ជាតិ
រដ្ឋមន្ត្រីព័ត៌មាន ប្រាប់ឲ្យមន្ត្រីខ្លួនប្រឹងប្រែងធ្វើការ ប្រសើរជាងនាំគ្នាមកជូនពរលោក
× ភ្នំពេញ៖ រដ្ឋមន្ត្រីព័ត៌មាន ប្រាប់ឲ្យមន្ត្រីខ្លួនប្រឹងប្រែងធ្វើការ ប្រសើរជាងនាំគ្នាមកជូនពរលោក ដែលបន្តតំណែងជារដ្ឋមន្ត្រីក្រសួងព័ត៌មាននេះ។ លោក ខៀវ កាញារីទ្ធ បានទទួលតំណែងជារដ្ឋមន្ត្រីក្រសួងព័ត៌មានជាថ្មីម្ដងទៀត សម្រាប់អាណត្តិទី៦ ក្រោមការជ្រើសតាំងរបស់សម្ដេចនាយករដ្ឋមន្ត្រី ហ៊ុន សែន។ ជារដ្ឋមន្ត្រីព័ត៌មានអាណត្តិថ្មីនេះ គឺជារឿងហួសស្មានមួយ ដែលផ្ទុយពីការប្រកាសរបស់លោក ខៀវ កាញារីទ្ធ ពីរឿងចូលនិវត្តកន្លងមក។
ជាធម្មតានៅពេលរដ្ឋមន្ត្រី និងថ្នាក់ដឹកនាំតាមក្រសួង ស្ថាប័នណាមួយ ដែលទទួលបានការតំណែង ឬការតែងតាំងអ្វីមួយពីសំណាក់ព្រះរាជក្រឹត្យព្រះមហាក្សត្រ ឬពីប្រមុខរដ្ឋាភិបាលនោះ គេសង្កេតឃើញថា មន្ត្រីក្រោមឱវាទតាមស្ថាប័នទាំងនោះ បាននាំគ្នាចេញលិខិតអបអរសាទរ និងជូនពរដល់ថ្នាក់ដឹកនាំខ្លួន ដែលទទួលបានតំណែងនេះ។ វាអាចជាការបង្ហាញពីទំហំចិត្តរបស់ថ្នាក់ក្រោម ទៅកាន់ថ្នាក់ដឹកនាំ។ ហើយក៏មិនមែនធ្វើបែបនេះ វាខុសនោះដែរ។
ប៉ុន្តែផ្ទុយពីការយល់ឃើញបែបនេះ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានឲ្យតម្លៃទៅលើការបំពេញការងាររបស់មន្ត្រីខ្លួនទៅវិញ។ សម្រាប់រដ្ឋមន្ត្រីព័ត៌មានរូបនេះ មន្ត្រីដែលប្រឹងប្រែងធ្វើការឲ្យបានល្អ គឺវាមានតម្លៃប្រសើរជាងនាំគ្នាមកជូនពរលោកទៅទៀត។
លោក ខៀវ កាញារីទ្ធ ដែលត្រូវបានសម្ដេច ហ៊ុន សែន តែងតាំងឲ្យបន្តដឹកនាំក្រសួងព័ត៌មានអាណត្តិទី៦នេះ បានសរសេរលើហ្វេសប៊ុកខ្លួនដូច្នេះថា៖«សូមប្រធានមន្ទីរទាំងអស់កុំមានអារម្មណ៍ថា ត្រូវតែមានកាតព្វកិច្ចមកជូនពរខ្ញុំក្នុងអាណត្តិថ្មីនេះ ។ យើងធ្វើការជាមួយគ្នាជាង ២០ ឆ្នាំហើយៗរាល់ឆ្នាំខ្ញុំតែងចុះតាមគ្រប់ខេត្តដែរទេ ។ សូមនាំគ្នាបំពេញការងារឲ្យបានល្អតាមមូលដ្ឋានរៀងៗខ្លួនទៅ នោះជាការជូនពរខ្ញុំហើយ»។
លោក ខៀវ កាញារីទ្ធ ចូលកាន់តំណែងរដ្ឋមន្ត្រីក្រសួងព័ត៌មាន ចាប់តាំងពីអាណត្តិទី៣ ជំនួសលោក លឺ ឡាយស្រេង ដែលជាអតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច។
ជុំវិញការតែងតាំងរដ្ឋមន្ត្រីនៅតាមក្រសួងដដែល សម្រាប់អាណត្តិទី៦នេះ ត្រូវបានសម្ដេច ហ៊ុន សែន បានពន្យល់បន្ថែមថា ការទាត់ចោលមន្ត្រីចាស់ដែលបានខិតខំបម្រើការងាររហូតគណបក្សទទួលបានជោគជ័យ នឹងផ្តល់គំរូមិនល្អសម្រាប់ថ្ងៃខាងមុខ។ សម្រាប់សម្ដេច ហ៊ុន សែន ការរក្សាកម្លាំងចាស់ ហើយបង្កើនកម្លាំងថ្មី គឺជាយុទ្ធសាស្ត្រសម្រាប់យកឈ្នះគ្រប់កាលៈទេសៈនយោបាយ៕
Tag:
ខៀវ កាញារីទ្ធ
ព័ត៌មាន
© រក្សាសិទ្ធិដោយ thmeythmey.com