អន្តរជាតិ
អតីតម្ចាស់អាណានិគមអង់គ្លេស ស្នើឲ្យរដ្ឋាភិបាលហុងកុងស្តាប់កង្វល់ពលរដ្ឋ
ប្រភពរូប៖ AFP
×![]()
អតីតម្ចាស់អាណានិគម ចក្រភពអង់គ្លេស បានស្នើឲ្យមានភាពស្ងប់ស្ងាត់នៅទីក្រុងហុងកុង ព្រមទាំងទទូចឲ្យរដ្ឋាភិបាលហុងកុងផ្ទៀងស្តាប់ជុំវិញកង្វល់របស់ប្រជាជនខ្លួន ទាក់ទិននឹងសំណុំរឿងជាមួយចិនដីគោក។ សំណើនេះ ធ្វើឡើងក្រោយពីបាតុកម្មហិង្សាមួយ បានផ្ទុះឡើងនៅថ្ងៃទី១២ ខែមិថុនា ក្នុងគោលដៅប្រឆាំងនឹងសេចក្តីព្រាងច្បាប់ ដែលអនុញ្ញាតឲ្យធ្វើបត្យាប័នទៅកាន់ចិនដីគោក។ 
ក្នុងសេចក្តីថ្លែងការណ៍ រដ្ឋមន្ត្រីក្រសួងការបរទេសអង់គ្លេស លោក Jeremy Hunt បញ្ជាក់ឲ្យដឹងថា បាតុកម្មដែលកំពុងកើតឡើងក្នុងទីក្រុងហុងកុង គឺជាសញ្ញាដ៏ច្បាស់លាស់មួយ ដែលឆ្លុះបញ្ចាំងពីកង្វល់របស់ពលរដ្ឋហុងកុងពាក់ព័ន្ធនឹងកំណែប្រែដែលដាក់ស្នើទៅកាន់ច្បាប់ធ្វើបត្យាប័ន។ ត្រង់ចំណុចនេះ លោក ស្នើសុំឲ្យភាគីពាក់ព័ន្ធទាំងអស់រក្សាភាពស្ងប់ស្ងាត់ និងសន្តិភាព។
តាមការចុះផ្សាយរបស់ទីភ្នាក់ងារព័ត៌មាន AFP ប្រមុខការទូតអង់គ្លេសរូបនេះ ក៏ទទូចឲ្យរដ្ឋាភិបាលហុងបើកចិត្តស្តាប់សេចក្តីព្រួយបារម្ភរបស់ប្រជាជនខ្លួន និងសម្ព័ន្ធមិត្តនានាក្នុងសហគមន៍អន្តរជាតិ ហើយយល់ព្រមផ្អាក និងគិតគូរឲ្យស៊ីជម្រៅលើវិធានការដែលចម្រូងចម្រាសទាំងនេះ។
«វា ជារឿងចាំបាច់បំផុតដែលអាជ្ញាធរពាក់ព័ន្ធចូលរួមក្នុងកិច្ចសន្ទនាដ៏មានអត្ថន័យ និងចាត់វិធានការដើម្បីអភិរក្សសេរីភាព និងសិទ្ធិរបស់ទីក្រុងហុងកុង ក៏ដូចជាឧត្តមភាពនៃស្វ័យ័តភាព ដែលជាគ្រឹះដ៏ចម្បងសម្រាប់ទ្រទ្រង់កិត្យានុភាពរបស់ខ្លួនលើឆាកអន្តរជាតិ»។ នេះបើតាមការបញ្ជាក់របស់លោករដ្ឋមន្ត្រី Jeremy Hunt ដោយសង្កត់ធ្ងន់ថា ការប្រកាន់ខ្ជាប់នូវគោលការណ៍ «ប្រទេសមួយ ប្រព័ន្ធពីរ» ដែលត្រូវបានលើកឡើងក្នុងសេចក្តីប្រកាសរួមគ្នារវាងចក្រភពអង់គ្លេស និងចិន ពិតជាមានសារៈសំខាន់យ៉ាងធំធេងសម្រាប់ភាពជោគជ័យនៅអនាគតរបស់ទីក្រុង ហុងកុង។
ដោយឡែក នៅថ្ងៃដដែលនេះ នាយករដ្ឋមន្ត្រីអង់គ្លេស លោកស្រី Theresa May បានលើកឡើងនៅក្នុងសភាថា ច្បាប់ធ្វើបត្យាប័នក្នុងទីក្រុងហុងកុង ត្រូវតែគោរពយ៉ាងចាំបាច់ចំពោះសេរីភាព និងសិទ្ធិរបស់ហុងកុង ដែលបានចែងក្នុងសេចក្តីប្រកាសរួមរវាងចក្រភពអង់គ្លេស និងចិនក្នុងឆ្នាំ១៩៨៤។
គួរឲ្យកត់សម្គាល់ដែរថា ចក្រភពអង់គ្លេស បានប្រគល់ការគ្រប់គ្រងលើទីក្រុងហុងកុង ត្រឡប់ទៅកាន់ចិនដីគោកវិញ កាលពីឆ្នាំ១៩៩៧ ដោយឈរលើមូលដ្ឋាននៃសេចក្តីប្រកាសរួម ដែលខ្លួនបានចុះហត្ថលេខាជាមួយក្រុងប៉េកាំង ។ សេចក្តីប្រកាសរួមគ្នារវាងភាគីទាំងពីរនេះ ធានាឲ្យបានថា សេរីភាពនានាក្នុងទីក្រុងហុងកុង ដែលស្គាល់ថា «ពាក់កណ្តាលស្វ័យ័តភាព» នឹងអូសបន្លាយដល់ឆ្នាំ២០៤៧។
សូមបញ្ជាក់ថា កាលពីថ្ងៃពុធទី ១២ ខែមិថុនា ការប៉ះទង្គិចហិង្សា បានផ្ទុះឡើងក្នុងទីក្រុងហុងកុង ខណៈសមត្ថកិច្ច បានព្យាយាមបញ្ឈប់ក្រុមបាតុករដែលបម្រុងនឹងសម្រុកចូលទៅក្នុងអគារសភាហុងកុង។ ទន្ទឹមនឹងគ្នានេះ មនុស្សរាប់ម៉ឹននាក់ បានខ្ទប់ច្រកចេញចូលសំខាន់ៗ ដើម្បីបង្ហាញសាច់ដុំប្រឆាំងនឹងសំណើច្បាប់ធ្វើបត្យាប័នទៅកាន់ចិនដីគោក។
ដើម្បីទប់ទល់នឹងហេតុការណ៍នេះ សមត្ថកិច្ចហុងកុង បានប្រើប្រាស់ឧស្ម័នបង្ហូរទឹកភ្នែក បាញ់គ្រាប់កាំភ្លើងជ័រ និងដំបង ក្នុងគោលដៅបំបែកក្រុមបាតុករ ដែលភាគច្រើនជានិស្សិត និងយុវជន ។ ពួកគេ បានស្នើឲ្យអាជ្ញាធរទាំងនេះលុបចោលសេចក្តីព្រាងច្បាប់ ដែលគាំទ្រដោយក្រុងប៉េកាំង៕
Tag:
ចក្រភពអង់គ្លេស
ហុងកុង
បាតុកម្ម
សេចក្តីព្រាងច្បាប់ធ្វើបត្យាប័ន
© រក្សាសិទ្ធិដោយ thmeythmey.com
