ជាតិ
សង្គមជាតិ
ភរិយាកវី គង្គ ប៊ុនឈឿន នឹងបានសិទ្ធិគ្រប់គ្រងចម្រៀង១៣បទបន្ថែមទៀត លោកស្រី គាត គឹមលន ភរិយារបស់លោក គង់ ប៊ុនឈឿន
× ភ្នំពេញ៖ ក្រសួងវប្បធម៌ និងវិចិត្រសិល្បៈ នាថ្ងៃទី២៣ ខែកក្កដា បានចេញសេចក្តីជូនដំណឹងស្តីពីការប្រគល់សិទ្ធិគ្រប់គ្រងលើបទចម្រៀងចំនួន១៣បទ ដល់អ្នកស្រី គាត គីមលន ភរិយាកវី គង្គ ប៊ុនឈឿន។ អ្នកស្រី គាត គីមលន នឹងទទួលបានសិទ្ធិគ្រប់គ្រងផ្លូវការ ប្រសិនគ្មានការប្តឹងជំទាស់ ដែលមានសុពលភាពរយៈពេល១ខែចាប់ពីថ្ងៃជូនដំណឹងនេះ។
បទចម្រៀងទាំង១៣បទដែលលោកស្រី គាត គីមលន ទទួលសិទ្ធគ្រប់គ្រងជាផ្លូវការនោះមាន បទ លាហើយសោភីនី ជួបភ័ក្រជួបស្នេហ៍ អាទិត្យវង្សា ស៊ីសូរិយាវង្ស ក្មេងវាយស្បែកជើង ទៅលេងបាត់ដំបង ទឹកភ្នែកឪពុក ភ្លេងមច្ចុរាជ ជំនោរបៃលិន អ្នកលេងស្មងតាន់ វិមានទឹកភ្នែក ស្រណោះផ្កាខ្ទម នឹកឃើញអូនផង និងបូតសណ្តែក។
ឆ្លងកាត់ការសិក្សាស្រាវជ្រាវ លោក សោម សុគន្ធ រដ្ឋលេខាធិការប្រចាំការនៃក្រសួងវប្បធម៌ និងវិចិត្រសិល្បៈ បានបញ្ជាក់ក្នុងសេចក្តីជូនដំណឹងថា បទចម្រៀងទាំង១៣បទនោះ សុទ្ធតែជាស្នាដៃនិពន្ធបទភ្លេច និងទំនុកច្រៀង ដោយកវី គង្គ ប៊ុនឈឿន។ បទភាគច្រើនច្រៀងដោយ លោក ស៊ីន ស៊ីសាមុត រីឯអ្នកចម្រៀងផ្សេងទៀត រួមាន លោក អ៊ឹង ណារី លោកស្រី រស់ សេរីសុទ្ធា លោក មាស សាម៉ន លោកស្រី ហួយ មាស លោកស្រី ប៉ែន រ៉ន, តាត សំណាង និង ណារ៉ា សូផុន។
កាលពីថ្ងៃទី១១ ខែឧសភា ឆ្នាំ២០១៩ លោកស្រី ភឿង សកុណា រដ្ឋមន្ត្រីនៃក្រសួងវប្បធម៌ និងវិចិត្រសិល្បៈបានចុះហត្ថលេខាយល់ព្រមប្រគល់សិទ្ធគ្រប់គ្រងឲ្យទៅភរិយាលោក គង្គ ប៊ុនឈឿន សម្រាប់គ្រងគ្រង់បទចម្រៀង«ថ្ងៃដែលអូនចុកឈាម»។ លោកស្រីបានស្នើសុំសិទ្ធគ្រប់គ្រងបទនេះ ក្រោយពីមានផលិតកម្មមួយយកទៅកាឡៃខុសពីជាបទដើម។
ជាមួយគ្នានេះ ក្រសួង បានបញ្ជាក់ថា ចំពោះភាគីពាក់ព័ន្ធទាំងអស់ ដែលមានបំណងចង់ប្តឹងជំទាស់នឹងការស្នើសុំសិទ្ធគ្រប់គ្រងបទចម្រៀងណាមួយ អាចមកដាក់ពាក្យបណ្តឹងមក នាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល នៃក្រសួងវប្បធម៌ និងវិចិត្រសិល្បៈ។ ក្រសួងនឹងទុកពេលសម្រាប់ភាគីដែលចង់ដាក់ពាក្យប្តឹងជំទាស់រយៈពេល១ខែ ចាប់ពីថ្ងៃផ្សាយសេចក្តីជូនដំណឹងទៅ៕
Tag:
គង់ ប៊ុនឈឿន
បទចម្រៀង
គាត គីមលន
© រក្សាសិទ្ធិដោយ thmeythmey.com