱកាសតែម្តងប៉ុណ្ណោះមិនគួរខ្ជះខ្ជាយឡើយ។ លោកក៏កត់សម្គាល់ផងដែរថា លោក គីម នឹងប្រឹងប្រែងខ្លាំងក្នុងការស្វែងរកសន្តិភាពពិតប្រាកដនេះ។
— Donald J. Trump (@realDonaldTrump)
June 9, 2018 ជុំវិញការស្នាក់វិញ លោក ត្រាំ ជ្រើសរើសយកសណ្ឋាគារផ្កាយ៥ Shangri-La ព្រោះជាសណ្ឋាគារប្រណីត និងធ្លាប់ទទួលស្វាគមន៍មេដឹកនាំអាមេរិកច្រើនផង។ ចំណែកឯលោក គីម វិញ ស្នាក់នៅសណ្ឋាគារ St Regis ។ សន្តិសុខត្រូវបានពង្រឹងនៅបរិវេណសណ្ឋាគារទាំងពីរនេះ។ មុននេះគេជឿជាក់ថា លោក គីមចង់ស្នាក់នៅសណ្ឋាគារ Fullerton ដែលមានតម្លៃថ្លៃ ប៉ុន្តែបែរជាស្នើរកអ្នកចេញថ្លៃឲ្យទៅវិញ៕
© រក្សាសិទ្ធិដោយ thmeythmey.com