កីឡាអន្តរជាតិ
អន្តរជាតិ
Guerrero នឹងឱបប្រធានក្រុមអូស្ត្រាលី ដែលជួយឲ្យរូបគេបានលេង World Cup នៅរុស្ស៊ី
× ប្រធានក្រុមជម្រើសជាតិប៉េរូ Paolo Guerrero នឹងឱបកីឡាករ Mile Jedinak ប្រធានក្រុមអូស្ត្រាលីទុកជាការអរគុណសម្រាប់ការរួមចំណែកសម្រេចក្តីសុបិនរបស់ខ្លួនដើម្បីមានវត្តមានលើកដំបូងក្នុងការប្រកួតពានរង្វាន់កីឡាបាល់ទាត់ពិភពលោក FIFA World Cup នៅរុស្ស៊ី ឆ្នាំ២០១៨នេះ។
ប៉េរូ នឹងត្រូវតទល់ជាមួយអូស្ត្រាលីសម្រាប់ការប្រកួតចុងក្រោយពូល C នៅវេលាម៉ោង ៩ យប់ ថ្ងៃទី ២៦ ខែមិថុនានេះ។ នៅមុនពេលកែបាល់ Guerrero ថានឹងឱប Jedinak ដើម្បីជាការអរគុណចំពោះការជ្រោមជ្រែញជួយខ្លួនឲ្យរួចផុតពីការហាមប្រាមចូលរូមក្នុងព្រឹត្តិការណ៍ដ៏ធំនេះជុំវិញករណីប្រើប្រាស់សារធាតុញៀនខុសច្បាប់។
ខ្សែប្រយុទ្ធវ័យ៣៤ឆ្នាំ ត្រូវបានហាមឃាត់ក្នុងសកម្មភាពកីឡាបាល់ទាត់រយៈពេល ១៤ ខែ កាលពីថ្ងៃទី១៤ ខែឧសភាពីសំណាក់តុលាការអាជ្ញាកណ្តាលកីឡា (CAS) ក្រោយធ្វើតេស្តរកឃើញថាមានផ្ទុកសារធាតុកូកាអ៊ីន ដែលនឹងធ្វើឲ្យរូបគេខកខានទៅចូលរួមជាមួយក្រុមជម្រើសជាតិប៉េរូក្នុងការប្រកួតបាល់ទាត់ពិភពលោកនៅរុស្ស៊ី។
Mile Jedinak ប្រធានក្រុមរបស់ជម្រើសជាតិអូស្ត្រាលី
ប៉ុន្តែជុំវិញការហាមឃាត់នេះ ប្រធានក្រុមជម្រើសជាតិ៣រូបដែលស្ថិតក្នុងពូល C ជាមួយប៉េរូ រួមមាន Mile Jedinak របស់អូស្ត្រាលី Simon Kjaer របស់ដាណឺម៉ាក និង Hugo Lloris អ្នកចាំទីបារាំង បានប្រតិកម្ម និងតវ៉ា ដោយសរសេរលិខិតរួមគ្នាទៅកាន់ FIFA ដើម្បីសុំឲ្យពួកគេលើកលែងបម្រាមនេះវិញ។ ក្រៅពីនោះ ក៏មានការតវ៉ាពីប្រជាជន និងប្រធានាធិបតីប៉េរូផ្ទាល់ផងតែម្តងដើម្បីសុំឲ្យ Guerrero បានបង្ហាញខ្លួនសម្រាប់ក្រុមជម្រើសជាតិនៅ World Cup លើកទី២២នេះ។
ដោយសារការតវ៉ាមានប្រសិទ្ធភាព ទីបំផុតខ្សែប្រយុទ្ធក្រុម Flamengo ពិតជាបានបង្ហាញខ្លួនក្នុងព្រឹត្តិការណ៍ World Cup ជាលើកដំបូងរបស់ខ្លួនក្នុងជីវិត ក្រោយតុលាការស្វីសយល់ព្រមលើកលែងបម្រាមនេះបណ្ដោះអាសន្ន។
ប៉េរូជាក្រុមដំបូងគេដែលបានធ្លាក់ចេញពី World Cup ត្រឹមវគ្គសន្សំពិន្ទុពូល C បន្ទាប់ពីរងបរាជ័យពីរប្រកួតដំបូងក្រោមថ្វៃជើងបារាំង និងដាណឺម៉ាក ហើយសល់មួយប្រកួតបង្គ្រប់កិច្ចជាមួយអូស្ត្រាលីនៅយប់នេះ៕
Tag:
បាល់ទាត់
FIFA World Cup
Paolo Guerrero
GroupC
© រក្សាសិទ្ធិដោយ thmeythmey.com