អន្តរជាតិ
កូរ៉េខាងត្បូង ត្រៀមជម្លៀសប្រជាជនរបស់ខ្លួនចេញពីទីក្រុងវូហាន
× កូរ៉េខាងត្បូង នាថ្ងៃទី២៨ ខែមករា បានប្រកាសត្រៀមជម្លៀសប្រជាជនរបស់ខ្លួន ដែលមានវត្តមាននៅក្នុងក្រុងវូហាន តាមរយៈការបញ្ជូនយន្តហោះជាច្រើនគ្រឿងនៅក្នុងសប្តាហ៍នេះ ខណៈកូរ៉ូណាវីរុស កំពុងផ្ទុះឡើងជាច្រើនករណី និងសាយភាយទៅតំបន់ផ្សេងទៀត។ ជាមួយគ្នានេះដែរ ប្រធានាធិបតី មូន ចេអ៊ីន ក៏បានសន្យាជួយចិន ក្នុងការប្រយុទ្ធប្រឆាំងវីរុសថ្មីនេះផងដែរ។
ក្នុងកិច្ចប្រជុំថ្នាក់រដ្ឋមន្ត្រីបន្ទាន់មួយ ដែលដឹកនាំដោយនាយករដ្ឋមន្ត្រីកូរ៉េខាងត្បូង លោក Chung Sye-kyun កូរ៉េខាងត្បូង បានបញ្ចេញគម្រោងជម្លៀសប្រជាជនរបស់ខ្លួនជាច្រើននាក់ ចេញពីក្រុងវូហាន ប្រទេសចិន។ បើតាមលោកនាយករដ្ឋមន្ត្រី កូរ៉េខាងត្បូង នឹងអនុវត្តភារកិច្ចរបស់ខ្លួន ក្នុងការការពារពលរដ្ឋរបស់ខ្លួន ដែលស្នាក់នៅបរទេស ហើយសុវត្ថិភាពរបស់អ្នកទាំងនោះ គឺសំខាន់បំផុត។
ប្រសិនគ្មានការប្រែប្រួលទេ ប្រតិបត្តិការជម្លៀសជនជាតិកូរ៉េខាងត្បូងចេញពីក្រុងវូហាន នឹងធ្វើឡើងនៅថ្ងៃទី៣០ និងទី៣១ ខែមករា ខាងមុខនេះ។ ប្រតិបត្តិការនេះ ធ្វើឡើងបន្ទាប់ពីរដ្ឋាភិបាលកូរ៉េខាងត្បូងបារម្ភពីសុវត្ថិភាពប្រជាជនរបស់ខ្លួន និងបន្ទាប់ពីករណីនេះបានរីកសាយភាយប្រមាណ ៤៥១៥ករណី និងអ្នកស្លាប់កើនដល់ជាង១០០នាក់។ នេះបើតាមការចុះផ្សាយរបស់ទីភ្នាក់ងារសារព័ត៌មាន Yonhap។
ចំណែកប្រធានាធិបតីកូរ៉េខាងត្បូង មូន ចេអ៊ីនឯណោះវិញ បានចេញផ្ញើលិខិតមួយច្បាប់ទៅ ប្រធានាធិបតីចិន ស៊ី ជិនភីង ផងដែរ។ នៅក្នុងខ្លឹមសារនៃលិខិតនោះ លោកមូន បានសន្យាគាំទ្រគ្រប់កាលៈទេសៈទាំងអស់ ចំពោះចិន ក្នុងការចាត់វិធានការទប់ស្កាត់កូរ៉ូណាវីរុស។ ជាសារឆ្លើយតបទៅនឹងលិខិតជូនពររបស់លោក ស៊ី សម្រាប់ថ្ងៃកំណើត លោក មូន បានអះអាងថា រដ្ឋាភិបាលរបស់លោក សន្យាគាំទ្រ និងសហប្រតិបត្តិការជាមួយចិន ដើម្បីទប់ស្កាត់ការរីកសាយភាយកូរ៉ូណាវីរុស។ ជាពិសេសប្រមុខរដ្ឋកូរ៉េខាងត្បូងរូបនេះ ក៏បានជូនពរឲ្យចិនអាចដោះស្រាយបញ្ហានេះបានឆាប់ៗផងដែរ។
ក្រៅពីកូរ៉េខាងត្បូង នៅមានប្រទេសមួយចំនួនទៀត ក៏បានចេញវិធានការ ត្រៀមជម្លៀសប្រជាជនរបស់ខ្លួនផងដែរ ក្នុងនោះរួមមាន ជប៉ុន អាមេរិក ថៃ បារាំងជាដើម៕
Tag:
ចិន
កូរ៉េខាងត្បូង
កូរ៉ូណាវីរុស
© រក្សាសិទ្ធិដោយ thmeythmey.com