អន្តរជាតិ
មេដឹកនាំតួកគី បដិសេធការស្នើបង្កើតបទឈប់បាញ់ក្នុងតំបន់ភាគខាងជើងស៊ីរី ប្រធានាធិបតីតួកគី លោក រៃស៊ីប តៃយីប អ៊ែដូហ្កាន់ (Recep Tayyip Erdogan) [ប្រភពរូប៖ AFP]
× ប្រធានាធិបតីតួកគី លោក រ៉េស៊ីប តៃយីប អ៊ែរដូហ្កាន់ (Recep Tayyip Erdogan) បានទាត់ចោលការស្នើសុំរបស់សហរដ្ឋអាមេរិកឲ្យបង្កើតបទឈប់បាញ់ភ្លាមៗ ក្នុងតំបន់ភាគខាងជើងស៊ីរី ។ មេដឹកនាំរូបនេះ អះអាងថា ប្រតិបត្តិការយោធារបស់ក្រុងអង់ការ៉ា នឹងនៅតែបន្តក្នុងគោលដៅបង្កើត «តំបន់សុវត្ថិភាព» ទោះរងទណ្ឌកម្មក៏ដោយក្តី។
ប្រាប់អ្នកសារព័ត៌មាននៅថ្ងៃអង្គារ ទី១៥ ខែតុលា លោក តៃយីប អ៊ែដូហ្កាន់ និយាយថា៖«ពួកគេ [សហរដ្ឋអាមេរិក] ប្រាប់ឲ្យយើងប្រកាសបទឈប់បាញ់។ យើង នឹងមិនប្រកាសបទឈប់បាញ់ជាដាច់ខាត»។ លោកប្រធានាធិបតី បន្តថា៖«ពួកគេកំពុងដាក់សម្ពាធលើយើងបញ្ឈប់ប្រតិបត្តិការយោធា។ ពួកគេប្រកាសទណ្ឌកម្ម។ គោលដៅយើង គឺច្បាស់លាស់។ យើង មិនព្រួយបារម្ភពីទណ្ឌកម្មណាមួយឡើយ»។
ការលើកឡើងរបស់លោក អ៊ែដូហ្កាន់ ធ្វើឡើងខណៈអនុប្រធានាធិបតីអាមេរិក លោក ម៉ៃ ផេន និងរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ រៀបចំធ្វើដំណើរទៅកាន់តួកគីដើម្បីព្យាយាមសម្របសម្រួលបង្កើតបទឈប់បាញ់មួយ។ តាមការគ្រោងទុក មេដឹកនាំតួកគី នឹងជួបពិភាក្សាជាមួយលោក ផេន និងលោក ប៉ុមប៉េអូ ក្នុងរដ្ឋធានី អង់ការ៉ា នៅថ្ងៃព្រហស្បតិ៍ ទី១៧ ខែតុលា។
មុនដំណើរទស្សនកិច្ចទៅកាន់តួកគី លោកអនុប្រធានាធិបតី ផេន កាលពីថ្ងៃចន្ទសប្តាហ៍នេះ បានព្រមានចំៗថា ទណ្ឌកម្មអាមេរិកប្រឆាំងតួកគី នឹងកាន់តែអាក្រក់ខ្លាំង ប្រសិនបើរដ្ឋាភិបាលក្រុងអង់ការ៉ា មិនយល់ព្រមបង្កើតបទឈប់បាញ់ភ្លាមៗ និងចរចាស្វែងរកដំណោះស្រាយរយៈពេលវែងក្នុងសំណុំរឿងព្រំដែននេះទេនោះ។ ចំណែក រុស្ស៊ី នៅថ្ងៃអង្គារ ក៏បានព្រមានដែរថា ខ្លួននឹងមិនអនុញ្ញាតឲ្យមានការប៉ះទង្គិចកើតឡើងរវាងកងកម្លាំងតួកគីនិងស៊ីរីនោះឡើយ។
សម្រាប់ប្រតិបត្តិការយោធាប្រឆាំងកងសកម្មប្រយុទ្ធឃើដ (SDF) ដែលត្រូវបានចាត់ទុកជាពួកភេរវករ តួកគី អះអាងថា ខ្លួនមានគោលដៅវាយបណ្តេញកងកម្លាំងឃើដឲ្យដកចេញពីតំបន់ព្រំដែនភាគខាងជើងនៃប្រទេសស៊ីរី។ ការវាយលុកនេះដែរ ក្រុងអង់ការ៉ា មានបំណងបង្កើតតំបន់សុវត្ថិភាពមួយ ដែលលាតសន្ធឹងប្រវែង៣០គីឡូម៉ែត្រចូលក្នុងទឹកដីស៊ីរី ដើម្បីបង្កើតទីតាំងថ្មីសម្រាប់ជនភៀសខ្លួនស៊ីរីប្រមាណ២លាននាក់ ដែលបច្ចុប្បន្នរស់នៅក្នុងប្រទេសតួកគី។
ទោះជាបែបនេះ កងកម្លាំងស៊ីរីរបស់រដ្ឋាភិបាលលោក បាសា អាល់ អាសាដ ដែលគាំទ្រដោយរុស្ស៊ី កំពុងសម្រុកចូលកាន់ភាគខាងជើងនៃប្រទេសនេះ ក្រោយបង្កើតកិច្ចព្រមព្រៀងជាមួយក្រុមសកម្មប្រយុទ្ធឃើដ។ គោលដៅ គឺព្យាយាមវាយទប់ទល់កម្លាំងយោធាតួកគី នៅទីនោះ។ យោងតាមព័ត៌មានចុងក្រោយ កងកម្លាំងរបស់រដ្ឋាភិបាលស៊ីរី នៅថ្ងៃអង្គារ បានចូលទៅដល់ក្រុងយុទ្ធសាស្ត្រ Manbij ជាទីដែលតួកគីចង់បង្កើតតំបន់សុវត្ថិភាព ខណៈដែលយោធាតួកគី និងសកម្មប្រយុទ្ធប្រឆាំងរដ្ឋាភិបាលស៊ីរី ក៏កំពុងប្រមូលផ្តុំគ្នានៅក្បែរក្រុងនេះ។
សូបញ្ជាក់ថា ២ឆ្នាំចុងក្រោយ អាមេរិកបានដាក់ពង្រាយកងទ័ពរាប់រយនាក់ ប្រកៀកស្មាគ្នាជាមួយសកម្មប្រយុទ្ធឃើដ វាយបង្ក្រាបក្រុមរដ្ឋឥស្លាម (ISIS) ក្នុងស៊ីរី។ បន្ទាប់ពីក្រុងវ៉ាស៊ីនតោនប្រកាសដកទ័ពចេញពីភាគខាងជើងស៊ីរី ពួកឃើដចាត់ទុកសកម្មភាពនេះថាជា ការចាក់កាំបិតពីក្រោយខ្នង។ រដ្ឋបាលលោកប្រធានាធិបតី ដូណាល់ ត្រាំ ហ៊ុមព័ទ្ធដោយការរិះគន់ថា ផ្តល់ភ្លើងបៃតង សម្រាប់ប្រតិបត្តិការយោធារបស់តួកគីក្នុងទឹកដីស៊ីរីនេះ។ យ៉ាងណាមិញ សហរដ្ឋអាមេរិក បានច្រានចោលរឿងនេះ ហើយនៅថ្ងៃចន្ទ ក្រុងវ៉ាស៊ីនតោន បានប្រកាសដាក់ទណ្ឌកម្មលើមន្ត្រីជាន់ខ្ពស់ និងក្រសួងមួយចំនួនរបស់តួកគី៕
Tag:
តួកគី
ស៊ីរី
Erdogan
© រក្សាសិទ្ធិដោយ thmeythmey.com